Ermənistan, bir qayda olaraq, yalan danışır, saxtakarlıqla məşğul olur, əsassız bəyanatlar verir, çağırışlar edir.
İşğalçı dövlətin Xarici İşlər Nazirliyinin hər zaman təxribatla məşğul olduğu, 44 günlük müharibədən sonra isə bu təxribatları daha da alovlandırdığı məlumdur. Şuşadan və buradakı məşhur Qazançı kilsəsindən əl çəkməyən Ermənistan onlara heç bir aidiyyəti olmayan Qazançıya qarşı əsassız iddialarını davam etdirir.
Ermənistanın xarici işlər naziri Ara Ayvazyan yenə də hədyan danışır, iftira atır. A.Ayvazyanın həyasızlığı o qədər həddini aşıb ki, Şuşadakı Qazançı kilsəsinin “erməni apostol kilsəsinin ibadət yeri olaraq qalmalı olduğunu” iddia edir.
Şuşanın Qazançı kilsəsinin məşhur rus pravoslav kilsəsi olduğunu və sonradan ermənilər tərəfindən memarlıq quruluşunun dəyişdirildiyini və erməniləşdirildiyini deyən alimlər bildirirlər ki, Qazançı kilsəsinə ermənilər qondarma “Qazançetsots” kilsəsi adını veriblər.
Vaxtilə bu kilsənin yerində Zərdüşt məbədi olub, bu kilsə isə Zərdüşt məbədinin üzərində inşa edilib.
Bütün bunlar faktdır.
İndi qayıdaq A.Ayvazyanın “Qazançetsots” kilsəsi ətrafında yaratdığı şouya. İddia edir ki, Azərbaycan bu kilsənin “görkəmini dəyişir”. O hələ deyib ki, guya Qazançı kilsəsi “ən böyük erməni kilsələrindən biridir”.
Mütəxəssislər deyirlər ki, Ermənistanın və bəzi beynəlxalq təşkilatların Qarabağdakı xristian abidələrinin, kilsə və monastırların ətrafında canfəşanlıq etməsi şoudan başqa bir şey deyil. Qazançı kilsəsi Azərbaycanın abidələrindən, xristian dini ibadətgahlarından biridir.
“...öz siyasi məqsədi üçün istifadə etmək istəyir”
Azərbaycan Milli Elmlər Akademiyasının Qafqazşünaslıq İnstitutunun Ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, Qazançı kilsəsi ilə bağlı ermənilər indiyə qədər çox uydurmalar düzəldiblər. Professorun sözlərinə görə, bir müddət əvvəl ermənilər yalandan məlumat yaymışdılar ki, guya Şuşadakı Qazançı kilsəsi Naxçıvanın Qazançı kəndindən olan ermənilərin vəsaiti hesabına “inşa olunub”, ona görə də Qazançı adlandırılır. Bütün bunların yalan və saxtakarlıq olduğunu deyən Q.Hacıyevin bildirdiyinə görə, indi də bu iddialara Ermənistanın xarici işlər nazirinin qoşulması onu göstərir ki, Ermənistan heç vaxt öz məkrli, çirkin niyyətlərindən əl çəkməyib, yenə də onlara aid olmayanları mənimsəmək yolunu tutublar. Q.Hacıyev vurğuladı ki, Qarabağdakı kilsələrin, məbədlərin, xristian abidələrinin hamısı Qafqaz Albaniyası dönəmindən yadigar qalıb. Müsahibimizin sözlərinə görə, alban məbədlərindən əvvəl isə Azərbaycanın Qarabağ bölgəsində və digər ərazilərində Zərdüşt məbədləri olub. Alban kilsələrində sonradan ruslar, işğal dövründə isə ermənilər ibadət ediblər, bu azmış kimi, alban məbədlərini ermənilərin adına çıxıblar. “Son dövrlər A.Ayvazyan çox bu cür cəfəngiyyat danışır. Ermənistanın Xarici İşlər Nazirliyinə rəhbərlik edən bir adam anlamır ki, nə qədər hiyləgərlik, nə qədər saxtakarlıq etsə də, öz əsassız bəyanatları ilə özünü və ölkəsini ifşa edir. Necə olur ki, münaqişənin həlli istiqamətində bir dənə də olsun konstruktiv mövqe tutmadılar, sülh danışıqlarını əymək üçün hər cür oyunlardan çıxdılar, torpaqlarımızı qaytarmaq istəmirdilər, bütün maddi-mədəni irsimizi, dini abidələri yerlə yeksan etdilər, vandalizm aktı törətdilər, o zaman heç haqq-ədalət yadlarına düşmürdü. İndi Azərbaycan öz torpaqlarını işğaldan azad edib, Ermənistan haqq-ədalətdən, dindən-imandan, qarşılıqlı hörmətdən danışır, UNESCO-dan misal çəkir. Bütün bunlar hamısı Ermənistanın çirkin məqsədlərinə xidmət edir. Ermənistan bu gün Qazançı kilsəsi ətrafında süni şou yaratmaqla ondan öz siyasi məqsədi üçün istifadə etmək istəyir. Siyasətin çox üzü var, Ermənistanın apardığı siyasət çox hiyləgər, məkrli, çox mənfur siyasətdir, heç bir ədalət prinsipinə uyğun gəlməyən siyasətdir. Ermənistanın bu gün səmimi münasibətdən, qarşılıqlı hörmətdən, sülhdən, dindən danışması çox yersiz və mənasızdır. Şuşada, bütövlükdə, Qarabağ ərazisində mövcud olan heç bir xristian dini abidəsinə, kilsəyə, monastıra ermənilər, Ermənistan heç bir iddia irəli sürə bilməz. İndiyə qədər min dəfə ən müxtəlif səviyyələrdə bəyan edilib ki, ermənilərin burada nə torpağı, nə toponimləri, nə də mədəni irsi olub, Qarabağda da mövcud olan xristian abidələrinin də heç birinin ermənilərə aidiyyəti yoxdur. Ayvazyanın Qazançı ilə bağlı irəli sürdüyü iddia tamamilə əsassızdır və bu bir fürsətgirlikdir, o, beynəlxalq təşkilatları da erməni saxtakarlığına şərik etmək istəyir, necə ki, indiyə qədər ediblər. Qazançı kilsəsi tarixən erməni kilsəsi olmayıb və bu kilsəyə erməni iddiasının heç bir əsası yoxdur”.
Q.Hacıyev qeyd etdi ki, Ermənistan II Qarabağ müharibəsinin gedişində də Qazançı ətrafında şou yaratmağa cəhd etmişdi. “Yadınıza gəlir, müharibənin gedişində ermənilər özləri Qazançı kilsəsini dağıtmışdılar, yalandan da dünyaya car çəkdilər ki, guya Azərbaycan Şuşadakı Qazançı kilsəsini dağıdıb. Müharibə dövründə də Ermənistan Qazançı kilsəsi ətrafında “Azərbaycan tərəfindən dağıdılıb” şousu qurmuşdu, Ayvazyanın son iddiası da bu şounun tərkib hissəsidir.
Bilirik ki, bu, erməni iftirasından başqa bir şey deyildi. Azərbaycan müharibə dövründə mülki obyektlərə, dini ocaqlara, ibadət yerlərinə bir dənə də olsun güllə atmayıb. Şuşadakı Qazançı kilsəsinin damına Ermənistanın özü zərbə endirmişdi və “biz burada əzilən xristianıq, Azərbaycan bizim abidəmizi dağıdır” deyə bütün dünyanı aldatmağa çalışmışdılar. Amma elə o xristian dünyasından gələn jurnalistlər də təsdiq etdilər ki, kilsəni ermənilər özləri vurublar. Bu gün xristian dünyası ermənilərin normal xristian olmadığını yaxşı bilirlər. İndi də bu məsələni ortaya atıblar. Hesab etmirəm ki, Ermənistanın müharibədən sonra tutduğu mövqe onlara xeyir edəcək. Onlar bizə heç bir ziyan edə bilməz, çünki artıq dünyada böhtanlar keçmir. Azərbaycan Ordusu dövlət başçısının rəhbərliyi ilə öz ərazilərimizi işğaldan azad edib, o ərazilər Azərbaycana məxsusdur” - deyə Q.Hacıyev vurğuladı.
İradə SARIYEVA
