Amerikadakı erməni diasporunun fəaliyyətinin koordinasiyası ilə məşğul olan Amerika Erməniləri Milli Komitəsinin yaydığı son bəyanatda diqqətçəkən məqamlar var.
AEMK bildirir ki, ABŞ Senatının və Nümayəndələr Palatasının yüz nəfərdən çox üzvünün imzaladığı məktuba ABŞ Dövlət Departamentindən verilən cavab erməniləri son dərəcə məyus edib. Bəyanatda qeyd edilir ki, Amerika erməniləri 100 milyon dollar istədiyi halda, onlara cəmi 5 milyon dollar verilib: “Dövlət Departamentindən gələn məktubda ermənilərin bir sıra istəklərinə heç bir önəm verilməyib. Ermənistana və “Artsax”a təcili şəkildə 100 milyon dollarlıq yardım gərəkdir. Cəmi 5 milyon dollar vermisiniz”.
Ancaq o da var ki, biz Azərbaycan olaraq, ermənilər 100 milyon istəyirdi deyə onlara 5 milyon dollar verilməsinə sevinə bilmərik. Ona görə ki, söhbət bu yardımın məbləğində yox, prinsipcə səhv olmağındadır. Çünki Ermənistan təcavüzkar ölkədir. Başqa bir ölkənin ərazisini işğal edən dövlətə, ümumiyyətlə, yardım etmək doğru deyil. Başqa bir tərəfdən, ermənilərin "Artsax" adlandırdıqları ərazi Azərbaycanın tərkib hissəsidir. Belə olan halda, Azərbaycandan xəbərsiz ora heç 1 manat da ayırmaq olmaz. Ancaq biz görürük ki, postsovet məkanındakı digər separatçı qurumların heç birinə ABŞ hansısa yardım etmədiyi halda, Qarabağdakı erməni separatçılarına istisna olaraq yardım ayırır. Bu dərəcədə ədalətsiz və fərqli yanaşma ortadadır. O baxımdan bunu ekspertlər necə dəyərləndirirlər?
“Bu, həmçinin, separatizmə dəstək və ermənilərin ölkəmizə qarşı fəaliyyətinə yaşıl işıq yandırmaqdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, ABŞ-ın bu siyasəti Azərbaycanın suverenliyinə hörmətsizlikdir: “ABŞ Konqresində ermənipərəst konqresmənlərin fəaliyyəti nəticəsində Qarabağ ermənilərinə 5 milyon dolların ayrılması, ilk növbədə, Azərbaycanın suverenliyinə qarşı hörmətsizlikdir. Bu, həmçinin, separatizmə dəstək və ermənilərin Azərbaycana qarşı fəaliyyətinə yaşıl işıq yandırmaqdır. ABŞ Abxaziya, Cənubi Osetiya, Dnestryanı separatçılara necə maliyyə yardımı ayırmırsa, Qarabağ separatçılarına da bu cür yanaşmalıdır. Ancaq biz bunun illərdir əksini görürük. Bu, faktiki olaraq, ikili standartlardan çıxış etməkdir. Azərbaycan konkret olaraq ABŞ-la bu məsəlini danışmalı və bu kimi halların yolverilməz olduğunu bildirməlidir. İlk növbədə, sözügedən məsələ Azərbaycanla razılaşdırılmalıdır. Hesab edirəm ki, ABŞ Konqresinin separatçılara maliyyə yardımı heç də humanitar məqsədlər üçün deyil. Həmin qərar bu və ya digər dərəcədə separatizmin inkişafına xidmət edir. Əslində, beynəlxalq hüquqa uyğun olaraq, oradakı separatçılara sanksiyalar tətbiq edilməli və onların Azərbaycana reinteqrasiyasına dəstək verilməlidir. Təəssüf ki, Konqresin bu qərarı ABŞ-in regionda maraqlarına zərbə vurur. Demək olar ki, Rusiya, ABŞ və Fransa erməni separatçılarını müdafiə edirlər. Azərbaycan öz ərazilərini işğaldan azad etməklə prosesə zərbə vurub”.
Politoloq onu da qeyd etdi ki, onsuz da orada ermənilərin bu fəaliyyətinin qarşısı alınacaq.
Vidadi ORDAHALLI
