Erməni politoloq Qraçya Qalustyan Azərbaycan liderinin Rusiya üçün tarixi bir gündə Moskvaya səfəri haqda maraqlı etiraflar edib:
“İlham Əliyev Vladimir Putinlə Donetsk və Luqansk “xalq respublikaları”nın tanınması haqqında fərman imzalandıqdan sonra danışıqlar aparan ilk xarici lider oldu. Cənab Əliyev Moskvaya hələ fevralın 21-də, Rusiya Prezidentinin Təhlükəsizlik Şurasının iclasını keçirdiyi gün gəlmişdi, sonra Putin xalqına müraciət etdi və dərhal ardından Azərbaycan liderini salamladı. Bu, Əliyevin Putin üçün nə qədər böyük avtoritetə malik olmasının bariz nümunəsidir. Əliyevin Moskvaya budəfəki səfəri zamanı müttəfiqlik haqqında Bəyannamə imzalandı. O, 43 maddədən ibarətdir ki, onların hər biri Ermənistana praktiki olaraq müəyyən zərbəyə malikdir. Bunu deyə bilərik ki, Rusiya bizə xəyanət etdi. İndi həqiqətən heç kimə lazım deyilik. Artıq Rusiya Federasiyası və Azərbaycan Respublikası Silahlı Qüvvələri qarşılıqlı əlaqələri dərinləşdirəcək, o cümlədən birgə əməliyyat və döyüş hazırlığı tədbirlərinin keçirilməsi, habelə ikitərəfli hərbi əməkdaşlığın digər istiqamətlərini inkişaf etdirəcəklər. Bu, Bəyannamənin 13-cü bəndində qeyd edilir. Artıq Moskva ən müasir silahlarını Bakıya göndərəcək. Əliyev Moskvada bəyan edib ki, bütün erməni silahlı qüvvələrinin Qarabağdan çıxarılması və kommunikasiyaların açılması Ermənistanın hüquqi öhdəliyidir. Belə çıxır ki, bölgədəki vəziyyət barədə Ermənistanı fakt qarşısında qoyaraq ölkəmizin fikrini nəzərə almadan razılığa gəlmək olar və belə də olur. Rusiya da bununla razıdır, Türkiyə də buna kömək edir. İran da yeni reallıqla barışır. Biz, həqiqətən də hər şeydən kənarıq.
Belə çıxır ki, erməni silahlı qüvvələrinin Qarabağdan çıxarılmasına yaxın vaxtlarda başlanılacaq”.
Erməni mediası tərəfindən geniş tirajlanan bu etiraflar nəyi deməyə əsas verir?
Azərbaycan Kommunist Partiyasının sədri, sabiq millət vəkili Rauf Qurbanov “Bakı-Xəbər”ə açıqlamasında bildirdi ki, Rusiya üçün həssas və gərgin bir məqamda Azərbaycan prezidenti İlham Əliyevin Rusiya Federasiyasına rəsmi səfəri və Rusiya prezidenti Vladimir Putinlə yüksək səviyyəli qarşılıqlı müttəfiqlik bəyannaməsi imzalaması Azərbaycan-Rusiya münasibətlərinin hansı səviyyədə olması ilə yanaşı, prezident İlham Əliyevə olan hörmətin və etibarın bariz nümunəsidir: “İmzalanmış müttəfiqlik bəyannaməsi iki qonşu dövlət arasında siyasi, iqtisadi-ticari və humanitar məsələlərin daha da möhkəmlənməsinə xidmət edəcək.
Bununla yanaşı, səfər çərçivəsində dövlət başçıları Dağlıq Qarabağla əlaqədər 10 noyabr 2020-ci, 11 yanvar və 26 noyabr 2021-ci illərdə üç dövlət başçısı arasında əldə olunmuş razılaşmaların qeyd-şərtsiz icra olunması, Azərbaycan və Ermənistan respublikaları arasında kommunikasiya xətlərinin açılması, iqtisadi-siyasi münasibətlərin bərpa olunması və o cümlədən Zəngəzur dəhlizinin də işlək vəziyyətə gətirilməsi müzakirə edilib və yekdil razılıq əldə olunub. Azərbaycan dövləti üçün bu cür taleyüklü məsələlərin öz həllini tapmasını mən bir partiya sədri olaraq Azərbaycan diplomatiyasının növbəti uğuru hesab edirəm. Bundan nəinki Ermənistan mediası və poltoloqları, ümumiyyətlə Azərbaycan və Ermənistan arasında mövcud olmuş münaqişənin həllində maraqlı olmayan dövlətlərin də narahatlığını başa düşmək olar. Lakin bütün bu dedi-qodulara və narahatlıqlara baxmayaraq, Azərbaycan Prezidenti öz çevik və ardıcıl siyasətini davam etdirərək, Azərbaycan Respublikasının yerləşdiyi coğrafi məkanda öz ərazi bütövlüyünü və suveren hüquqlarını qorumaq istiqamətində lazım olan addımları atmalıdır. Ermənistanda bizim ölkə başçısının nüfuzunu görürlər. Bu baxımdan da qısqanclıqdan irəli gələn etiraflarını da etməyə məcburdurlar”.
Məhəmmədəli QƏRİBLİ
