Məlum olduğu kimi, Latviya parlamenti də qondarma “erməni soyqırımı”nı tanıyan qərar qəbul edib. Uydurma “soyqırım”ın Latviya tərəfindən bu şəkildə qəbul edilməsi yolverilməzdir və buna hər kəs öz etiraz səsini qaldırmalıdır.
Türkiyə Xarici İşlər Nazirliyi Latviya parlamentinin qondarma “soyqırım” qərarına sərt reaksiya verib: “Bu gün Latviya parlamenti tərəfindən qəbul edilən və 1915-ci il hadisələrini “soyqırım” kimi tanıyan qərar tarixin siyasi motivlərlə yenidən yazılması üçün göstərilən boş bir cəhddir. Bu uğursuz və qanunsuz qərarı rədd edirik və şiddətlə qınayırıq”.
Bəyanatda bildirilir ki, parlamentlər tarix yazmaq və mühakimə etmək üçün yer deyil.
Latviya parlamentinin qəbul etdiyi bu əsassız qərara qarşı Bakıdakı Latviya səfirliyinə heç olmasa QHT-lər səviyyəsində etiraz bildirmək olmazdımı?
“Bizim təşkilat Latviya səfirliyinə öz etirazını bildirəcək, başqa təşkilatların da bu addımı atacağına inanıram”
“Müasir İnkişaf” Birliyinin rəhbəri, politoloq Mübariz Göyüşlünün fikrincə, indiyə qədər Azərbaycanda müxtəlif təşkilatların Latviya parlamentinin qəbul etdiyi yanlış qərar ona görə diqqətlərini cəlb etməyib ki, bu ölkənin nə yerləşdiyi regionda, nə də dünyada elə də çəkisi və nüfuzu yoxdur.
“Latviya parlamentinin qəbul etdiyi bu üzdəniraq qərara Azərbaycan ictimaiyyətinin reaksiya verməməsinin səbəbi Latviyanın bir ölkə kimi nə yerləşdiyi regionda, nə də dünyada hər hansı bir təsir imkanlarına malik olmamasıdır. Hər halda, belə düşünürəm. Amma ABŞ Prezidentinin rəhbərlik etdiyi ölkənin dünyaya təsir gücü böyük olduğu üçün Baydenin “soyqırım” sözü işlətməsinə Azərbaycandan da ən müxtəlif səviyyələrdə sərt reaksiya verildi. Bu baxımdan, ABŞ-la Latviyanın dünyaya təsirini heç cür müqayisə etmək mümkün deyil. Amma, əlbəttə, Latviyanın ermənipərəst qərarına qarşı həm qeyri-hökumət təşkilatlarının, həm siyasi partiyaların, həm də digər təşkilat və qurumların ayrı-ayrılıqda etiraz bəyanatları qəbul etməsi gec deyil. Bu gün ən müxtəlif qurumlar səviyyəsində Latviya səfirliyinə ölkəsinin parlamentinin qəbul etdiyi “soyqırım”ı tanıma qərarı ilə bağlı etirazlar bildirilməli, narazılıq ifadə edən müraciətlər göndərilməlidir. Hətta aidiyyəti dövlət qurumları da bu məsələyə reaksiya verə bilər. Baxmayaraq ki, dediyim kimi, Latviya dünyada kifayət qədər beynəlxalq rəyə, dünyada geosiyasi proseslərə təsir edəcək bir dövlət deyil, o qədər çəkisi yoxdur, amma biz öz etirazlarımızı bildirməliyik ki, Latviya yanlış qərar qəbul etdiyini anlasın, bu yanlış addımı təkrarlamağa hazırlaşan dövlətlər varsa, onlar da bu addımı atmaqdan çəkinsinlər. Əlbəttə, Latviya da, digər ölkələr də bilməlidirlər ki, qardaş Türkiyə tək deyil və Azərbaycan hər zaman onunladır”.
M.Göyüşlü hesab edir ki, rəhbərlik etdiyi təşkilat Latviyanın ölkəmizdəki səfirliyinə etiraz bəyanatı göndərəcək, digər təşkilatların da bu addımı atacağına inandığını deyən müsahibimiz hesab edir ki, Latviya səfirliyi ölkəsinin parlamentinin qəbul etdiyi yanlış qərardan ölkəmizin bütün ictimaiyyətinin narazı olduğunu bilməlidir”.
İradə SARIYEVA
