İsrail-Həmas müharibəsində kimin haqlı olmasına Azərbaycanda ictimai rəylər...

img

İsraillə Fələstin arasında yaşanan gərginlik sosial şəbəkələrin Azərbaycan seqmentini ikiyə bölüb. Sosial media fəalları ərəblərlə yəhudilərin savaşında iki cəbhəyə ayrılıblar. Bir çox insan müsəlman Fələstinin ermənipərəstliyini əsas gətirərək onların müdafiəsinə qarşı çıxır.

Azərbaycanlı virtual fəallar qeyd edir ki, 44 günlük müharibədə kimin hansı ölkənin tərəfini saxlaması bizim üçün dərs olmalıdır və İsrail dost ölkə olaraq erməni işğalına son qoymağımızda böyük siyasi-mənəvi dəstək göstərib, eləcə də bu ölkənin pilotsuz uçuş aparatları qələbəmizdə mühüm rol oynayıb.

Yəhudilərin Qəzzanı vurmasına etiraz edənlər isə bildirir ki, İsrail müharibədə bizə dəstək olsa belə, gərək ədalət tərəzisini pozmayaq, obyektiv yanaşaq, beynəlxalq hüquq Fələstinin yanındadır, orada ölən insanlar isə müsəlmanlardır. Maraqlıdır, əhalisinin böyük əksəriyyətini müsəlmanların təşkil etdiyi Azərbaycanda İsrailə bu dərəcədə məhəbbət haradan və hansı səbəbdən qaynaqlanır?

“Yalnız bir qrup iranmeyli dindar İsrailə qarşı anti-təbliğat aparır”

İlahiyyatçı Tural İrfan “Bakı-Xəbər”ə açıqlamasında bildirdi ki, bunun səbəbləri çoxdur: “Başlıcası İsrailin dünyada apardığı güclü diplomatiya siyasətilə bağlıdır. Məhz bunun nəticəsində  onlar, hətta bir çox ərəb ölkələrini də öz tərəflərinə çəkiblər. Digər tərəfdən isə, İkinci Qarabağ savaşında İsrailin Azərbaycana verdiyi hərbi-siyasi dəstəklə bağlıdır. Bununla onlar, hətta dini təbəqənin də könlünü almağı bacarıblar. Yalnız bir qrup iranmeyli dindar İsrailə qarşı anti-təbliğat aparır. İsrailin Fələstinə qarşı törətdiyi hadisələr isə tənqidə layiq deyil. Bununla bağlı hətta BMT-nin məlum qətnaməsi var. Bizim xalqımızın hansı tərəfin yanında olmasını isə dövlət siyasəti müəyyən edir. Siyasətin görünən və ya görünməyən tərəfləri var. Bu baxımdan da biz məzlumun, əzilənin yanında olmaq istərik. Məsələnin görünməyən tərəfini isə dövlət rəsmiləri bilir.   Xalqımızın dini maariflənməsi zəif olduğu üçün onlar bilmir ki, Qüds nədi, Əl-Əksa məscidi nədir. Qüds müsəlmanlar üçün qiblə rolunu oynayır. Ona görə də Fələstin məsələsi bir az həssasdır. Pullunun və güclünün yanında durub kortəbii kimisə müdafiə etmək də doğru deyil. Müdafiəni də əsaslandırmaq lazımdır. Biz, yaxşı olar ki, sülhü müdafiə edək. Qüds elə bir şəhərdi ki, orada bütün dinlərin nümayəndələri birgə yaşamağı bacarmalıdır. Hesab edirəm ki, dövlətimizin siyasəti də buna tam uyğun olacaq”.

Məhəmmədəli QƏRİBLİ

Son xəbərlər