“Builki festival Azərbaycanda yaşayan xalqların nümayəndələrini əhatə edir”.
Bunu Prezident İlham Əliyev Şuşada “Xarı bülbül” festivalının açılışında iştirak edərkən çıxışında deyib. Dövlət başçısının sözlərinə görə, festivalda ölkəmizdə yaşayan müxtəlif xalqların nümayəndələri çıxış edəcək: “Bu tövsiyəni festivalın təşkilatçısı olan Heydər Əliyev Fonduna mən vermişdim, çünki Vətən müharibəsində Azərbaycanda yaşayan bütün xalqların böyük payı vardır. Vətən müharibəsi bir daha onu göstərdi ki, Azərbaycanda bütün xalqlar dostluq, qardaşlıq, həmrəylik şəraitində yaşayır və bu 44 günlük müharibə bir daha onu göstərdi ki, ölkəmizdə milli birlik, milli həmrəylik vardır. Təsadüfi deyil ki, birinci festivalda Azərbaycanda yaşayan xalqların nümayəndələri çıxış edəcəklər və bir daha biz bütün dünyaya buradan – Şuşadan, qədim torpağımızdan mesaj veririk. Ölkələr belə inkişaf etməlidir, ancaq çoxkonfessiyalı, çoxmillətli ölkələrdə, cəmiyyətlərdə inkişaf olur, birlik olur, milli həmrəylik olur, sülh olur. Biz dünyanın müxtəlif yerlərində baş verən hadisələri izləyirik, görürük və deyə bilərəm ki, bir neçə il bundan əvvəl bu gün mövcud olan vəziyyəti görürdük. Ona görə həm ölkə daxilində, həm beynəlxalq müstəvidə, o cümlədən ölkəmizdə keçirilmiş çoxsaylı tədbirlərdə multikulturalizmi təbliğ edirdik, müxtəlif xalqların birgəyaşayışını təbliğ edirdik və deyirdik ki, bu mümkündür. Azərbaycanın timsalında deyirdik ki, bu mümkündür və göstərirdik, öz təcrübəmizi bölüşürdük, öz fikirlərimizi bölüşürdük və hesab edirəm ki, bizim bu səylərimiz nəticə verdi”.
Bütün bunlar bir daha Azərbaycanda multikultural dəyərlərə verilən önəmin göstəricisidir.
“Xarı bülbül” festivalında milli azlıqların folklor nümunələrinin səslənməsi bir daha göstərdi ki...”
əsələyə münasibət bildirən AVCİYA-nın vitse-prezidenti, professor Məhərrəm Zülfüqarlının sözlərinə görə, “Xarı bülbül” festivalı Azərbaycanın növbəti uğuru idi: “Azərbaycanı istəyənlər buna sevinir, istəməyənlər isə bunu qaralamağa çalışır. Ancaq bizi sevməyənlər öz niyyətlərinə çata bilməzlər. Prezidentin festivalın açılışında səsləndirdiyi fikirlər bir həqiqətdir. Çünki tarixən Azərbaycanda çoxmillətli tərkib formsalaşıb. Bu, Azərbaycanın coğrafi mövqeyi ilə bağlıdır. Xüsusən də Bakıda neft sənayesinin inkişafından sonra əhalinin milli tərkibinin rəngarəngliyi artıb. Məsələn, 1907-ci ildə “Yurddaş” qəzeti yazırdı ki, Bakı bütün proletariatın sərgisidir. Bu o deməkdir ki, dünyanın hər yerindən Bakıya işləməyə gələnlər burada özlərinə vətən tapırdılar. Ancaq neft sənayesindən əvvəl tarixən Azərbaycanda köklü etnik qruplar yaşayıb. Bunlar daima Azərbaycanı özlərinə vətən seçiblər. Bu vətən uğrunda da hər zaman döyüşüblər. Bugünkü Azərbaycana baxsaq görərik ki, Prezidentin dedikləri bir nümunədir. Özü də bu, demokratiyadan dəm vuran Fransaya bilavasitə mesajdır. Yəni himayə etdikləri Ermənistanda bir dənə başqa millətin nümayəndəsi yoxdur. Bütün milli azlıqlar Ermənistandan qovulub. Ancaq Azərbaycana baxanda görürük ki, bura həqiqətən tolerant ölkədir. Azərbaycandakı qəhrəmanlar içərisində bütün millətlərin nümayəndələri var. Birinci Qarabağ müharibəsində də belə olub, İkinci Qarabağ müharibəsində də. Bütün xalqlar bir nəfər kimi vətənin müdafiəsinə qalxdı. Şəhid və qazilərin içərisində çoxsaylı milli azlıqların nümayəndələri var. Biz bununla fəxr edirik. Bu, azərbaycançılıq ideologiyasının təntənəsidir. Bizdə etnik millətçilik yoxdur. Bizdə dövlət millətçiliyi var və bizi birləşdirən vətən, Azərbaycan var. Azərbaycançılıq da vətənçilik ideologiyasıdır. “Xarı bülbül” festivalında milli azlıqların folklor nümunələrinin səslənməsi bir daha göstərdi ki, Azərbaycanın gücü məhz bu birlikdədir. Biz çalışmalıyıq ki, hər zaman bu birliyi qoruyaq. Heç bir təxribata yol verməyək”.
Professor hesab edir ki, Azərbaycanı sevməyən qüvvələr olduğu üçün biz hər zaman ayıq olmalıyıq.
Vidadi ORDAHALLI
