Ermənistan müxalifəti, xüsusilə də müxalifətin revanşist radikal qanadı sərhədlərin demarkasiyası və delimitasiyası ilə bağlı spekulyasiyalarla məşğuldur. Sərhəddəki son proseslərlə bağlı iddia edirlər ki, guya 10 noyabr və 11 yanvar tarixlərində gizli sənədlər imzalanıb.
Ermənistanda radikal müxalif qüvvələrin birləşdiyi “Vətənin Xilası Hərəkatı” Şurası məlum proseslərlə bağlı açıqlama yayıb. Açıqlamada deyilir ki, guya bir neçə gündür Sünik və Geğarkunik bölgələrindəki strateji əhəmiyyətə malik ərazilər Azərbaycan Ordusunun işğalı altındadır: “Ermənistan hakimiyyəti nəinki düşmən tərəfindən ərazilərimizi ələ keçirməyi dayandırmaq iqtidarında deyil, eyni zamanda, bu əraziləri Azərbaycan Silahlı Qüvvələrindən azad edə bilməyib. Bütün bunlar 10 noyabr 2020-ci ildə imzalanan təslimçi razılaşmanın davamıdır. Təslimetmə aktının imzalanmasından və qüvvəyə mindikdən dərhal sonra Ermənistan hakimiyyəti bizim üçün bu qəbuledilməz sənədi belə pozaraq yeni ərazilərdən imtina etməyə davam etdi. Daha sonra Ermənistanla Azərbaycan arasında gizli sənədlərin imzalandığı və bunun 2020-ci ilin dekabrında təsadüfən ifşa olunduğu ortaya çıxdı. İndi etibarlı məlumata görə, 11 yanvar 2021-ci ildə imzalanmış digər bu cür sənədlər də var. Mayın 12-də Azərbaycanın Silahlı Qüvvələri sərhədləri pozdu. Ancaq Ermənistan səlahiyyətlilərindən mütənasib bir cavab yoxdur. Əgər ordu Ermənistan Respublikasının ərazi bütövlüyünü düşmənin təcavüzündən qorumaq məsuliyyətini öz üzərinə götürmürsə, o zaman xalqın müdafiəsini öz üzərlərinə götürməsi üçün milis cəlbetmə prosesinə başlamaq məcburiyyətindəyik”.
Göründüyü kimi, Ermənistanın radikal müxalifəti hər vasitə ilə belə bir rəy yaratmağa çalışır ki, guya ortada hansısa gizli sənəd var.
“Hakimiyyətə gəlmək və Paşinyanı devirmək üçün bu yalanı gündəmə gətirirlər”
Məsələyə münasibət bildirən hərbi ekspert İbrahim Rüstəmlinin sözlərinə görə, deyilənlərin heç bir əsası yoxdur: “Bu, Ermənistanda radikal və revanşist qüvvələrin uydurmasıdır. Özü də bu yeni deyil. Yeri gəldi-gəlmədi, bəyan edirlər ki, guya ortada gizli sənəd var. Əslində, radikallar hakimiyyətə gəlmək və Paşinyanı devirmək üçün bu yalanı gündəmə gətirirlər. Onlar da yaxşı bilirlər ki, belə bir şey yoxdur. Söhbət ondan gedir ki, Azərbaycan hələ SSRİ dövründə Ermənistanla müəyyən olunan sərhədlərini bərpa edir. Çünki Azərbaycan müstəqillik əldə etdikdən sonra Ermənistan ərazilərimizi işğal etdi. Nəticədə sərhədlərin demarkasiyası baş tutmadı. Vətən müharibəsindən sonra vəziyyət dəyişdi. Sadəcə, Ermənistanda seçkilər yaxınlaşdığı üçün oradakı müəyyən qüvvələr bundan siyasi məqsədləri üçün istifadə edirlər”.
Hərbi ekspert hesab edir ki, Ermənistandakı radikalların ortaya atdıqları gizli sənəd söhbəti boş və mənasız iddiadır.
Vidadi ORDAHALLI
