Məlum olduğu kimi, Rusiya prezidenti Vladimir Putin qondarma Donetsk və Luqansk “Xalq Respublikaları”nın Rusiya tərəfindən tanınması barədə fərman imzalayıb. Bundan əlavə, Putin və Denis Puşilin Rusiya Federasiyası ilə qondarma Donetsk Xalq Respublikası (DXR) arasında dostluq, əməkdaşlıq və yardım haqqında saziş imzalayıblar.
Rusiya mətbuatı xəbər verir ki, Putin, eyni zamanda, Leonid Paseçniklə Kremldə Rusiya Federasiyası ilə qondarma Luqansk Xalq Respublikası (LXR) arasında dostluq, əməkdaşlıq və qarşılıqlı yardım haqqında saziş imzalayıb.
Putin DXR və LXR “rəhbər”lərini Rusiya ilə dostluq müqavilələrinin imzalanması münasibətilə təbrik edib.
Putinin bu fərmanından dərhal sonra ABŞ prezidenti Cozef Bayden Fransa prezidenti Emmanuel Makron və Almaniya kansleri Olaf Şoltsla telefon danışığı aparıb.
Ağ Evdən verilən məlumata görə, ABŞ müttəfiqləri və tərəfdaşları ilə Ukrayna ilə bağlı növbəti addımlarla əlaqədar məsləhətləşmələri davam etdirir. “Ukraynada iki separatçı ərazinin tanınması beynəlxalq hüququn, Ukraynanın ərazi bütövlüyünün və Minsk razılaşmalarının kobud şəkildə pozulmasıdır.
Avropa İttifaqı Şurasının prezidenti Şarl Mişel isə deyib ki, Avropa İttifaqı və onun tərəfdaşları Putinin qərarına qətiyyətlə cavab verəcəklər: “Biz prosesləri çox yaxından izləyirik. Ukraynadakı durumun tənzimlənməsinə dəstək verməyə tam hazırıq".
Azərbaycan Ukraynanın ərazi bütövlüyünü tanıdığını bəyan edib. Ermənistan isə hələ də Ukraynanın ərazi bütövlüyünü tanıdığını bəyan etməyib. Maraqlıdır, özü separatizmi yayan ölkə olaraq, Ermənistanın Ukraynanın ilhaq olunan əraziləri ilə bağlı mövqeyi necə olacaq?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, bu gün biz Donetskin və Luqanskın işğalından deyil, bütünlükdə Ukraynanın işğal olunma təhlükəsindən danışmalıyıq: “Rusiya açıq şəkildə məqsədini ortaya qoydu. Ukraynanı işğal edib, hakimiyyəti dəyişməyə çalışır ki, orada özünə sərf edən adamı hakimiyyətə gətirsin. Putin növbəti dəfə dünyaya meydan oxudu. Son günlər ərzində demokrarik dünyanın necə qorxaq və çəkingən olduğuna əminliyi yaranandan sonra bu gün dəhşətli hərbi əməliyyata start verdi. Ukraynaya ciddi kömək olmasa, onun Rusiya qarşısında duruş gətirməsi qeyri-mümkündür. Artıq kifayət qədər hərbi bazası sıradan çıxarılıb. Bu vəziyyətdə Ermənistan nə edə bilər? Artıq ikibaşlı oyun oynamaq qeyri-mümkündür. Ermənistan açıq şəkildə mövqeyini ortaya qoymalıdır. Ermənistanın müdafiə naziri artıq Moskvadadır. Görünür, KTMT-ni də hansısa formada proseslərə qoşmağa cəhdlər göstəriləcək. Ermənistan, ehtiyat edə-edə olsa da, Rusiyanı dəstəkləmək məcburiyyətində qalacaq. Həmin ölkə Rusiyanın bütün addımlarına haqq qazandırmalıdır. Çünki Ermənistan bugünə kimi hələ də Ukraynanın ərazi bütövlüyünü dəstəkləmir. Paşinyan əslində Qərbə daha meyllidi. Ora yaxınlaşmaq istəyir. Ancaq Rusiyadan çox qorxur, başa düşür ki, həmin ölkə ilə başqa cür rəftar eləmək qeyri-mümkündür. Bir daha sübut olundu ki, Azərbaycan hakimiyyəti Rusiya ilə bağlı necə düzgün siyasət yeridir. Populizmə meylli olanlar bunlardan nəticə çıxarmalıdır. Çox təhlükəli dövrə qədəm qoymuşuq. Atacağımız hər bir addım Azərbaycanı qorumağa xidmət etməlidir”.
Məhəmmədəli QƏRİBLİ
