Aydın Mirzəzadə: “Bu gün hər iki tərəf bu əməkdaşlıqda maraqlıdır”
Bildiyimiz kimi, 4 may 1994-cü il tarixində Azərbaycan Respublikası NATO-nun “Sülh Naminə Tərəfdaşlıq” (SNT) Proqramına qoşulub. Artıq 27 ildir ki, Azərbaycanın NATO ilə səmərəli əməkdaşlığı mövcuddur.
Onu da vurğulayaq ki, ABŞ dövlət katibinin bu yaxınlarda Prezident İlham Əliyevlə telefon söhbətində Azərbaycanın Əfqanıstanda sülhməramlı missiyada iştirakını yüksək qiymətləndirdiyini, Azərbaycanın müasir və güclü orduya malik olmasını, Azərbaycan Ordusunun regionda sabitlik və sülhün möhkəmlənməsinə xidmət etməsini vurğulayıb. Əlbəttə, 44 günlük Vətən müharibəsində bütün dünya Azərbaycan Ordusunun qeyri-adi döyüş taktikasının şahidi oldu.
Ötən 27 ildə Azərbaycanın NATO ilə əməkdaşlığını necə qiymətləndirmək olar?
- “Əməkdaşlığımızın, bir-birimizin maraqlarına hörmətlə yanaşmağımızın böyük bir gələcəyi var”
Millət vəkili, politoloq Aydın Mirzəzadə “Bakı-Xəbər”ə şərhində bildirdi ki, NATO və Azərbaycan arasında mövcud olan əməkdaşlıq, bütün mənalarda, böyük səmərə verib: “ NATO böyük tarixi olan və hərbi əməkdaşlıq sahəsində böyük təcrübəyə malik bir hərbi blokdur. Azərbaycan müstəqillik qazanandan, xüsusilə də ulu öndər Heydər Əliyev hakimiyyətə gəldikdən sonra NATO ilə əməkdaşlığa xüsusi əhəmiyyət verilir. Azərbaycan Ordusunun NATO standartlarında qurulması, hərbi kadr hazırlığında əməkdaşlıq, eyni zamanda, NATO hərbi təlimlərində Azərbaycan müşahidəçilərinin iştirakı kimi məsələlərin hamısı Azərbaycanın müasir Silahlı Qüvvələrinin formalaşmasında əsas faktorlardan biridir. Həmçinin də NATO-Azərbaycan əməkdaşlığı birgə layihələrdə iştirakda da özünü göstərir. Dünyanın bu və digər qaynar nöqtəsində Azərbaycan sülhməramlılarının iştirakı, Azərbaycan ərazisindən Əfqanıstana ABŞ-ın hərbi yüklərinin daşınması əməkdaşlığı və sair. Bunlar hamısı NATO-Azərbaycan əməkdaşlığını göstərir. Hər iki tərəf bir-birilə əməkdaşlıqda maraqlıdır. Azərbaycan hərbi təcrübəsi olan bir blokun təcrübəsinin əldə edilməsində, NATO silahları ilə silahlanmada marağını ortaya qoyur. Eyni zamanda, Azərbaycan NATO-nun işğal edilmiş ərazilərimizin geri qaytarılmasında göstərdiyi münasibətləri, vaxtaşırı ərazi bütövlüyümüzü dəstəkləyən bəyanatlarını da həmişə xatırlayır. Onu da qeyd edim ki, həmçinin, NATO Azərbaycan kimi Avropa dəyərlərinə əhəmiyyət verən, təbii sərvətlərdən gələn gəlirləri dövlətçiliyinə, sosial problemlərin həllinə, Silahlı Qüvvələrin möhkəmlənməsinə xərcləyən bir ölkə ilə əməkdaşlıqda maraqlıdır”.
A.Mirzəzadə bildirdi ki, bu gün Azərbaycan müasir standartlarla formalaşan uğurlu bir Asiya ölkəsidir və NATO bu ölkə ilə əməkdaşlıqda maraqlıdır. “Düzdür, NATO-da müəyyən ölkələr Azərbaycanı NATO-nun tərkibində görmək istəyərdilər. Amma Azərbaycan bloklara qoşulmamaq siyasətini həyata keçirir. Amma bu, eyni zamanda, NATO bloku ilə qarşılıqlı maraq kəsb edən və Azərbaycanın bloklara qoşulmamaq prinsipinə zidd olmayan məsələlərdə əməkdaşlığına hər hansı bir problem yaratmır. Bu gün hər iki tərəf bu əməkdaşlıqda maraqlıdır, bu əməkdaşlığı inkişaf etdirmək istəyir. Hesab edirəm ki, əməkdaşlığımızın, bir-birimizin maraqlarına hörmətlə yanaşmağımızın böyük bir gələcəyi var” - deyə A.Mirzəzadə vurğuladı.
İradə SARIYEVA
