Qarabağda uğradıqları məğlubiyyəti həzm etməyən ermənilər bir-birini satqınçılıqda, casusluqda ittiham etməkdə davam edirlər. Vəziyyət o yerə gəlib çatıb ki, parlament komitəsi casusluqda günahlandırılır.
"Politik.am" nəşri yazır ki, guya parlamentin müdafiə komitəsi Azərbaycana məlumatları ötürüb: “ Bu gün də çoxları üçün anlaşılmazdır ki, necə oldu, Azərbaycan müharibə zamanı Ermənistan ordusu barədə bütün mümkün məlumatlara sahib idi? Çoxları xəyanət haqqında danışırlar və müxtəlif təklifləri irəli sürürlər. Ermənistan ordusu haqqında mövcud məlumatlar Milli Təhlükəsizlik Xidmətində ola bilərdi, lakin bu strukturdan bənzər sızıntı ola biləcəyini təsəvvür etmək çətindir”.
Daha sonra qeyd olunur ki, parlamentin müdafiə və milli təhlükəsizlik məsələləri üzrə komitəsində də ordu haqqında misli görünməmiş dərəcədə böyük həcmdə məlumat var idi: “Hakimiyyət dəyişikliyindən sonra bu komitə Aprel döyüşlərinin detallarını araşdıran komissiyanın funksiyalarını həyata keçirirdi. Bu komissiya ən əlçatmaz gizli məlumatlara belə sahib olmaq imkanı qazanmışdı. Bu müddət ərzində sübut edilib ki, komissiyadan sənədlər sıza bilər. İndi, Azərbaycana çatmış məlumatlar haqqında versiyalar səslənəndə bir versiya da diqqəti cəlb etməlidir. Bu versiyaya görə, Andranik Köçəryanın rəhbərlik etdiyi komissiyanın əlinin altında olan sənədlərin sızdırılması nəticəsində Azərbaycana məlumatlar çata bilərdi”.
Göründüyü kimi, Ermənistan tərəfi Azərbaycan Ordusunun misilsiz qəhrəmanlığını etiraf etmək əvəzinə, bir-birini casusluqda ittiham edir.
“Ermənistanın nə ordusu var idi ki Andranik Köçəryan onunla bağlı məlumatları bizə ötürsün?”
Məsələyə münasibət bildirən hərbi ekspert İbrahim Rüstəmli hesab edir ki, erməni tərəfi öz hərbi uğursuzluğuna bəraət qazandırmaqdan ötrü bu cür uydurma versiyaları ortaya atır: “Əvvəla Ermənistan ordusu heç vaxt qalib olmayıb. 90-cı illərdə Azərbaycan təkcə ermənilərə qarşı yox, onlarıın arxasında duranlara qarşı vuruşub. Azərbaycan ermənilərdən də çox, erməni silahlı birləşmələrinə dəstək verən ölkələrlə vuruşub. Əgər həmin dövlətlər olmasaydı, 90-cı illərdə erməni vandalları ərazilərimizi işğal edə bilməzdi. Azərbaycan 30 il ərzində öz tapdanmış hüququnu, işğal edilmiş ərazilərini geri qaytarmaq, ərazi bütövlüyünü bərpa etmək üçün çalışdı. Prezident İlham Əliyev 30 il ərzində üst-üstə yığılan problemləri həll etdi. İlham Əliyevin prezidentliyi dövründə müasir silahlar alındı, ordunun döyüş qabiliyyəti, peşəkarlığı artırıldı. Bunun nəticəsi idi ki, 44 gün ərzində ordumuz böyük peşəkarlıq göstərərək düşməni darmadağın etdi. Çünki 44 günlük müharibə zamanı bizim ordumuz hər gün irəlilədi. Hərbi əməliyyatların strateji və taktiki plan üzrə qabaqcadan cızılması, daha sonra həyata keçirilməsi öz bəhrəsini verdi. Bunun başlıca səbəblərindən biri də hazırlanan hərbi əməliyyat planına son dərəcə kompleks şəkildə yanaşılmasıdır. Eyni zamanda, strateji planların taktiki şəkildə reallaşdırılması zamanı ortaya çıxan bu və ya digər problemlərə ciddi müdaxilələrin çevik şəkildə təmin edilməsi də öz sözünü dedi. Çox mükəmməl şəkildə əməliyyatların redaktə edilməsi əldə edilən uğurlara öz töhfəsini verdi. Ermənilər bütün bunları etiraf edəcək siyasi-hərbi əxlaqa malik deyil. Ermənistanın nə ordusu var idi ki Andranik Köçəryan onunla bağlı məlumatları bizə ötürsün? Bütün strateji əhəmiyyətli yüksəkliklər ermənilərin əlində idi. Ancaq Azərbaycan Ordusu misli görünməmiş peşəkarlıq göstərərək strateji əhəmiyyətli yüksəklikləri azad etdi”.
Hərbi ekspert onu da qeyd etdi ki, Ermənistan məğlub tərəf olduğu üçün onlar hələ bir-birini çox ittiham edəcəklər.
Vidadi ORDAHALLI
