Afsəddin Nəbiyev: “Ola bilməz ki, İranın müvafiq qurumları bundan xəbərsizdirlər”
Məlum olduğu kimi, sosial şəbəkələrin İran seqmentində bu ölkənin Ermənistan vasitəsilə Qarabağa “yardım” çatdırmasını əks etdirən qalmaqallı görüntülər yayılıb.
Belə ki, bu yüklərin Ermənistandan keçərək, Rusiya sülhməramlılarının nəzarətində olan Azərbaycan ərazilərinə aparıldığı bildirilib. Məlumatda qeyd edilib ki, həmin yük avtomobillərində benzin, qaz, bitum, eləcə də qida, geyim məhsulları, tikinti malları qanunsuz daşınır. Bundan başqa, bildirilir ki, həmin avtomobillərlə əraziyə külli miqdarda narkotik daşınır.
İran hansı haqla bu “yardım”ı Azərbaycan ərazisinə çatdırır, rusiyalı sülhməramlılar isə niyə bu qaçaqmalçılığa göz yumurlar?
Bununla yanaşı, Azərbaycan gömrükçülərinin həyata keçirdikləri daha bir əməliyyat uğurla nəticələnib. Belə ki, 244 kiloqramdan artıq narkotik vasitə - heroinin ölkənin gömrük sərhədindən qaçaqmalçılıq yolu ilə keçirilməsinə cəhdin qarşısı alınıb. Cənub Ərazi Baş Gömrük İdarəsinin Biləsuvar gömrük postunda Azərbaycan ərazisindən tranzit keçməklə İran İslam Respublikasından Gürcüstana "Bitum membranı" yükü aparan "DAF" markalı, "WE261EW/UU260V" dövlət qeydiyyat nişanlı yük avtomobili saxlanıb və gömrük nəzarətinə cəlb edilib. Təkrar yoxlama zamanı avtomobilin qoşqusunun altında kustar üsulla düzəldilmiş gizli saxlanc yerindən 480 ədəd bağlama, həmin bağlamalarda isə qablaşdırılma ilə birgə çəkisi 244 kq 344 qram olan narkotik vasitə - heroin aşkar edilib. Faktla bağlı araşdırma aparılır.
Bütün bunlarla yanaşı, necə ola bilər ki, bu şeylər İran dövlət orqanlarından xəbərsiz gəlsin Qarabağa, ya Gürcüstana? İrandan çıxarılan bu qədər narkotik dövlət orqanlarının nəzarətindən kənar hərəkət edə bilərmi?
“Həmin görüntülər təsdiqini taparsa, rəsmi Tehran buna görə cavab verməlidir”
Məsələyə münasibət bildirən AMİP-in sədr müavini Afsəddin Nəbiyev İranın müvafiq orqanlarının bütün bunlardan xəbərsiz olduğunu istisna etdi: “Görünən odur ki, İranın bu bölgədə siyasi sabitliyin təmin olunmasında marağı yoxdur. İranın Azərbaycanla son 30 ildə apardığı siyasətində ölkəmizlə bağlı xoşagəlməz hadisələrlə çox rastlaşmışıq. İstər Azərbaycanın əraziləri işğal olunan dövrdə, istərsə də işğalın davam etdiyi vaxtlarda biz İranın Ermənistanla dostluq münasibətlərinı unutmamalıyıq. Bir məsələni də vurğulayım ki, ümumiyyətlə, İran ərazisindən Azərbaycana keçirilən narkotik dövriyyəsi ən böyük problemlərdən biri olaraq qalır. İllərdir buna son qoyulmur. Təkcə bu ilin birinci rübündə 1 tona yaxın narkotik vasitəni buraxılış məntəqələrindən keçirməyə cəhd edilərkən qarşısı alınıb. Bu rəqəmlər onu deməyə əsas verir ki, bir çox dövlət müasir dövrdə təkcə müharibələrlə deyil, eyni zamanda, gənclərimizin həyatını məhv edən bu vasitələrdən istifadə etməklə gələcəyimizə təhlükə törətməkdədirlər. Bu sahədə təhlükəsizlik və nəzarət tədbirlərini daha da gücləndirməliyik. Son vaxtlar bu sahədə gömrük orqanları yüksək performans nümayiş etdirirlər”.
Sədr müavini hesab edir ki, İran tərəfindən Azərbaycan ərazisinə, Qarabağa naməlum yüklərin keçirilməsi ciddi təəssüf doğurur: “Azərbaycan hökumətinin rəsmi mövqeyini gözləyirik. Həmin görüntülər təsdiqini taparsa, rəsmi Tehran buna görə cavab verməlidir. Ola bilməz ki, İranın müvafiq qurumları bundan xəbərsizdirlər. Çünki bu cür hallar yolverilməzdir. Nəinki İran, olsun Rusiya, nəzarət orqanlarımızın yoxlamasından keçməyən heç bir naməlum yük dövlətimizin ərazisinə keçirilə bilməz. Bir sözlə, işğaldan azad olunmuş ərazilərimizin sərhəd xəttini möhkəmləndirməliyik. Nəzarət-keçid məntəqələrində nəzarəti gücləndirmək üçün ayıq-sayıq olmalıyıq”.
Sədr müavini onu da qeyd etdi ki, döyüşlərdə göstərdiyimiz şücaəti, quruculuq, abadlıq işlərinin görülməsini sərhədlərimizin möhkəmləndirilməsi ilə tamamlayacağımıza inanır.
Vidadi ORDAHALLI
