Lavrov minalar məsələsində İrəvandan Bakının istədiyi mövqe ilə gəldi, lakin erməni xəritələrinə inanaqmı?..
Bütün humanitar məsələlər maksimum operativ həll olunmalıdır. Bunu Rusiyanın xarici işlər naziri Sergey Lavrov azərbaycanlı həmkarı Ceyhun Bayramovla mətbuat konfransında deyib. O bildirib ki, bu, həm həlak olanların meyitlərinin qaytarılmasına, həm də minalanmış ərazilərin xəritəsinə aiddir: "Bu məsələ Yerevanda müzakirə olunub. İlkin addımlar atılıb. Hesab edirik ki, bu məsələ tezlikllə həll olunacaq".
Rusiya XİN başçısı onu da bildirib ki, kommunikasiyaların bərpası məsələsi bütün maraqlı tərəflərin, təkcə Azərbaycanla Ermənistanın deyil, həm də qonşu ölkələr qismində Rusiya, Türkiyə və İranın mövqeyi nəzərə alınaraq həll olunur.
Lavrovun açıqlamasından belə aydın olur ki, o, İrəvandan Bakının tələbinə uyğun nəticə əldə edərək gəlib. Çünki minalanmış ərazilərin xəritəsinin təqdim olunmasını Azərbaycan tez-tez Ermənistanın qarşısında qaldırıb. Ermənistanın həmin xəritələri həqiqətən verəcəyinə inanmaq olarmı?
“Rusiya sülhməramlılarının da bu müddət ərzində minaya düşməməsi onu deməyə əsas verir ki, belə xəritə onlarda da var”
Politoloq Yeganə Hacıyeva “Bakı-Xəbər”ə açıqlamasında bildirdi ki, 10 noyabr razılaşmasında minalanmış sahələrlə bağlı xəritənin təqdim olunmasına dair bənd olub: “Çünki bu xəritələr olsa, proses sürətlənə bilər. İstər kommunikasiyaların bərpası, istərsə də dinc əhalinin ora köçürülməsi sürətlənə bilər. Bu da razılaşmanın ən əsas bəndləri üzrə nəticənin əldə edilməsi anlamına gələr. Ermənistan tərəfi hələ də bu tələbi yerinə yetirməyib. Hətta bir müddət əvvəl bildirdilər ki, belə xəritələr yoxdur. Ermənistanın torpaqları işğal altında saxlamasından sonra hər hansı bir erməni hərbçisinin minaya düşməsi halı qeydə alınmayıb. Bu da xəritələrin olması anlamına gəlir. Bu xəritələri almaq birmənalı olaraq Rusiyanın öhdəliyi sayılır. Sülhməramlılar 7 ay ərzində bu istiqamətdə heç bir addım atmayıb. Rusiya sülhməramlılarının da bu müddət ərzində minaya düşməməsi onu deməyə əsas verir ki, belə xəritə onlarda da var. Lavrov belə bir xəritənin Ermənistanın əlində olmasını təsdiq edib. Rusiyanın bu etirafı onu deməyə əsas verir ki, minalarla bağlı problem öz həllini tapmış olacaq. Kəlbəcərdə axtarış aparılanda mina tarlaları aşkarlanıb. Deməli, onlara verilən 15 günlük möhlət zamanı çoxlu minalar basdırılıb. Bu hal digər rayonlarda da var. Görünür, Rusiya tezliklə məsələni kökündən həll etməyi qarşısına məqsəd qoyub”.
Məhəmmədəli QƏRİBLİ
