Həm daxili siyasətdə, həm də müharibədə məğlub Sarkisyanın məsləhətləri kimə gərək ola bilər...

Əli Orucov: “Məğlub Sarkisyanın məsləhəti Ermənistanda kiməsə lazım deyil”

img

Ermənistanın keçmiş prezidenti, müxalif Respublika Partiyasının sədri Serj Sarkisyan növbədənkənar parlament seçkilərində iştirak etməyəcək.

Bununla belə, Sarkisyan yerli mediaya açıqlamasında bəyan edib ki, o, seçkilərdə məsləhətçi kimi öz təkliflərini verəcək: “Mən bildirdim ki, yüksək dövlət postuna daha iddia etmirəm. Adım seçkiqabağı siyahıda olmayacaq. Ancaq seçki siyahısında olmamaq seçkilərə qatılmamaq demək deyil. Niyə siyahıda deyiləm, daha doğrusu, niyə siyahının başında deyiləm? Çünki politologiya bu barədə elementar bir həqiqəti deyir: seçki siyahılarına rəhbərlik edənlər yüksək dövlət vəzifələrinə müraciət edirlər. Mən artıq yüksək dövlət vəzifələrində çalışmayacağımı bildirmişdim. Mən öz məsləhətlərimlə kömək edəcəm. Hesab edirəm ki, Ermənistana və erməni xalqına yüksək dövlət postunda xidmətim qurtardı”.

O da məlumdur ki, 2016-cı ilin Aprel döyüşlərində Azərbaycanın əldə etdiyi uğurlar Serj Sarkisyanın siyasi fiaskosunu sürətləndirdi. Məlum oldu ki, Ermənistan ordusunun “məğlubedilməzliyi” barədə yaradılan mif sabun köpüyü imiş. Nəticədə 2018-ci ildə Ermənistanda Sarkisyan hakimiyyəti devrildi və o, biabırçı formada siyasi arenadan getdi. Eyni zamanda, “Qarabağ klanı”nın 20 illik hakimiyyətinə son qoyuldu. Daha sonra 2020-ci ilin payızında baş verən 44 günlük Vətən müharibəsi nəticəsində ərazilərimiz işğaldan azad edildi. Həmin dövrdə Sarkisyan bir neçə dəfə Qarabağa gəlib işğalçı orduya öz “məsləhətlərini” versə də, bu, Ermənistan ordusunun məğlubiyyətini önləyə bilmədi. Hansı ki, Sarkisyan müxtəlif vasitələrlə bununla bağlı çox çalışdı.

Belə olan halda, maraqlıdır, həm daxildə, həm də Azərbaycanla müharibədə məğlub olmuş birisi kimə nə məsləhət verə bilər?

  • “Onun azacıq da olsa özünə hörməti olsaydı, ümumiyyətlə, siyasətdən gedərdi”

Məsələyə münasibət bildirən AMİP funksioneri Əli Orucovun sözlərinə görə, S.Sarkisyanın məlum fikirləri gülüncdür: “Əvvəla S.Sarkisyan seçkidə namizəd olaraq iştirak etsəydi belə, hansısa uğur qazana bilməzdi. Bunu Sarkisyanın özü də yaxşı bilir. Çünki rəhbəri olduğu Respublikaçılar Partiyasının nüfuzu çox aşağıdır. Paşinyan hakimiyyətinin 44 günlük müharibədə uğradığı məğlubiyyət belə, Sarkisyanın xeyrinə işləmədi. Baxmayaraq ki, 90-cı illərdə Azərbaycan ərazilərinin işğal edilməsinin “memarlarından” biri də S.Sarkisyan olub. Onun bu işdə müstəsna xidmətləri olub. Ancaq bunların heç biri Sarkisyanın xeyrinə işləmədi. Çünki Ermənistanın işğalçılıq siyasəti bu ölkəni təcrid etdi. Ölkə yoxsullaşaraq səfil günə düşdü, Ermənistandan miqrasiya sürətləndi və s. Bütün bunları Sarkisyan yaxşı bildiyi üçün namizəd olmağa cəsarət etmədi. Üstəlik, Sarkisyan Rusiyanın da dəstəyindən məhrum olub. Rusiya əsasən sabiq prezident Robert Köçəryanı dəstəkləyir. Ancaq Ermənistan cəmiyyətində Köçəryan tərəfdarlarının sayı böyük deyil. Heç revanşist qüvvələr belə yekdilliklə Köçəryanı dəstəkləmirlər. Ona görə də məğlub Sarkisyanın məsləhəti Ermənistanda kiməsə lazım deyil. Onun azacıq da olsa özünə hörməti olsaydı, ümumiyyətlə, siyasətdən gedərdi. Ancaq bəlli olur ki, onda belə bir cəsarət, ləyaqət yox imiş”.

Ə.Orucov onu da qeyd etdi ki, ümumiyyətlə, S.Sarkisyan 2018-ci ildən sonra tarix oldu.

Vidadi ORDAHALLI

Son xəbərlər