Məlum olduğu kimi, Azərbaycan və Rusiya arasında müttəfiqlik qarşılıqlı fəaliyyəti haqqında Bəyannamə imzalanıb. Belə ki, 43 bəndlik bəyannamədə bir sıra önəmli məqamlar var.
Bəyannamənin 18-ci bəndində deyilir ki, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, transmilli mütəşəkkil cinayətkarlığa, silahların, narkotik vasitələrin və onların prekursorlarının qanunsuz dövriyyəsinə, insan alveri və informasiya-kommunikasiya texnologiyaları sahəsində cinayətlərə, eləcə də digər yeni təhlükəsizlik çağırışlarına qarşı mübarizədə və onların neytrallaşdırılmasında səylərini birləşdirirlər. Bu kontekstdə Tərəflər məlumat mübadilə edir və qeyd edilən hüquqazidd fəaliyyətlərin maliyyələşdirilməsi mənbələrinin müəyyən edilməsi və qarşısının alınmasında sıx qarşılıqlı fəaliyyət göstərirlər.
O da məlumdur ki, ara-sıra erməni separatçıların Rusiyaya səfərlər etməsi barədə məlumatlar yayılır. Hətta Rusiya rəsmiləri belə məlumatları təkzib belə etmirlər.
Maraqlıdır, bundan sonra bu kimi halların qarşısının alınmasında, separatçılar barədə informasiyaların verilməsində Rusiya Azərbaycana yardım edəcəkmi? Separatçıların saxlanılmasına maraq göstərəcəkmi?
“Bu baş verməyəcəksə, o zaman bu o deməkdir ki...”
Məsələyə münasibət bildirən politoloq Tural İsmayılov buna bir neçə prizmadan yanaşdı: “Moskva Bəyannaməsinin işlək olması üçün oradakı bütün bəndlərin yerinə yetirilməsi vacibdir. Azərbaycan onsuz da öz ərazisində Rusiya əleyhinə ekstremist fəaliyyət göstərən şəxslərin səfərlərinə, fəaliyyətinə, ölkə ərazisində hansısa toplantılarına şərait yaratmır. Ancaq bundan fərqli olaraq, Rusiya ilə bağlı bunu deyə bilmərik. Məsələ ondadır ki, bugünə qədər Araik Arutunyan, David Babayan və digər separatçılar dəfələrlə Moskvaya səfər edib. Hesab edirəm ki, bundan sonra Rusiya sözügedən amili nəzərə almalıdır. Çünki ortada imzalanan Bəyannamə var. Düşünürəm ki, Moskva Bəyannaməsinin daha da işlək olması üçün Rusiya razılaşmanın bütün bəndlərinə riayət etməlidir. O cümlədən, 18-ci bənddə nəzərdə tutulan bəndə əməl etməlidir. Yəni buna imkan verməməlidir. Bu günlərdə Araik Moskvada olub. Bundan sonra separatçılar o cür səfərlər edəcəksə, onlar saxlanılmalıdır. Bu baş verməyəcəksə, o zaman bu o deməkdir ki, Rusiya razılaşmanın bu bəndinə əməl etmək istəmir. Nəzərə almaq lazımdır ki, Azərbaycan Baş Prokurorluğu, Araik başda olmaqla, bir sıra separatçılar barədə cinayət işi açıb, onlar barədə axtarış elan edib. O baxımdan Rusiya hüquq-mühafizə orqanları Azərbaycanla əməkdaşlıq etməlidir. Edəcəkmi? Bu barədə indidən dəqiq proqnoz vermək çətindir. Ola bilsin ki, separatçıların Rusiyaya bundan sonra səfərləri olmasın. Hər halda, qarşıdakı dövrlərdə bütün bunları görəcəyik”.
Politoloq onu da əlavə etdi ki, sözügedən məsələdə Rusiya siyasi iradə ortaya qoymalıdır.
Vidadi ORDAHALLI
