Sabiq prezident Petrosyan Ermənistanın fəlakətləri barədə yeni məqalə yazır...

Fikrət Sadıqov: “Problem ondadır ki, Ermənistanda sağlam və mötədil düşüncəli siyasətçilərin sayı çox azdır”

img

Ermənistanın birinci prezidenti Levon Ter-Petrosyan son 23 ildə ölkədəki prosesləri təhlil edərək uğradıqları məğlubiyyətin səbəblərini açıqlayıb.

Ter-Petrosyan hesab edir ki, məğlubiyyətin təməli 1998-ci ildə, status-kvonun qorunub saxlanmasının mümkünlüyü və "bir qarış torpaq verməmək" prinsipinə yalan inamla qoyuldu: “Biz son 23 ildə yürüdülən avantürist və məsuliyyətsiz siyasət nəticəsində məğlub olduq. Məğlubiyyətin sonunu Nikol Paşinyan “Artsax” (Qarabağ) Ermənistandır və nöqtə” təxribat xarakterli bəyanatı ilə elan etdi. Bu, Ermənistanın, Qarabağın sonu idi. 23 il ərzində bizim hakimiyyətlər realist siyasətin ən vacib üç amilini nəzərə almadılar: güclər nisbəti, müttəfiqlərin varlığı və ya olmaması. Ən əsası zamanın geridönməzliyi. Həqiqət budur ki, bu gün bir şey mümkündürsə, sabah mümkün olmayacaq. Bu, səlahiyyətlilərimizin anlamadıqları çox sadə bir məqamdır - siyasətin əlifbasıdır”.

Sabiq prezident onu da qeyd edib ki, başqa sözlə, 23 ildə erməni hakimiyyətləri qumar oyunçuları kimi davrandılar: “Yeni mərclər qoymaqla daha çox qazanmağa çalışır və buna görə qazandıqlarını itirirlər. Təfərrüatlarına varmaq istəmirəm, çünki bu problemə həsr olunmuş geniş bir məqalə hazırlamaq niyyətindəyəm”.

O da məlumdur ki, Levon Ter-Petrosyan 1998-ci ildə istefaya məcbur edilib prezidentlikdən gedəndən sonra da zaman-zaman güzəştə getməyin vacib olduğunu bəyan edib. Ancaq hər dəfə Ermənistanda hakimiyyətdə olan qüvvələr bundan yayınıblar. Nəinki “Qarabağ klanı”nı təmsil edən Köçəryan-Sarkisyan cütlüyü, hətta “məxməri inqilab”dan sonra baş nazir olan Nikol Paşinyan da deyirdi ki, bir qarış da torpaq verilməyəcək. Bütün bunlar işğalçı Ermənistanın uçuruma yuvarlanmasını qaçılmaz etdi.

  • “Zamanında bunu etsəydilər, indiki rəzil duruma düşməzdilər”

Sözügedən məsələ ilə bağlı fikirlərini “Bakı-Xəbər”lə bölüşən keçmiş diplomat, politoloq Fikrət Sadıqovun fikrincə, Ter-Petrosyanın məlum dəyərləndirməsi reallığı əks etdirir: “Çünki Ter-Petrosyan o zaman bəyan etmişdi ki, ərazilərin müəyyən qismi ilkin mərhələdə qaytarılmalı və məsələ sülh yolu ilə həll edilməlidir. O, xüsusi olaraq, qeyd edirdi ki, biz indi güclü tərəfik. Sabah vəziyyət dəyişəcək və o zaman Ermənistan üçün çətin olacaq. Ancaq o zaman hakimiyyətdə olan Qarabağ əsilli ermənilər, hətta Ter-Petrosyana yaxın olan bəzi şəxslər buna qarşı çıxdılar. O zaman Robert Köçəryan baş nazir, Serj Sarkisyan daxili işlər naziri, Vazgen Sarkisyan isə müdafiə naziri idi. Hər üçü ərazilərimizin işğal olunmasında vacib rol oynayıblar. Adıçəkilən quldurlar birləşərək Ter-Petrosyan istefaya məcbur etdilər. Ondan sonra gedən bütün danışıqlar nəticəsiz oldu. Ancaq zaman Ermənistanın ziyanına işləməyə başladı. Nəticə məlumdur. Ümumiyyətlə, problem ondadır ki, Ermənistanda sağlam və mötədil düşüncəli siyasətçilərin sayı çox azdır. Bəlkə də belələri çox olsaydı, proseslər bu qədər uzanmazdı. Ermənistan işğalçılıq ambisiyaları üzündən çox şey itirdi. Hansı ki, “Mərhələli həll” variantına razı olsaydılar, bu, onların da xeyrinə olacaqdı. Zamanında bunu etsəydilər, indiki rəzil duruma düşməzdilər”.

Politoloq onu da qeyd etdi ki, bir də Ermənistanın əlinə o cür fürsət düşməz.

Vidadi ORDAHALLI

Son xəbərlər