Millət vəkili Etibar Əliyevin özünün sosial şəbəkə hesabında yazdığı bir status qalmaqala səbəb olub. Həmin paylaşımı olduğu kimi təqdim edirik:
“Facebookda 5000 dostum var. Əziz dostlarım! Mənim paylaşmalarıma kim münasibət bildirmək istəmirsə tərk etsin dostluğu. Bunu etməyən şəxsi vicdansız hesab edirəm. Yük olmaq lazım deyil. Mən təhsil və elm barədə ciddi paylaşmalar edəcəm. Dostluq üçün çoxsaylı müraciətlər var... Əks təqdirdə, inciməyin, özüm dostluqdan çıxaracam”.
Heç də birmənalı qarşılanmayan bu mövqe ilə bağlı deputatın fikirlərini təqdir edənlərin özləri də sosial şəbəkədəki dostların passivliyindən gileylənir. Yəni Etibar Əliyevin fikirlərinin bu hissəsilə razılaşanlar çoxdur. Ancaq onun bu cür mövqedə olanları vicdansız adalandırması ciddi tənqid edilən məqamdır. Biz deputatdan yaşananlara aydınlıq gətirməyi xahiş etdik. Etibar Əliyevin sözlərinə görə, o, facebooka gələndə məqsədi təhsil, həmçinin elm sahəsində yeniliklərlə bağlı bilgiləri paylaşmaq və elmi-nəzəri müzakirə mühiti yaratmaq olub: “Səhifəmi izləyənlər bunu yaxşı bilirlər. Mənim bu tələbim kimə uyğundursa onların dostuğumda qalmasına sevinirəm. Lakin bu mühiti bayağılaşdırmaq istəyən və müxtəlif bəhanələrlə qeyri-ciddi müzakirələrə üstünlük verməyə çalışanlar məhz bu yersiz şivəni qoparanlardır. Amma yenə də mənim üçün düşünən, öyrənmək istəyən, bilgilərini öyrətməyə çalışan insanların rəyi önəmlidir. Bu insanlara salam olsun deyirəm. Və bu mühiti korlamaq istəyənlər isə uzaqlaşmaqla özlərinə yaxşılıq etmiş olurlar. Bu məsələ mənim deputat fəaliyyətimlə bağlı məsələ deyil. İstənilən Azərbaycan vətəndaşı, xüsusilə də seçicilər məktub və görüşlər vasitəsilə istənilən şikayət, irad, tənqid və təkliflərini mənə göndərə bilərlər. Mən də gücüm çatan səviyyədə bu məsələlərin həllinə çalışıram və çalışacağam. Bir məsələni də qeyd edim ki, mən yazdığım statusda münasibət bildirməkdən bəhs edirəm. Hansısa nadan isə "bəyənmək" sözünü gündəmə gətirib ictimai rəyi çaşdırmağa çalışır. Münasibət müsbət də ola bilər, mənfi də. Və mənim özüm də bu rəylərdən faydalana bilərəm. Hər bir status üçün xeyli əziyyət çəkməli olursan və düşünürsən ki, bundan valideynlər, şagirdlər, tələbələr və ümumiyyətlə düşünən insanlar faydalanacaqlar. Bütün bunların hamısının mənim deputat fəaliyyətimə aidiyyəti yoxdur. Mən təklif etmişəm: kim özünü hədsiz savadlı hesab edirsə kənarda dura bilər və bununla başqalarına maneçilik törətməz. Necə ki, əvvələrdə bir çoxlarını məhz bu keyfityyətlərinə görə dostluqdan çıxarmışam. İş burasındadır ki, mən çıxaranda adamlar düşmənə çevrilirlər, ancaq özləri könüllü çıxanda ortada inciklik qalmır. Anlayanlar üçün məsələnin izahı bu qədər bəsit. Anlamayanlara Allah kömək olsun!”
Samir Adıgözəlli: “Bütün bunlara rəğmən, Etibar Əliyev gərək vicdansız sözünü işlətməyəydi”
Aktiv sosial şəbəkə istifadəçisi olan İctimai Siyasi Proseslər Beynəlxalq Əlaqələr Mərkəzinin (İSBAM) sədri Samir Adıgözəlli bu məsələdə Etibar Əliyevlə bir qədər razılaşmır: “Etibar Əliyev deputatdır. Onun ictimai statusuna görə dostluq təklifi göndərənlər çox ola bilər. Bu səbəbdən də 5000-lik dostluq limiti tez dolub. Bir çox tanınmış adamlarda belə hallar yaşanır. Bu halda Facebook-un səhifə xidmətindən istifadə etmək olar. Məndə olan məlumata görə, Etibar Əliyevin artıq belə səhifəsi var. Orada dostluq limiti yoxdur. Yəni vəziyyətdən çıxış yolu var. Dostluqda olanların passivliyi ilə bağlı səslənən tənqidlə mən də razıyam. Adam var ki, hər şeyi izləyir, amma heç səsi belə çıxmır. Adam bəyənmədiyi fikrə də tənqidi rəy yaza bilər. Çoxları isə dostluqda kimlərinsə paylaşımını güdüb, şəklini çəkib haralarasa göndərmək üçün qalır. Bütün bunlara rəğmən, Etibar Əliyev gərək vicdansız sözünü işlətməyəydi. Bunu daha yumşaq formada ifadə etmək olardı”.
Məhəmmədəli QƏRİBLİ
