Prezident İlham Əliyevin sərəncamı ilə Azərbaycanın Mədəniyyət paytaxtı elan edilən Şuşa şəhərində “Xarıbülbül” musiqi festivalının keçirilməsi tarixi hadisədir və həm ənənələrin bərpası, həm də doğma şəhərimizə qovuşmağımız baxıməndan möhtəşəm bir tarixdir. Dünyanın şahidliyi ilə Şuşada Cıdır düzündə keçirilən “Xarıbülbül” festivalının Türkiyənin məşhur “Mehtər” marşı ilə açılması da ayrıca bir simvolik məna kəsb edir.
“Xarıbülbül” musiqi festivalının “Mehtər” marşı ilə açılmasının tarixi, siyasi, mənəvi əhəmiyyəti nədir, niyə məhz “Mehtər” marşı?
Ekspertlər bildirirlər ki, “Mehtər” marşı əzəmətin, ehtişamın və görkəmliliyin bir işarəsidir və qələbənin simfoniyasıdır.
Siyasi şərhçi Azər Həsrətin sözlərinə görə, Şuşada keçirilən “Xarıbülbül” festivalında, belə gözəl məqamda “Mehtər” marşının səsləndirilməsi rəmzi məna daşıyır: “Söhbət əgər hərbi, əsgəri marşlardan gedirsə, Azərbaycanın özünün də yetərincə hərbi marşları var. Təbiidir ki, müzəffər Azərbaycan Ordusunun və xalqının şərəfinə Şuşada Azərbaycanın özünün də hərbi marşlarını səsləndirmək olardı. Lakin Şuşada keçirilən “Xarıbülbül” festivalının Türkiyənin bütün dünyada tanınan, bilinən “Mehtər” marşı ilə açılması, əslində, bir çox mərkəzə və müxtəlif dairələrə verilmiş mesaj oldu. Yəni məqsəd burada Türkiyə dövlətinin, bütövlükdə, Türkiyə xalqının və dünya türklərinin 44 günlük Vətən savaşında Azərbaycana təmənnasız və könüldən dəstək verməsinə bir minnətdarlıq hissini ifadə etməkdən qaynaqlanır. Azərbaycan bununla, bir növ, jest etdi, həm Türkiyəyə, həm də dünyaya göstərdi ki, bizimlə dost olan, bizimlə qardaş olan və hər zaman bizi təmənnasız olaraq dəstəkləyən, haqq işimizdə bizimlə eyni sırada duran hər kəsə layiq olduğu qiyməti verməyi bacarırıq”.
A.Həsrət qeyd etdi ki, Şuşa adicə bir şəhər deyil, onun çox böyük mənəvi və siyasi dəyəri var. “Əlbəttə ki, illər sonra Şuşada “Xarı bülbül” festivalının keçirilməsi məqamı ilə yanaşı, “Mehtər” marşının da səsləndirilməsi əslinə qalanda həm Türkiyəyə, həm də dünyaya bir ismarıcdır ki, biz təmənnasız olaraq haqq işimizi dəstəkləyənlərə ən yüksək diqqəti göstərməyi bacarırıq. Bu həm də bizə qarşı olanlara bir ismarıcdır ki, anlasınlar. Yəni günün birində yenidən macərapərəstlik etmək istəsələr, qarşılarında Azərbaycan əsgəri ilə yanaşı, türk əsgərini də, türk ruhunu da görəcəklər. Düşünürəm ki, “Mehtər” marşının Şuşada səsləndirilməsi ünvanına çatmış bir mesajdır və bizə qarşı olanlar da bundan öz paylarını alıblar. Eyni zamanda, istər qardaş Türkiyə dövləti, istərsə də xalqı olaraq Azərbaycanın həqiqətən özünün yaxın dostlarına, qardaş ölkələrə sədaqətini bir daha görmüş oldu. Yəni təsadüfi deyil ki, Azərbaycanda “Mehtər” marşı öz yerində, amma hər yerdə Türkiyə bayrağı savaşın bitməsinə baxmayaraq, hələ də dalğalanmaqdadır. Bütün bunlar isə dosta da, düşmənə də bir ismarıcdır. Şuşada keçirilən “Xarıbülbül” festivalının da “Mehtər” marşı ilə açılması öz yerində” - deyə A.Həsrət qeyd etdi.
İradə SARIYEVA
