Məlum olduğu kimi, fevralın 22-də Moskvada “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında” Bəyannamə imzalanıb. Sənədi Azərbaycan prezidenti İlham Əliyev və Rusiya Federasiyasının prezidenti Vladimir Putin imzalayıb.
Bəyannaməə iki ölkənin qarşılıqlı maraqlarını əks etdirən məqamlar öz əksini tapıb. Sənəddə belə bir məqam var: “Tərəflər yuxarıda qeyd olunan bəyanatların müddəalarından irəli gələn məsələlərin həllində qarşılıqlı fəaliyyət göstərəcək və region dövlətləri arasında uzunmüddətli sülhün yaradılması üzrə regional və beynəlxalq səviyyələrdə sıx əməkdaşlıq edəcəklər. Rusiya Federasiyası və Azərbaycan Respublikası öz ərazilərində təşkilatların və şəxslərin digər Tərəfin dövlət suverenliyinə, müstəqilliyinə və ərazi bütövlüyünə qarşı yönəlmiş fəaliyyətinin qarşısını qətiyyətli surətdə alırlar”.
Bu çox önəmli məqamdır. Çünki Rusiya televiziyalarında və digər media qurumlarında ermənipərəst jurnalistlər, siyasətçilər zaman-zaman Azərbaycan əleyhinə təbliğat aparırlar. O baxımdan Bəyannamədə məlum öhdəliyin öz əksini tapması bundan sonra Rusiyada Azərbaycana qarşı çağırışlar edən politoloqların, deputatların, ekspertlərin, erməni təşkilatlarının bu fəaliyyətinə son qoyulacaqmı?
“Bu o demək deyil ki, onların ölkəmizə qarşı kin püskürməsinin qarşısı dərhal alınacaq”
Məsələyə münasibət bildirən media eksperti Yadigar Məmmədli prinsipcə bunu istisna etmədi: “Rusiya ilə Azərbaycan arasında imzalanan Bəyannamədə 40-dan çox müddəa var. Əsas məqamlardan biri odur ki, hər iki ölkə Azərbaycanın suverenliyinə, müstəqilliyinə və ərazi bütövlüyünə söykənərək buna imza atıb. O cümlədən, ölkələrin daxili işlərinə kənar müdaxilələrin qarşısının alınması Bəyannamədə öz əksini tapıb. Hesab edirəm ki, bütün bunlar olduqca yerində olan məsələlərdir. Bəziləri bu razılaşmaya yuxarıdan aşağı baxır və bunu SSRİ-nin bərpası kimi dəyərləndirir. Hesab edirəm ki, belə yanaşmaların əsası yoxdur. Çünki Bəyannamədə bütün məsələlər aydın şəkildə öz əksini tapıb. O da məlumdur ki, Rusiya media məkanında ermənilərin maraqlarından çıxış edən bir sıra verilişlər var. Orada məhz ermənipərəst ekspertlərə xüsusi yer verilir. Bütün bunlar informasiya məkanında bizə qarşı təhdidləri özündə əks etdirir. Güman olunur ki, bundan sonra onların Azərbaycana qarşı fəaliyyəti məhdudlaşdırılacaq. Bəyannamədə məlum müddəanın öz əksini tapması qərəzli təbliğat kampaniyasının qarşısının alınmasında bizə əsas verəcək. Düzdür, bu o demək deyil ki, Solovyovun, Zatulinin və digərlərinin Azərbaycana qarşı kin püskürməsinin qarşısı dərhal alınacaq. Ancaq hər halda bizim əlimizdə əsas olacaq ki, iki ölkə arasında əldə olunan razılaşmanın prinsiplərindən çıxış edək. Nəticədə mərhələ-mərhələ qərəzli kampaniyanın qarşısı kəsiləcək”.
Bu baxımdan media eksperti hesab edir ki, müsbət gözləntilər var.
Vidadi ORDAHALLI
