Prezident İlham Əliyev Şuşa şəhərinin Azərbaycanın mədəniyyət paytaxtı elan edilməsi haqqında sərəncam imzalayıb.
Məlumdur ki, Şuşa şəhəri tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olub. 1977-ci ildə xalqımızın Ümummilli Lideri Heydər Əliyevin təşəbbüsü ilə “Şuşa şəhərinin tarixi hissəsini tarix-memarlıq qoruğu elan etmək haqqında” qərar qəbul edilib. Həmin qərar nəticəsində Şuşada abidələrin qorunması, görkəmli mədəniyyət və incəsənət xadimlərinin xatirələrinin əbədiləşdirilməsi istiqamətində əhəmiyyətli addımlar atılıb.
Azərbaycana qarşı başladığı hərbi təcavüz nəticəsində Ermənistan Respublikası 1992-ci il mayın 8-də Şuşa şəhərini işğal etmiş və şəhərdə xalqımızın tarixi-mədəni irsinin məhv edilməsi siyasətini həyata keçirib.
Ordumuzun qətiyyətli mübarizəsi ilə tarixi ədalət bərpa edilmiş və 2020-ci il noyabrın 8-də Şuşa şəhəri işğaldan azad olunub. Azərbaycan Respublikası Prezidentinin işğaldan azad olunmuş ərazilərdə ilk xüsusi nümayəndəsi məhz Şuşa rayonuna təyin edilib.
Şuşa Azərbaycanın qədim tarixə malik olan şəhər mədəniyyətinin nadir və təkrarsız incilərindən biridir.
- Faiq Ələkbərli: “Şuşanın mədəniyyət mərkəzi kimi dünyada tanınması üçün bu sərəncam olduqca mühüm addımdır”
Şuşa şəhərinin Azərbaycanın mədəniyyət paytaxtı elan edilməsi barədə fikir bildirən Azərbaycan Milli Elmlər Akademiyasının Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə açıqlamasında qeyd etdi ki, Şuşa mədəni, sosial, iqtisadi, siyasi anlamda da önəmlidir: “Prezident İlham Əliyevin Şuşa şəhəri haqqında sərəncam imzalaması təqdirəlayiqdir. Şuşa şəhərində görüləcək işlər hələ çoxdur”.
Həmsöhbətimiz onu da əlavə etdi ki, artıq Şuşa şəhəri mədəniyyətimizin paytaxtı sayılır. Bu səbəbdən də adıçəkilən ərazidə yerli və beynəlxalq tədbirlər keçirilməlidir: “Şuşanın mədəniyyətimizin paytaxtı elan edilməsi ərazi bütövlüyünün tam şəkildə həll edilməsi baxımından mühüm məsələdir”.
F.Ələkbərlinin sözlərinə görə, Şuşanın mədəniyyət mərkəzi kimi dünyada tanınması üçün bu sərəncam olduqca mühüm addımdır.
- Nurəddin Mehdixanlı: “Bütün dünya bilsin ki, Şuşa Azərbaycanındır və Azərbaycan mədəniyyətinin paytaxtıdır”
Xalq artisti Nurəddin Mehdixanlı bildirdi ki, məlum sərəncamdan sonra Şuşa şəhəri tarixi muzeyə çevriləcək: “Bu, olduqca düzgün qərardır. Danılmaz faktdır ki, Şuşa qeyri-rəsmi Azərbaycan mədəniyyətinin paytaxtı idi. Şuşa mədəniyyətimizin, ədəbiyyatımızın, musiqimizin paytaxtıdır. İndi Azərbaycan mədəniyyətinin paytaxtı kimi rəsmi status alıb. Bunu ancaq alqışlamaq olar. Bundan sonra qoy bütün dünya bilsin ki, Şuşa Azərbaycanındır və Azərbaycan mədəniyyətinin paytaxtıdır”.
Günel CƏLİLOVA
