Azərbaycan işğaldan azad edilən rayonlarında quruculuq işlərini sürətlə davam etdirir. Tikintisinə start verilən önəmli obyektlərdən biri də Füzuli aeroportudur. Bununla yanaşı Kəlbəcər və Laçında da yeni aeroportların tikiləcəyi bildirilib.
Bunu Azərbaycan Prezidenti İlham Əliyev bəyan edib. Ölkə başçısı bir neçə ay əvvəl qeyd edib ki, Laçın və ya Kəlbəcər rayonlarının ərazisində müasir beynəlxalq hava limanının tikilməsi üçün yer axtarılır: “Düzdür, orada relyef çox çətindir və demək olar ki, ərazilərin mütləq əksəriyyəti dağlıq ərazilərdir. Orada düz yer tapmaq çətindir, amma indi araşdırmalar gedir, ümid edirəm ki, yaxın gələcəkdə mənə məlumat veriləcək. Beləliklə, ya Laçın, ya da Kəlbəcər rayonunda yeni beynəlxalq hava limanı tikiləcək. Füzuli şəhərində isə beynəlxalq hava limanının tikintisinə artıq az vaxt qalıb. Göstəriş verilib, yaxın gələcəkdə artıq inşaat başlanacaq və bu il Füzuli şəhərində, – şəhərdən indi əsər-əlamət qalmayıb, – yaxud da ki, o ərazidə beynəlxalq aeroport fəaliyyətə başlayacaq. Bu, həm Qarabağ bölgəsinin inkişafı üçün lazımdır, çünki bütün növ təyyarələr enə biləcək – həm Füzulidə, həm Kəlbəcər-Laçın zonasında.
Eyni zamanda, Şuşaya gəlmək istəyən xarici qonaqlar rahat Füzuliyə enib, oradan avtomobillə Şuşaya gedəcəklər. Aeroportun tikintisi ilə paralel olaraq artıq Füzuli şəhərindən beynəlxalq uçuşların təşkili ilə bağlı ilkin araşdırmalar aparılmalıdır. Beynəlxalq aeroport beynəlxalq uçuşlar təşkil etməlidir. İlk növbədə, bizim aviaşirkətimiz “AZAL” bu məsələ ilə bağlı ciddi işləsin ki, aeroport açılandan sonra dərhal bizim qonşu ölkələrin bəziləri ilə hava nəqliyyatı təmin edilsin”.
Maraqlıdır ki, bəzi radikal dairələr bir-birinə yaxın olan rayonlarda beynəlxalq aeroportların tikintisinə lüzüm görmədiklərini bəyan edir. Onların qənaəti budur ki, bu əlavə xərc dəməkdir və Füzulidəki beynəlxalq aeroport bölgənin bütün ehtiyaclarını ödəmək gücündə olacaq. Bunun əksini düşünənlər isə iddia edir ki, rayonların yaxın olmasına baxmayaraq, aeroportların tikintisinin böyük hərbi-strtaeji əhəmiyyəti var. Bu barədə ekspertlər nə düşünür?
Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, Azərbaycanın risq zonasına aid olan ucqar rayonlarında bu cür strateji obyektlərin inşası geniş əhəmiyyət daşıyır: “Bunu görməmək üçün sadəcə kor olmaq lazımdır. Biz 44 günlük müharibədə qələbə qazandıq. Bu, tarix üçün böyük müddət deyil, ancaq 30 illik mübarizəmizin son akkordu sayılır. Azərbaycanın bu müharibədə qazandığı ən böyük qələbə 5 min kvadratlıq ərazini müharibə yolu ilə işğaldan azad etməsi oldu. Düzdür, itkilərimiz, qazilərimiz də var. Şükürlər olsun ki, Azərbaycan nəzarətinə keçən ərazilərdə strateji layihələri reallaşdırmaq fikrindədir. Mən inanıram ki, cənab Prezidentin rəhbərliyi altında bu layihələr reallaşacaq. Laçın və Kəlbəcərdə aeroportun tikilməsi olduqca önəmlidir. Çünki razılaşaq ki, həmin ərazilər risq zonasında yerləşir. Bu təhlükəni sifira endirmək üçün Azərbaycan dövləti çox ideal bir yol tutub. Bunu şərtləndirən əsas amillər əlaqə və kommunikasiya xətləridir. Bunlardan biri də beynəlxalq hava limanlarının tikintisidir. Bu çox böyük bir uğurdur. Azərbaycan dövlətinin bu günün özündə də düşmənə qarşı apardığı mübarizənin vacib elementidir. Əgər kimsə Laçında, Kəlbəcərdə hava limanının inşasına bir az tərəddüd, bir az emosiya ilə yanaşırsa, getsin öz işi ilə məşğul olsun. Bu çox böyük və hərbi-strateji əhəmiyyəti olan layihədir”.
Ekspert fikrini bununla əsaslandırdı ki, sabah həmin ərazilərdə hər hansı təhlükə yaranarsa, Azərbaycanın ucqar nöqtəsilə əlaqəsi dəqiqələr ərzində reallaşacaq: “İstənilən vaxt öz gücümüzü həmin rayonlara etap edə biləcəyik. Çətin relyefdə belə biz öz gücümüzü tam ifadə edə biliriksə, deməli, düşmən bundan narahat olmaya bilməz. Azərbaycan dövlətinin Qarabağla bağlı siyasətinin ən böyük uğuru kimi qiymətləndirirəm. Bu işdə ölkə rəhbərliyinə uğurlar arzulayıram”.
Məhəmmədəli QƏRİBLİ
