Bildiyimiz kimi, ənənəvi olaraq, hər il mədəniyyət, incəsənət, ədəbiyyat sahəsində fəaliyyət göstərən şəxslərə Prezident mükafatları verilir və bu sahələrdə xüsusi xidmətləri olmuş şəxslər Prezidentin fərdi təqaüdünə layiq görülürlər. Azərbaycan mediasında xidmətlərinə görə Prezidentin fərdi təqadünə layiq görülənlər var.
Hər il xeyli sayda mədəniyyət adamına Prezident mükafatı verilir, amma media ilə bağlı bu ənənə, demək olar ki, yoxdur.
Media sahəsində xidmətlərınə görə, incəsənət adamları kimi, Prezident mukafati ilə təltif olunma praktikasi varmı? İndiyə qədər olubmu? Bu mükafatın verilməsi incəsənət sahələrində varsa, mediada niyə olmasın? Nəzərə alsaq ki, media hər zaman dövləti, dövlətçiliyi müdafiə edir, Prezidentin siyasətini dəstəkləyir.
Şakir Ağayev: “Hər il 22 iyul - Milli Mətbuat Günündə uzun illər mətbuat sahəsində səmərəli fəaliyyət göstərən bir neçə jurnalistə Prezident mükafatının verilməsi arzuediləndir”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, hər il ənənəvi olaraq mədəniyyət və incəsənət adamlarına Prezidentin fərdi təqaüdü və Prezident mükafatı verilir. “Media sahəsində isə kütləvi mükafatlandırmalar və təltif etmələr, bir qayda olaraq, hər beş ildən bir keçirilən medianın yubileylərində olur. Fəxri adlar, medallar verilir, Prezidentin fəxri fərmanları, Prezidentin fərdi təqaüdü ilə media mənsubları təltif olunurlar. Bu, beş ildən bir keçirilən yubiley tədbirlərində olur. Bizim bir neçə qocaman, veteran jurnalistimizə mediadakı uzunillik səmərəli fəaliyyətinə görə Prezidentin fərdi təqaüdü verilir. Çox yaxşı olardı ki, dövlət maraqlarını, dövlətçiliyi müdafiə edən, dövlətimizin inkişafına böyük töhfələr verən, uzun illər media sahəsində səmərəli fəaliyyət göstərən şəxslər də, mədəniyyət və incəsənət sahəsində çalışanlar kimi, Prezident mükafatı alsınlar. Mətbuatın yubileylərindən əlavə, hər il media təmsilçilərinə Prezident mükafatı verilməsi ənənəsinin formalaşdırılması çox gözəl olardı. Hər il 22 iyul - Milli Mətbuat Günündə uzun illər mətbuat sahəsində səmərəli fəaliyyət göstərən bir neçə jurnalistə Prezident mükafatının verilməsi arzuediləndir. Təbii ki, bu təqdirəlayiq olardı, bu sahədə çalışan, dövlətə və xalqa faydalı olan insanların əməyinin stimullaşdırılmasında mühüm rol oynayardı. Prezident mükafatı ənənəsinin media sahəsində də tətbiq edilməsi çox müsbət olardı”.
Ş.Ağayevin sözlərinə görə, jurnalistlərin də Prezident mükafatı alanlar kateqoriyasına daxil edilməsi yaxşı olardı və bu çox vacibdir. İctimai rəyin formalaşmasında, milli dövlətçilik maraqlarının formalaşmasında onsuz da medianın gecə-gündüz çalışdığını deyən Ş.Ağayev hesab edir ki, Prezident mükafatının verilməsi isə onlar üçün daha stimullaşdırıcı hal olardı. “Azərbaycanda media qurumlarının (təbii ki, hamısından söhbət getmir - Ş.A.) Azərbaycanın dövlət maraqlarının müdafiəsi sahəsində gördüyü işlər misilsizdir. Azərbaycanın haqq səsini həm daxili, həm də beynəlxalq auditoriyaya mediamız çatdırır. Sözsüz ki, Azərbaycan mediası dövlətin qayğı və diqqətini hər zaman yaxından hiss edir, mətbuatımız dövlət qayğısı ilə əhatə olunub” - deyə Ş.Ağayev qeyd etdi.
Müşfiq Ələsgərli: “Azərbaycanda jurnalistika çox azsaylı sahələrdən biridir ki...”
Azərbaycan Mətbuat Şurasının sədr müavini, tanınmış media eksperti Müşfiq Ələsgərli qeyd etdi ki, ölkədə hər bir sahənin inkişafı üçün dövlət qayğı göstərir. Dövlət proqramlarının, dövlət dəstəyinin, dövlətin həyata keçirdiyi bütün layihələrin müxtəlif sahələrin inkişafına xidmət etdiyini deyən M.Ələsgərlinin sözlərinə görə, həm həmin sahə peşəkarlaşsın, həm də peşəkarlaşan sahələr isə dövlətimizə, xalqımıza fayda vermiş olsun. “Bu baxımdan, hər bir sahənin özünün spesifikası var, inkişaf proqramları da onun spesifikasına uyğun hazırlanır. Bu anlamda KİV-in, media məkanının inkişafı üçün də dövlətin çoxsaylı proqramı var. Məsələn, media sahəsində tutaq ki, özünütənzimləmə statusu tətbiq olunur, media sahəsində medianın inkişafına dövlət dəstəyi konsepsiyası var və bu konsepsiya fəaliyyət göstərir. Media sahəsində donor təşkilat var və o donor təşkilatı KİV-də çalışanların müxtəlif layihələrinin maliyyələşdirilməsi, bilik və bacarıqlarının inkişaf etdirilməsinə töhfə verilməsi üçün müxtəlif layihələri, proqramları həyata keçirir. Yeri gəlmişkən deyim ki, Azərbaycan mediası bəlkə də regionda və köhnə postsovet ölkələri arasında dövlətdən ən çox dəstək alan mediadır. Bu baxımdan, cənab Prezidentin qayğısı və diqqəti daimi olaraq Azərbaycan mediasının üzərindədir, eyni zamanda, dövlətimiz medianın inkişafı üçün çoxsaylı layihə, proqram həyata keçirir və bu maliyyələşdirmə, bu dəstəkvermə medianın spesifikasına uyğundur. Burada, əlbəttə, ayrı-ayrı fərdlərdən daha çox, ümumilikdə, medianın inkişafına dəstək verilir ki, bu da qəanətbəxşdir. Əgər media inkişaf edirsə, orada fəaliyyət göstərənlərin iqtisadi durumları da yaxşılaşır. Bunun yaxşılaşması nəticəsində onların peşəkarlığı da artır, iş mühiti də rahatlaşır, daha çox fayda vermiş olurlar. Əlavə olaraq, gəlin diqqət yetirək: Azərbaycanda jurnalistika çox azsaylı sahələrdən biridir ki, burada jurnalistlər üçün əlahiddə bir jurnalist şəhərciyi salınıb, jurnalistlər üçün ayrıca bina tikilir və mənzillər heç bir qarşılığı olmadan jurnalistlərə təqdim olunur. Əlbəttə, incəsənət adamları üçün də bu cür güzəştlər var. Amma, bildiyim qədər, onlar fərdi qaydada alırlar. Ayrıca şəhərcik formasında incəsənət xadimləri üçün binlar yoxdur. Amma, dediyim kimi, jurnalistlər üçün ayrıca şəhərcik salınıb. Qısa müddət ərzində yüzlərlə mənzil jurnalistlərə qarşılığı olmadan verilib. Jurnalistlər üçün fərdi müsabiqələr keçirilir və jurnalistlərin o fərdi müsabiqələrdə iştirak etmək, qalib gəlmək və böyük pul əldə etmək imkanları var. Bilirsiniz ki, bu, əvvəllər KİVDF, indi isə Media İnkişafı Agentliyi tərəfindən keçirilir. Belə çoxsaylı dövlət dəstəyini ehtiva edən proqramlar var ki, bunlar jurnalistika sahəsində var, amma incəsənət sahəsində yoxdur”.
M.Ələsgərli qeyd etdi ki, incəsənət sahəsinin spesifikasına uyğun olaraq, orada fərdi təqaüdlər daha çox verilir, görünür ki, o sahənin spesifikasına bu uyğundur. “Amma, fikrimcə, jurnalistikaya, mediaya verilən dəstək digər bütün sahələrə verilən dəstəklərdən daha üstündür. Mənəvi baxımdan fəaliyyətin motivasiya edilməsinə gəlincə, əlbəttə, jurnalistika sahəsində də çoxsaylı belə stimullaşdırıcı, motivasiyaedici proses var. Məsələn, jurnalistlərə “Əməkdar jurnalist” adının verilməsidir, “Tərəqqi” medalı, “Şöhrət” ordeni verilir. Bunların da arxasında konkret maddi dəstək dayanır. Hesab edirəm ki, bu da jurnalist əməyinə verilən çox böyük qiymətdir, bu da digər mükafat və nominasiyalardan heç də aşağı deyil, əksinə, daha üstün məqamlara malikdir. Yəni vurğulamaq istədiyim odur ki, hər bir sahəyə yardım göstərilməsi onun spesifikasına uyğun həyata keçirilir” - deyə M.Ələsgərli vurğuladı.
İradə SARIYEVA
