“Biz Şuşaya həmişəlik qayıtmışıq” nə deməkdir...
“Bundan sonra biz Şuşada əbədi yaşayacağıq”. Məlum olduğu kimi, bunu Prezident İlham Əliyev bu günlərdə Şuşada keçirilən “Xarıbülbül” festivalının açılışında deyib.
Ölkə başçısının sözlərinə görə, biz Şuşaya həmişəlik qayıtmışıq: “Mən dünyada Şuşaya bənzər şəhər görməmişəm, bəlkə də yoxdur. Bu gün biz uzun fasilədən sonra azad Şuşada yığışmışıq. Bu gün Cıdır düzündə Azərbaycan muğamı səslənəcək. Uzun fasilədən sonra biz Şuşada bu gözəl musiqi bayramını qeyd edəcəyik. Bu gün, sözün əsl mənasında, musiqi bayramıdır. Bəli, biz 8 noyabrda Şuşaya döyüşərək, vuruşaraq, qan tökərək qayıtmışıq. Ancaq bu gün Azərbaycan mədəniyyəti, Azərbaycan mədəniyyətinin görkəmli nümayəndələri Şuşaya qayıdıblar və bu qayıdış reallıqdır, bu reallıqla hər kəs hesablaşmalıdır. Bundan sonra biz Şuşada əbədi yaşayacağıq və Şuşanın bərpa edilməsi artıq başlanmışdır. Verilən göstərişlər yerinə yetirilir”.
Bütün bu deyilənlərlə yanaşı, Prezidentin “Biz Şuşaya həmişəlik qayıtmışıq” sözlərinin anlamı nədir?
- “Şuşada möhkəmlənməyimiz məcburi köçkünlərin Xocalıya, Xankəndiyə və digər yaşayış məntəqələrinə qayıdışını reallaşdıracaq”
Məsələyə münasibət bildirən şərqşünas Seyid Camal Əzimbəylinin sözlərinə görə, Prezidentin məlum fikirləri çox böyük anlam ifadə edir: “Əvvəla Prezident İlham Əliyevin ortaya qoyduğu siyasi iradə və qətiyyəti, ordumuzun rəşadəti sayəsində ərazilərimiz işğaldan azad edildi. Qarabağın tacı olan Şuşa azadlığa qovuşdu. Prezident məlum fikirləri səsləndirməklə dünyaya, ermənilərə və onları himayə edənlərə mesajlar verdi. Bu o deməkdir ki, bir daha ərazilərimiz işğal olunmayacaq. Heç vaxt Dağlıq Qarabağa hansısa xüsusi statusun verilməsindən söhbət getməyəcək. Nə mənfur ermənilər, nə də onların himayədarları Şuşa şəhərini danışıqların predmetinə çevirə bilməyəcəklər. Şəhər tam bərpa edildikdən sonra əhali öz evlərinə qayıdacaq. Şuşada möhkəmlənməyimiz məcburi köçkünlərin Xocalıya, Xankəndiyə və digər yaşayış məntəqələrinə qayıdışını reallaşdıracaq. Ümumilikdə, reinteqrasiya prosesinə ciddi təkan verəcək. Hansı erməni ki, Azərbaycanın qanunlarını qəbul edir, onlar Qarabağda yaşayacaq, qəbul etməyənlər isə oranı tərk edəcəklər. Əminəm ki, Azərbaycan qarşısına qoyduğu məqsədlərə çatacaq. Kimlərsə bizim öz məqsədimizə çatmağımıza mane ola bilməyəcək. İşğaldan azad olunan ərazilərdə aparılan bərpa və quruculuq işləri bir daha bunu deməyə əsas verir. Ona görə də hesab edirəm ki, Azərbaycan qarşıya qoyduğu strateji hədəflərə çatacaq”.
Şərqşünas hesab edir ki, Azərbaycan regionun ən aparıcı dövlətidir.
Vidadi ORDAHALLI
