Qafqaz Albaniyasının, xristian albanların bütün irsini məhv edən, saxtakarcasına erməniləşdirən erməni qriqorian kilsəsi Eçmiədzin (indi özlərini qanunsuz olaraq “apostol kilsəsi” adlandırırlar - İ.S.) tərəfindən Azərbaycana qarşı iftiralar davam etdirilir və əsassız olaraq guya Azərbaycanın Qarabağda “erməni dini abidələrinə, dini məkanlarına qarşı mədəni soyqırım törətdiyi” iddia olunur.
Hətta bu barədə bəyanat da yayıblar və əssasız iddialar əsasında hazırladıqları bəyanatda qeyd edirlər ki, guya Qarabağda “erməni irsi” “itirilir”. Eçmiədzin kilsəsinin başbilənlərinin yalanlarına baxın, iddia edirlər ki, Azərbaycanın nəzarətində olan ərazilərdə çoxlu sayda monastır, kilsə “dağılıb”, “təhqir edilib”, “ermənilərə məxsus kitabələr dağıdılıb, onlara ziyan vurulub”, guya xaçqarlar, qəbiristanlıqlar “təhqir olunub”. Başdan ayağa saxtakarlıq, hiylə, oğurluq, terror içinə batan Eçmiədzin kilsəsi Azərbaycanı “saxtakarlıqda”, “təhrifdə”, “mədəni soyqırımda” ittiham edərək bizə şər atır, qarayaxma kampaniyası aparır. Eçmiədzin başbilənləri böyük saxtakarlığa yol verərək bəyanatlarında bildirirlər ki, guya Azərbaycan “150-yə yaxın erməni müqəddəs məbədini (?) udilərə məxsus irs kimi təqdim edir”. Eçmiədzinin bu əsassız, heç bir fakta söykənməyən, yalnız erməni iddialarını və xəstəliyini ifadə edən bu bəyanatı Azərbaycanın ətrafında yeni şər kampaniyası yaratmağa xidmət edir.
Alban-udi mədəniyyətini, bütövlükdə, Azərbaycana məxsus Qafqaz Albaniyasının irsini talan edən, mənimsəyən Eçmiədzin kilsəsinin bu iddiasına həm alban-udi icmasının, həm də QMİ-nin münasibətini öyrənməyə çalışdıq.
Eçmiədzin kilsəsinin tamamilə saxtakarlıq üzərində köklənən və beynəlxalq aləmdə çaşqınlıq yaratmağa xidmət edən bu davranışlarına qarşı QMİ sədri nə etməlidir? Alban-udi icması hansı işləri görmək niyyətindədir?
“Qarabağda bir dənə də olsun erməni məbədi olmayıb, oradakı bütün məbədlər alban məbədləridir, ona görə də “150 müqəddəs erməni məbədi” iddiası da saxtakarlıqdan başqa bir şey deyil”
Alban-udi icmasının rəhbəri Robert Mobili “Bakı-Xəbər”ə bildirdi ki, bu, Eçmiədzin kilsəsinin növbəti şər-qarayaxma kampaniyasıdır, beynəlxalq ictimaiyyətin diqqətini bu cür iftiralara yönəltməyə xidmət edir. R.Mobilinin sözlərinə görə, 44 günlük müharibədə qələbə çalıb Ermənistanı məğlub etmişik, amma onlar bizə qarşı “soyuq müharibə”ni davam etdirirlər. “Birincisi, Azərbaycan hələ heç bir kilsədə bərpa işləri aparmayıb. Hələ ki, orada inventarlaşma işləri gedir. Eçmiədzin alban irsinin adını çəkmir, qəsdən “udi irsi” deyir. Özü də Eçmiədzin kilsəsi birdəfəlik bilsin ki, udi kilsəsi yoxdur, bu, alban apostol kilsəsidir. Alban kilsəsi də müstəqil kilsə idi. Qarabağdakı kilsələr qədim alban kilsələridir və onların erməni kilsəsi ilə heç bir bağlantısı yoxdur. Qarabağdakı kilsələr udi kilsələri deyil, udilər isə alban kilsəsinə aid olan bir dini icmadır ki, biz o kilsəni yaşadırıq. Əsas odur ki, Qarabağdakı kilsələr alban kilsələridir. Eçmiədzin bəyanat yayıb ki, guya Azərbaycan “erməni irsini saxtalaşdırıb”. Əksinə, 30 ildə ermənilər alban kilsəsini saxtalaşdırıb, dağıdıb, hər bir abidənin üzərində vandalizm əlamətləri qoyublar. Biz onu yaxşı görürük. Hətta biz ermənilərin qanunsuz hərəkətlərini Xudavəngə gedəndə də görürük, “şəkil çəkdirmək olmaz”, “video çəkməyin” deyirlər. Qədim alban monastırı olan Xudavəngdə də qanunsuz olaraq erməni dindarları oturublar. Biz nə saxtalaşdırma apara bilərik? Biz haranı dağıda bilərik? Azərbaycanda başqa kilsələr yoxdur ki? Qarabağdan başqa Azərbaycanın başqa yerlərində də qədim alban kilsələri var. Şəkidə, Qəbələdə, Qubada və başqa yerlərdə görün nə qədər kilsə mövcuddur. Məgər bu kilsələri biz dağıtmışıq? Burada söhbət nədən gedir? Söhbət ondan gedir ki, Eçmiədzin Qarabağdakı alban kilsələrini öz qanonik ərazisində saxlamaq istəyir. Buna görə də Azərbaycana qarşı ləkə atmaq isəyirlər ki, guya Azərbaycan kilsələri dağıdır. Azərbaycan heç bir abidəni dağıtmayıb, əksinə, bərpa edir. Azərbaycan nə üçün Allahın evini dağıtmalıdır? Sadəcə olaraq, alban kilsələrinin bərpası zamanı ermənilərin orada apardıqları saxtalaşdırmanı, qoyduqları saxta simvolları, gəlmə elementləri sözsüz ki, dünya ekspertlərinin iştirakı ilə götürəcəyik. Biz hələ heç bir addım atmamışıq, bunlar yenidən yalandan çığır-bağır salırlar. Eçmiədzin yenə də nağıl danışır, mifik erməni “müqəddəs məbədləri” uydurur. Qarabağda bir dənə də olsun erməni məbədi olmayıb, oradakı bütün məbədlər alban məbədləridir, ona görə də “150 müqəddəs erməni məbədi” iddiası da saxtakarlıqdan başqa bir şey deyil”.
Alban mədəniyyətinin adının Eçmiədzinin məlum üzdəniraq bəyanatında məqsədli şəkildə çəkilmədiyini qeyd edən R.Mobili hesab edir ki, alban kilsələri təkcə udilərin deyil, bütövlükdə, Azərbaycan dövləti və xalqının irsidir: “Bu gün hər bir Azərbaycan vətəndaşı, hər birimiz alban kilsəsinin, alban mədəniyyətinin varisiyik. Burada udi kilsəsindən yox, alban kilsəsindən söhbət gedir. Görürsünüz ki, Eçmiədzinin bəyanatında bir dəfə də olsun alban sözü işlədilmir, bunu qəsdən ediblər. Unudurlar ki, bu kilsələr alban kilsələridir, bu gün udilər alban kilsəsinin dini varisləridir. Bu gün alban kilsələri Eçmiədzinin boğazında bir sümükdür, bilmirlər nə etsinlər ki, Azərbaycana ləkə atsınlar”.
Eçmiədzinin bu yalançı, saxtakar bəyanatına, kampaniyasına qarşı QMİ, Dini Komitə və digər dini konfessiyaların hansı addım atmalı olduğuna gəlincə, R.Mobili bildiridi ki, bu, bütövlükdə, ölkəmizlə, dövlətimizlə bağlı məsələdir və hər kəs erməni şərinə qarşı həmrəylik göstərməlidir: “Bu, Eçmiədzin kilsəsi tərəfindən dövlətimizə qarşı aparılan şər kampaniyasıdır. Bu baxımdan hesab edirəm ki, Azərbaycanda fəaliyyət göstərən bütün dini konfessiya rəhbərləri beynəlxalq ictimaiyyətə müraciət etməlidirlər. Ermənistan müharibədə uduzduqdan sonra indi istəyir ki, xristian adından istifadə edib, “kilsələri qoruyuruq, xristian mədəniyyətini saxlayırıq” adı altında Qarabağı “öz qanonik ərazisində” saxlasın. Mən bunu Xudavəngə gedəndə də hiss etdim. Bizim gedib orada ziyarət etməyimiz erməniləri çox qıcıqlandırır. Eçmiədzin kilsəsi qorxur ki, sabah Azərbaycanda alban kilsəsinin müstəqilliyi bərpa olar, onun varisi var. Bu gün alban kilsəsinin birbaşa varisi Azərbaycandır. Ona görə də bu cür şər-böhtan kampaniyası aparırlar ki, Qarabağdakı xristian irsi guya ermənilərə məxsusdur. Eçmiədzin görür ki, biz Xudavəngə ziyarətə gedərkən başqa xristian konfessiyalarının nümayəndələri də bizimlə getdilər. Bu gün Eçmiədzin Azərbaycana qarşı təxribatla məşğul olur və hər birimiz bu təxribatın qarşısını almağa səfərbər olunmalıyıq. Ermənilər dünyanı növbəti dəfə öz yalanlarına inandırmağa çalışırlar və hər cür çirkinliklərə əl atırlar. Biz onların hər bir təxribatına cavab verməyə hazır olmalıyıq” - deyə R.Mobili qeyd etdi.
İradə SARIYEVA
