Rusiya Prezidenti Vladimir Putin 9 May - Faşizm üzərində Qələbə Günü münasibətilə Moskvada keçirilən hərbi paradın iştirakçıları və qonaqları qarşısında çıxışında bir sıra mətləblərə toxunub, faşist ideologiyasının yenidən gündəmə gətirildiyini deyib.
Rusiya lideri, həmçinin, yenidən təcavüzkar planlar üzərində düşünənlərə münasibətdə əfv və bəhanə olmadığını bildirib: “Tarix nəticə çıxarmağı və dərs öyrənməyi tələb edir. Ancaq təəssüf ki, faşist ideologiyasını yenidən gündəmə gətirməyə çalışırlar. Tarixi yenidən yazmaq, xainlərə və cinayətkarlara haqq qazandırmaq cəhdlərini görürük. Rusiya öz milli maraqlarını və təhlükəsizliyini qətiyyətlə müdafiə edəcək”.
Faşist ideologiyasının yenidən gündəmə gətirildiyinə cəhd edildiyini deyən Rusiya lideri konkretlik göstərib Ermənistanın adını çəkmədi.
Keçmiş SSRİ məkanında faşizmi dövlət ideologiyasına çevirən məhz Ermənistandır. Putin bunu hansı səbəbdən dilə gətirmək istəməyib? Halbuki, Prezident İlham Əliyev dəfələrlə ən yüksək tribunalardan Ermənistanın faşizm ideologiyasını çiçəkləndirdiyini, dövlət siyasətinə çevirdiyini bəyan edib.
“Ermənistan bu kimi faşist əməlləri yalnız Azərbaycan torpaqlarında deyil, Gürcüstanın, Rusiyanın da müəyyən ərazilərində davam etdirib”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli baki-xeber.com-a Rusiya Federasiyası Prezidentinin ad çəkmədən bəzi ölkələrdə faşizm ideologiyasının gündəmə gətirildiyini bəyan etməsinin təsadüfi olmadığını qeyd etdi. F.Ələkbərlinin sözlərinə görə, əslində, Putin ad çəkməsə də, aydın bilinir ki, Qafqaz bölgəsində faşizmi yayan və təbliğ edən, dövlət siyasətinə çevirən konkret olaraq Ermənistandır: “Təbii ki, Qafqaz bölgəsində faşizmi yayan, faşizm ideologiyasını dövlət siyasətinə çevirən ölkənin Ermənistan olduğu gizlin deyil. Bəzi Avropa dövlətlərində də faşizmə meylli çıxışlar var, bu bəzi dövlətlərdə də özünü göstərir. Ancaq bölgəmizdə isə faşist ideologiyasından geniş istifadə edən Ermənistandır. Putin deyir ki, bu kimi hallara qarşı Rusiya öz milli maraqlarını və təhlükəsizliyini müdafiə edəcək. Biz eyni şəkildə Azərbaycanın milli maraqlarını və təhlükəsizliyini qorumalıyıq, qoruyuruq da. Çünki Rusiyadan da daha çox faşizmdən əziyyət çəkən Azərbaycan olub və hələ də əziyyət çəkməkdə davam edir. Məsələn, biz torpaqlarımızı, demək olar ki, böyük ölçüdə işğaldan azad etmişik, ancaq Ermənistan və onun havadarları bu və ya digər şəkildə nəinki Ermənistanda, hətta Azərbaycan ərazisində də faşizmi Njdeyə abidə qoymaqla ifadə etmək istəyirlər. Biz bunun nümunələrini görürük ki, vaxtilə Hitler Almaniyası ilə açıq şəkildə əməkdaşlıq etmiş Njdeyə nəinki Ermənistanda, hətta Azərbaycan ərazisində - Qarabağda da abidə qoyulub. Ermənistan bu kimi faşist əməlləri yalnız Azərbaycan torpaqlarında deyil, Gürcüstanın, Rusiyanın da müəyyən ərazilərində davam etdirib, faşist əlaltısına heykəllər qoymağa çalışıb. Bir sözlə, bölgəmizdə faşizmin yayılma mərkəzi Ermənistandır, rəsmi İrəvandır. Çox təəssüflər olsun ki, Vladimir Putin bu məsələnin üzərinə konkret getməkdənsə, Ermənistanın özünü faşist dövlət kimi ifadə etdiyini deməkdənsə, ancaq bunu üstüörtülü məqamlarla vurğulayıb. Halbuki, Azərbaycanda dövlət başçısı səviyyəsində Ermənistanın faşist mahiyyəti ifşa olunub. Dəfələrlə Azərbaycan Prezidenti İlham Əliyev Ermənistanın faşist siyasəti yürütdüyünü, faşizmi dövlət siyasətinə çevirdiyini yüksək tribunalardan səsləndirib. Hətta Ermənistan rəhbərliyinin də iştirak etdiyi MDB ölkələrinə aid tədbirlərdə Prezident İlham Əliyev Ermənistanı ifşa edib. Bir sözlə, biz hələ də Ermənistan faşizmindən əziyyət çəkirik, Gürcüstan da çəkir, Rusiya özü də, müəyyən mənada, bundan kənarda qalmayıb. Əslində, Rusiya Federasiyası zaman-zaman müəyyən bölgələrdə, xüsusən də ermənilərin kompakt yaşadıqları bölgələrdə bunu hiss etməyə başlayıb. Gərək Putin erməni faşizmindən daha çox Azərbaycanın əziyyət çəkdiyini ifadə edəydi. Putin hansısa maraqlar çərçivəsində Ermənistanın adını çəkməyib və bu məsələyə üstüörtülü toxunmaqla kifayətlənib”.
F.Ələkbərli deyir ki, bu məsələdə təkcə Putin deyil, digər yetkililər də eyni cür davranıblar. Tarixçinin sözlərinə görə, Rusiya Prezidenti erməni faşizminin nəinki Azərbaycan, Gürcüstan, Rusiya, eləcə də bütün dünya üçün təhlükə olduğunu dilə gətirməli, daha açıq şəkildə ortaya qoymalı idi. “Erməni faşizminin hədəfinin əsasən Azərbaycan və Türkiyə olduğu gizlin deyil. Eyni zamanda, erməni xalqının özü də gec-tez Ermənistanın faşist ideologiyasının qurbanı olacaq” - deyə F.Ələkbərli vurğuladı.
İradə SARIYEVA
