Məlum olduğu kimi, Azərbaycan-Ermənistan sərhədində demarkasiya və delimitasiya tədbirləri həyata keçirilir. Tam qanuni əsaslarla həyata keçirilən bu prosesdə isə Ermənistan yenidən çığallıq edir.
Azərbaycanın güya onun ərazisinə hərbi müdaxilə etdiyinə dair rəy formalaşdırmağa çalışır, hətta bununla bağlı KTMT-yə müraciət də edib. KTMT-dən qeyd edilib ki, Ermənistanın qurumdakı daimi və səlahiyyətli nümayəndəsi Viktor Biyaqov 13 mayda KTMT Daimi Şurasının iclası zamanı hadisə barədə məlumat verib. Ancaq görünən budur ki, Ermənistanın bu cəhdi də uğursuz alınıb.
Azərbaycanın xarici işlər naziri Ceyhun Bayramovun KTMT-yə dönəm sədrliyini həyata keçirən tacikistanlı həmkarı Sirociddin Muhriddin ilə telefon danışığı baş tutub. Nazir Ceyhun Bayramov Azərbaycan-Ermənistan sərhədində baş vermiş gərginliklə bağlı həmkarına məlumat verərək, Azərbaycan sərhəd qüvvələrinin ölkəmizə aid mövqelərdə yerləşdiyini və bu prosesin adi rejimdə və sistematik qaydada icra edildiyini qeyd edib. Azərbaycanın ərazi bütövlüyü çərçivəsində həyata keçirilən sərhəd mühafizə sisteminin gücləndirilməsi tədbirləri ilə bağlı bundan öncə də bəzi narazılıqların olduğu, lakin onların üçtərəfli bəyanatı imzalayan tərəflərin iştirakı ilə danışıqlar yolu ilə həll edildiyi qarşı tərəfin diqqətinə çatdırılıb.
Sərhəddəki son gərginliklə bağlı AR Dövlət Sərhəd Xidməti rəhbərliyinin dərhal bölgəyə ezam edildiyi və qarşı tərəfin sərhədçiləri ilə danışıqların aparıldığı bildirilib. Nazir Ceyhun Bayramov Ermənistanın bu məsələ ilə bağlı Kollektiv Təhlükəsizlik Müqaviləsi Təşkilatına müraciətinin heç bir əsasının olmadığını və bunun Ermənistan rəhbər dairələri tərəfindən məsələni siyasiləşdirmək cəhdindən başqa bir şey olmadığını KTMT-ya hazırda sədrlik edən Tacikistanın xarici işlər nazirinin diqqətinə çatdırıb. Nazir Ceyhun Bayramov bu kimi gərginliklərin siyasi və danışıqlar yolu ilə həll edilməli olduğunu vurğulayıb.
Bununla demək olarmı ki, Ermənistanın KTMT-ni növbəti dəfə prosesə qoşmaq cəhdi uğursuzluğa düçar oldu?
Aydın Quliyev: “Ermənistan Azərbaycanla münasibətləri KTMT-nin daxili təhlükəsizlik işinə çevirmək planından əl çəkməyib və çəkməyəcək...”
“Bakı-Xəbər” qəzetinin baş redaktoru, siyasi şərhçi Aydın Quliyevin sözlərinə görə, Laçının Qaragöl qoruğu ətrafında yaşanan gərginlikdən hələlik çıxarmalı olduğumuz iki mühüm nəticə var: “Əvvəla, 2020-ci il iyulun 12-də Ermənistan Tovuzda törətdiyi təxribatdan sonra Azərbaycanla qarşıdurmaya KTMT-ni cəlb etmək cəhdinin yeni mərhələsinə başlayıb. O zaman da KTMT-ni münaqişəyə qatmaq üçün əllərindən gələni etdilər. İndi isə Paşinyanın Putinə məktub göndərməsi, zəng etməsi, guya Putinin dediyi "Azərbaycan əvvəlki mövqelərə qayıtmalıdır" sözlərinin geniş tirajlanması, Ayvazyanın KTMT XİN başçıları Şurasinin sədri və Tacikistanın XİN başçısına zəngi, KTMT sədri və Tacikistan prezidentinin guya məsələni müzakirəyə çıxaracağı ilə bağlı vədi, habelə Ayvazyanın KTMT baş katibi Zasla söhbətlərinin bir mənası var. Ermənistan Azərbaycanla münasibətləri KTMT-nin daxili təhlükəsizlik işinə çevirmək planından əl çəkməyib və çəkməyəcək...
İkinci, sülhməramlıların Qarabağdan mütləq gedəcəyi ictimai şüurda bərkidikcə , Ernənistanla Azərbaycan arasında şərti olaraq Dağlıq Qarabağ deyilən ərazidən kənar yeni münaqişə ocağı yaradılmasına hazırlıq gedir... Hadisələrin Lavrovun bölgəyə gəlib-getməsindən sonra başlaması təsadüf olmaya bilər. Kimsə ona adi bir göl məsələsi kimi baxmasın...”
Fazil Mustafa: “Ermənistanın KTMT hay-küyü özünün daxili auditoriyasına hesablanıb”
Millət vəkili Fazil Mustafa “Bakı-Xəbər”ə açıqlamasında bildirdi ki, iki ölkənin sərhədində aparılan işlər Rusiya ilə koordinasiyalı şəkildə baş tutur: “Ermənistan da götürüb Rusiyaya şikayət edir ki, güya Azərbaycan onun ərazisinə doğru irəlilədiyi üçün hərbi yardıma ehtiyacı var. Rusiya da vəziyyəti dəqiq bildiyinə görə heç səsini çıxarmır. Mövqe belədir ki, SSRİ dönəmindəki sərhəd xətti bərpa edilməlidir. Bu baxımdan da Ermənistanın KTMT hay-küyü özünün daxili auditoriyasına hesablanıb. Reallıqda Azərbaycan heç bir müqavilənin bəndlərini pozmur”.
Millət vəkilinin sözlərinə görə, bəzi radikal dairələrin bu məsələ ilə bağlı tutduğu mövqe bizim xeyrimizə işləmir: “Bir çoxlarını prosesin bizim qələbəmizlə yekunlaşması qane etmir. İndi cılız arqumentlər irəli sürürlər. Məsələn, Şuşaya niyə əhali köçmür, Xankəndidə niyə bayrağımız dalğalanmır? Bunların hamısı tədricən ola bilər. Bunu biz də istəyirik. Adama deyərlər ki, gəl bayrağı verirəm sənə, apar Xankəndidə dalğalandır, görüm necə edirsən? Dünyanın reallıqlarını dərk etmək lazımdır. Bunlar elə bilirlər ki, Məkkə və ya Konstantinopol birdən-birə fəth edilib. Tarixi və dini oxumurlar. Bunların hamısı tarixi analogiya tələb edir. Biz tam olaraq Qarabağı bir günə Azərbaycana tabe edəcək nəticəyə sahib deyilik. Bu baxımdan da qızışdırıcı mövqe tuturlar ki, sonra hansısa uğursuzluğu tənqid edə bilsinlər. Bizim sərhəd qoşunlarının hazırlığı və həmin prosesdəki təmkinli davranışı məni çox sevindirir. Yeni situasiyaya uyğun olaraq, yeni üslubdan istifadə etməliyik. Sərhədlərin müəyyənləşməsində belə hallar olacaq. Əsəb mübarizəsidir. Bu sahədə olan uğurları da bir qədər fərqli formada təqdim etməliyik. Hər hansı irəliləyiş varsa belə, onu saxlayıb sonra təqdim etmək olar”.
Məhəmmədəli QƏRİBLİ
