Ermənilərin Azərbaycan torpaqlarında minalama cinayətlərinin yeni dəhşətli təfərrüatları açılır... Ekspertlərin qorxunc izahları...

İbrahim Rüstəmli: “Ermənistan terror üzrə ixtisaslaşıb, ona görə də mina terrorundan da bu şəkildə istifadə edib”

img

Dünyada baş verən heç bir müharibədə Ermənistanın işlətdiyi cinayət üsullarının bənzəri olmayıb. Torpaqlarımız işğaldan azad olunandan sonra şahidi olduq ki, işğal dövründə ərazilərimizin hər qarışı Ermənistanın terrorçu silahlı birləşmələri tərəfindən xaincəsinə minalanıb. Ermənistan isə hələ də minalanmış ərazilərin xəritəsini vermir ki, Azərbaycan minalanmış əraziləri müəyyən etsin və oraları təmizləsin.

Son günlərin araşdırmaları nəticəsində Ermənistanın yeni növ mina cinayətləri üzə çıxarılıb. Belə ki,  Ermənistanın silahlı qruplarının minaları dəri və sintetik içində maskaladığı üzə çıxıb. Onlar minanı aşılanmış dəri və sintetik köpükdən istifadə etməklə təbii daşa bənzədiblər və onları da müəyyən yerlərə düzüblər, kənardan baxan həmin o minanı daş hesab edə bilər və ona toxunmaqla həyatını itirər.

Ekspertlər hesab edirlər ki, bu növ cinayətlər normal ordusu və müharibə qaydalarına riayət edən ölkələr tərəfindən heç zaman edilmir. Dəri və sintetik köpükdən istifadə etməklə minaların üzlərinin maskalanması üsulu PKK, ASALA və digər terrorçu qruplara məxsusdur. Ekspertlər deyirlər ki, minaların da bu şəkildə ərazilərimizdə yerləşdirilməsi açıq göstərir ki, Ermənistan ordusunun tərkibində bizə qarşı PKK, ASALA və sair terror təşkilatları döyüşüb, burada öz cinayətkar üsullarını tətbiq ediblər.

  • “Dəri və sintetik köpük vasitəsilə minaların maskalanması terror üsulu yalnız Ermənistan kimi terrorçunun ağlına gələ bilərdi”

Tanınmış hərbi ekspert İbrahim Rüstəmli “Bakı-Xəbər”ə şərhində bildirdi ki, Ermənistanın bu hərəkəti terrorçulara xas olan xüsusiyyətdir. İ.Rüstəmlinin sözlərinə görə, minalara süni üzlük çəkmək yalnız erməni kimi terrorçu toplumun və terrorçu qrupların ağlına gələ bilər. Bunun çox iyrənc cinayət üsulu olduğunu deyən İ.Rüstəmli hesab edir ki, Ermənistan müxtəlif vaxtlarda mina terroru həyata keçirib. İ.Rüstəmlinin sözlərinə görə, Ermənistan dəfələrlə minaları üzlüyərək ya basdırıb, ya da ərazidə qoyub və nəticədə isə böyük tələfatla üzləşmişik. “Ümumiyyətlə, minalar haqqında, ilk növbədə, onu demək olar ki, mina “ağrılı silahdır”, o kimisə məhv etmək üçün ixtisaslaşdırılır, təyinatlaşdırılır. Yəni minalar zərərsizləşdiriməyincə zərərsizləşmir. Son 30 ildən artıqdır ki, terrorçu ermənilər insanlığa, bəşəriyyətə qarşı cinayətlərin ən sərt və ən ağılagəlməz növlərini tətbiq ediblər. Dəri və sintetik köpük vasitəsilə minaların maskalanması terror üsulu yalnız Ermənistan kimi terrorçunun ağlına gələ bilərdi. Bu, terrorçulara xas bir cinayət üsuludur. Ermənistan hər zaman terroru, terrorçuları dəstəkləyib, bütün dünya bu ölkəni terror ölkəsi kimi tanıyır. Ermənistanın terrorun ən ağılagəlməz növlərini tətbiq etdiyinin bütün dünya şahididir. Yadınıza gəlirsə, bir neçə il əvvəl uşaq oyuncağının içinə mina qoyub Tovuz çayına buraxmışdılar, həmin oyuncaq minadan iki uşağımız şəhid oldu. Ermənistan 30 ildə müharibə aparmayıb, terror aktları həyata keçirib, Azərbaycan xalqına, ərazilərinə qarşı terror cinayətləri törədib”.

İ.Rüstəmlinin sözlərinə görə, Ermənistan terrorun bütün növlərindən bizə və dünya xalqlarına qarşı istifadə edib, türk diplomatları qətlə yetirib, müxtəlif ölkələrdə terror aktları törədiblər. “Beynəlxalq aləmdə ermənilər və Ermənistan terrorçu kimi tanınır. Erməni terrorçularının törətdikləri terror aktları terrorun Ermənistanda dövlət səviyyəsində dəstəkləndiyinin göstəricisidir. Ermənistan terror üzrə ixtisaslaşıb, ona görə də mina terrorundan da bu şəkildə istifadə edib. Hesab edirəm ki, beynəlxalq aləm, beynəlxalq təşkilatlar Ermənistanın tətbiq etdiyi fərqli terror üsullarına qarşı səslərini qaldırmalıdırlar” - deyə İ.Rüstəmli qeyd etdi.

İradə SARIYEVA

Son xəbərlər