Faşist əlaltısı kimi tarixə düşən, nasizmə xidmət edən, Hitlerin əlbuyruqçusu Qaregin Njdenin ermənilər tərəfindən “qəhrəmanlaşdırılması” və ona abidələr qoyulması faktı artıq dünyanın ayrı-ayrı ölkələrində, xüsusən də faşizmlə mübarizədə aktiv iştirak etmiş ölkələrdə narazılıqla qarşılanır.
Rusiyada da müxtəlif səviyyələrdə faşizm qulu Njdenin abidələrinin qoyulması ciddi etirazla qarşılanır. Məlum olduğu kimi, Moskva vilayətindən olan Müharibə və Əmək Veteranları Şurası tərəfindən Qarabağda nasist Njdeyə ucadılmış abidənin götürülməsi ilə bağlı Rusiya rəhbərliyinə, Xarici İşlər Nazirliyinə, Müdafiə Nazirliyinə müraciət edilib. Moskva vilayətinin Müharibə və Əmək Veteranları Şurasının təmsilçiləri faşizm tör-töküntüsünə abidə qoyulmasının, onun qəhrəman kimi təqdim edilməsinin yolverilməz olduğunu qeyd ediblər. Bu barədə qəbul edilən bəyanatda vurğulanır ki, Polşada, Ukraynada minlərlə mülki şəxsə qarşı döyüşən “Erməni legionu” və orada təmsil olunan Njde çoxsaylı cinayət törədib. Burada Njdenin də daxil olduğu canilər tərəfindən Qərbi Krımda iyirmi mindən çox mülki şəxsin öldürülməsi qeyd olunur. Faşizm üzərində qələbənin keçmiş SSRİ-nin bütün xalqlarını birləşdirən bir hadisə kimi əhəmiyyətini vurğulayan təşkilat Rusiyanın sülhməramlı kontingentinin Qələbə gününü qeyd edəcəyi ərazidə belə bir abidənin götürülməsinin vacibliyini vurğulayır. Veteranlar Njdenin abidəsinin qoyulmasının faşizm üzərində qələbəyə kölgə saldığını bildiriblər.
Ekspertlər deyirlər ki, Moskva vilayətindən olan Müharibə və Əmək Veteranları Şurasının Qarabağda nasist Njdeyə ucadılmış abidənin götürülməsi ilə bağlı Rusiya rəhbərliyinə müraciəti olduqca vacib bir müraciətdir.
“...Azərbaycan Prezidenti İlham Əliyevin bu istiqamətdə apardığı məqsədyönlü siyasətin nəticəsidir”
Azərbaycan Respublikası Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov “Bakı-Xəbər”ə bildirdi ki, faşist Njdenin abidəsinin yalnız Qarabağdan deyil, İrəvandan da götürülməsi məsələsi olduqca vacibdir. C.Xəlilov qeyd etdi ki, Njde kimi faşist əlaltısının abidəsinin qoyulması və onun “qəhrəmanlaşdırılması” faşizm üzərində qələbəyə kölgə salır. “Bizim təşkilat da faşist nökəri, əlaltısı Njdenin abidəsinin götürülməsi ilə bağlı təxminən beş-altı il bundan əvvəl Rusiya rəhbərliyinə müraciət edib. Bundan başqa, dünya veteranlarına, faşistlərə qarşı mübarizə aparan koalisiyalara, beynəlxalq təşkilatlara müraciət ünvanlamışıq. Bu gün də bizim təşkilatın rəyasət heyətinin iclası olub və rəyasət heyəti bəyanat qəbul edib. Moskva vilayətindən olan Müharibə və Əmək Veteranları Şurasının Rusiya rəhbərliyinə müraciətini təqdir edirik. Gördüyünüz kimi, artıq Rusiyada da Njdenin abidəsinin Qarabağdan götürülməsi tələbi genişlənir, bu baxımdan, faşist Njdenin abidəsinin tezliklə götürüləcəyini düşünürük. Rusiyanın sözügedən təşkilatının Rusiya rəhbərliyinə müraciətini həm də bizim təşkilatın illərdir apardığı mübarizəyə bir dəstək hesab edirik. Bu gün Rusiya veteranlarının da Qarabağdan faşist Njdenin abidəsinin götürülməsi ilə bağlı Rusiya rəhbərliyinə müraciət etməsi Azərbaycan Prezidenti İlham Əliyevin bu istiqamətdə apardığı məqsədyönlü siyasətin nəticəsidir. Bilirsiniz ki, Prezident İlham Əliyevin bu barədə xüsusi çıxışı olub, müraciəti olub, bu onun nəticəsidir. Bundan əvvəl Prezident İlham Əliyevin müraciəti ilə əlaqədar Njdenin Armavirdə qoyulan abidəsi Rusiyanın dövlət qurumları tərəfindən götürülüb. Faşizm üzərində qələbənin qazanılmasında rolu, əməyi, birbaşa iştirakı olanların hamısı Njdenin abidəsinin götürülməsini istəyir, çünki onun “qəhrəmanlaşdırılması” faşizmlə mübarizəyə ləkə gətirir. Fikrimcə, nəinki Qarabağda, İrəvanın özündən də Njdenin abidəsi götürülməlidir” - deyə C.Xəlilov vurğuladı.
İradə SARIYEVA
