Rusiyanın xarici işlər naziri Sergey Lavrov deyib ki, rəsmi Moskva sərhədlərin demarkasiya məsələsində Azərbaycan və Ermənistana yardım etməyə hazırdır.
S.Lavrov, həmçinin, Zəngəzurdakı vəziyyətə də toxunub. O qeyd edib ki, emosiyaların qızışdırılmasına ehtiyac yoxdur: “Orada heç bir atəş açılmayıb, heç bir qarşıdurma baş verməyib. Oturdular, sakitcə bu vəziyyəti necə həll edəcəkləri barədə danışıqlara başladılar. Bizdən kömək istədilər, hərbçilərimiz kömək göstərdilər, razılaşma əldə edildi. Müntəzəm olmayan, lakin rahatlıqla tənzimlənən bu məsələdə emosiyaları qızışdırmaq üçün bir səbəb görmürəm”.
Nazir, eyni zamanda, bildirib ki, Rusiya sərhədlərin delimitasiyası və demarkasiyasında Azərbaycan və Ermənistana yardım etməyə hazırdır: “Biz tərəflərə delimitasiya və demarkasiya işlərinə başlamağı təklif etmişik. Biz kartoqrafiya materialları və məsləhətləşmə xidmətləri təqdim etməklə onlara yardım etməyə hazırıq”.
Bütün hallarda, sözügedən məsələ ilə bağlı Rusiyanın vasitəçiliyi nə vəd edir? Bu qəbul olunsa, gələcəkdə nə baş verə bilər?
“Ermənistan çalışır ki, sərhəddə hərbi gərginlik olsun və bu, seçkidə Paşinyanın xeyrinə işləsin”
Məsələyə münasibət bildirən Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlunun fikrincə, indiki şəraitdə sərhədlərin delimitasiyası ilə bağlı Rusiyanın vasitəçiliyini qəbul etmək məqsədəuyğun olardı: “Məsələ ondadır ki, Rusiya çalışır öz sülhməramlı imicini qorusun. Ancaq Ermənistan Fransa və ABŞ-la birlikdə istəyir ki, Rusiyaya qarşı təxribat törətsinlər. Nəzərə almaq lazımdır ki, son vaxtlar Qərbin İrana da qarşı münasibətində yeni elementlər ortaya çıxır. Azərbaycan Ermənistandan fərqli olaraq, müstəqil dövlətdir. Azərbaycan kiminsə sözü ilə qonşu ölkənin ərazisinə müdaxilə etmir. Ona görə Qərb istəyir ki, Ermənistanı neqativ məqsədlər üçün əlində saxlasın. O üzdən, hazırda bizim cəmiyyət Rusiyanın bəyanatlarına ciddi diqqət yetirməlidir. Çünki rəsmi Moskva verdiyi bəyanatlarla 10 noyabr və 11 yanvar razılaşmalarına sadiq olduğunu göstərir. Bu razılaşmaları qorumağa çalışır. Baxın, Paşinyan hərbi yardımla bağlı Putinə müraciət etdi, amma alınmadı. KTMT-yə müraciət edib, amma qurumun ortada qərarı yoxdur. Qərar olsa da, bu, tərəfləri sülhə çağırışla bağlı olacaq. Çünki Rusiya başa düşür ki, son oyunlar Rusiyanın sülhməramlı missiyasının əleyhinə yönəlib. Ermənistan isə çalışır ki, sərhəddə hərbi gərginlik olsun və bu, seçkidə Paşinyanın xeyrinə işləsin. Çünki Paşinyan bundan istifadə edib ölkədə hərbi vəziyyət elan edəcək və beləliklə seçki prosesi dayanacaq. Ona görə də yeni gərginlik Azərbaycanın və Rusiyanın maraqlarına uyğun deyil”.
Politoloq onu da qeyd etdi ki, Azərbaycan son dərəcə ayıq-sayıq olmalıdır.
Vidadi ORDAHALLI
