Ramil Məmmədli: “Biz uzun illərdir bununla bağlı beynəlxalq təşkilatlara məlumatlar veririk”
İşğaldan azad edilmiş Suqovuşan yüksəkliklərində yol infrastrukturu işləri və yeni kommunikasiya xətlərinin çəkilməsi üçün ərazini minalardan təmizləyən Azərbaycan Silahlı Qüvvələrinin mühəndis bölmələri bir vaxtlar Ermənistan Silahlı Qüvvələrinin işğalçı kontingentinə məxsus saxlanc yerini aşkarlayıb.
Bildirilir ki, piyada əleyhinə minalanmış ərazidə basdırılmış iki plastik çəlləkdə avtomat tüfənglər, pulemyot, qumbaraatan, süngü bıçaq, ərzaq məhsulları, siqaretlər, səssiz atəş cihazları, rabitə və optik müşahidə cihazları, GPS naviqatoru, zirehli jilet, siqnal tapançası, döyüş sursatları, həmçinin sadalanan silahlar üçün daraqlar və müxtəlif məqsədli patron qutuları aşkarlanıb.
Kamuflyaj toru ilə örtülmüş anbarda olan çəlləklərin birində ASALA terror təşkilatının bayrağı və müəyyən miqdarda psixotrop həblər də tapılıb.
Faktla əlaqədar istintaq başladılıb və tapıntılar ekspertizaya göndərilib.
Bu fakt erməni ordusunun beynəlxalq terroçularla işbirliyində olduğuna daha bir sübut sayıla bilərmi?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, hər iki Qarabağ müharibəsində Ermənistan silahlı qüvvələrinin tərkibində xaricdən gətirilən muzdlu və terrorçuların iştirak etdiyinə dair təkzibolunmaz faktlar mövcuddur. Biz bununla birinci Qarabağ savaşı ilə bağlı aparılan istintaq materiallarından da tanışıq. Bütün bunlara baxmayaraq, Ermənistan 44 günlük müharibə dönəmində də muzdlu terrorçulardan istifadə etdi. Beləliklə, qanlı terrorlarda əli olan ASALA kimi bir təşkilatın da 44 günlük müharibədə iştirakı konkret dəlillərlə sübuta yetir. Hətta əsir götürülənlərin arasında da belə yaraqlıların olduğunu gördük. Bütün bunlar Ermənistanın hansı formatda ölkə olmasından xəbər verir. Bəlli olur ki, həmin ölkə terrorçular tərəfindən idarə edilir. Bu gün də Ermənistanda baş verən proseslər təsdiqləyir ki, həm ASALA-ya, həm də Daşnaqsütyuna aid olan şəxslərin həmin ölkəyə ciddi təsir imkanları var. Hazırda Ermənistanda bu terror təşkilatın nümayəndələrinin siyasətlə məşğul olmasını heç ermənilərin özləri də gizlətmir. Birinci Qarabağ müharibəsində Monte Melkonyan kimi məşhur terrorçunun Ermənistan ordusunda vəzifə alması və həmin ölkənin qəhrəmanı kimi təqdim edilməsi heç kimə sirr deyil. Ermənistanda belə adamlara hətta heykəl də qoyurlar. Biz uzun illərdir bununla bağlı beynəlxalq təşkilatlara məlumatlar veririk. Təəssüf ki, bununla bağlı əlaqədar qurumalar heç bir tədbir görmür. Aşkarlanan yeni fakt bir daha sübut etdi ki, Ermənistan məhz öz terrorçu mahiyyətini gizlətmək üçün bizim orduda güya terrorçuların vuruşduğunu iddia edirdi”.
Məhəmmədəli QƏRİBLİ
