Uzun illər ATƏT-in Minsk Qrupunun həmsədri olmuş, guya Qarabağ məsələsini ədalətli qaydada həll eləmək missiyasını öz üzərinə götürmüş Fransa ölkəmizə qarşı növbəti təxribata hazırlaşır. Belə ki, fransalı deputatlardan biri Fransua Pupponi parlamentin müzakirəsinə daha bir anti-Azərbaycan qətnaməsinin layihəsini təqdim edib.
Ölkəmizin təcavüzkar kimi təqdim edildiyi sənədi Fransa parlamentinin 33 üzvü artıq dəstəkləyib. Onlar təkcə Dağlıq Qarabağla məhdudlaşmayıblar və Azərbaycanın azad etdiyi ətraf 7 rayonu da öz qətnamə layihələrində hansısa “təmas xətti zonası” elan ediblər. Bundan əlavə, sənəddə Azərbaycan işğal edilmiş ərazilərini azad etdiyi üçün qınanır. Qətnamə layihəsində, həmçinin, Bakıdan 60-dan çox erməni diversantının azad edilməsi tələb olunur.
Az öncə saxta “soyqırım”ın ildönümü ilə bağlı İrəvanda səfərdə olmuş Fransa Senatının sədri Jerar Larşe də eyni tələblə çıxış etmiş, Azərbaycanın suverenliyi və ərazi bütövlüyü əleyhinə digər təxribatçı açıqlamalar vermişdi. Məhz onun ermənipərəst açıqlamasına Azərbaycan Milli Məclisində sərt etirazlar ifadə olunmuş, rəsmi Parisin siyasətilə bağlı tənqidi fikirlər səslənmişdi. Hazırda Fransa açıq-aşkar Bakıya qarşı qərəzli mövqeyini davam etdirir.
Fransanın bu addımlarını necə dəyərləndirmək olar?
Politoloq Yeganə Hacıyeva “Bakı-Xəbər”ə açıqlamasında bildirdi ki, Fransa istər dövlət rəsmiləri, istərsə də qanunvericilik təşəbbüsləri səviyyəsində daima Ermənistanı dəstəkləyib: “Onların Cənubi Qafqazda ən çox üstünlük verdiyi ölkə Ermənistandır. Fransa daxilində Ermənistanın geniş lobbi qrupu var. Onların da Fransa rəsmilərinə və parlamentinə asan çıxışları var. Bu təşəbbüs də onlardan gəlir. Təqdim olunan sənəd bir neçə aspektdən yanlışdır. Beynəlxalq hüquq, siyasət və təhlükəsizlik baxımından çox yanlış sənəddir. Qətnaməni mən də oxumuşam. Söhbət yalnız Dağlıq Qarabağdan deyil, həm də ətraf 7 rayondan gedir. Fransanın hansısa parlamentarisinin beynəlxalq hüquqla tanınan başqa bir ölkənin ərazisi ilə bağlı iddialar irəli sürməsi həmin ölkədəki siyasi sistemin hansı səviyyədə qeyri-ciddi olmasını şərtləndirir. Əminəm ki, erməni lobbisinin arzusu olan həmin sənədi ona hazır təqdim ediblər. Amma parlament bunu ətraflı araşdıra da bilərdi. Dağlıq Qarabağla bağlı aparılan bütün danışıqlarda Ermənistanın özü də 7 rayondan çıxmağa razılıq verib. Yəni həmin ərazilərlə bağlı dərin mübahisə olmayıb. Dağlıq Qarabağın özü də BMT-nin tanıdığı Azərbaycan ərazisidir”.
Ekspertin sözlərinə görə, 60 diversantın azad edilməsilə bağlı tələb də hansısa ölkənin parlamentinin səlahiyyətinə aid olan məsələ deyil: “Fransa parlamenti Azərbaycanın öz ərazisində həbs etdiyi erməni diversantları heç cür tələb edə bilməz. Bu, hüquqi nonsensdir. Çox maraqlıdır ki, bu ölkə həm də ATƏT-in Minsk Qrupunun üzvüdür. Əslində bu cür addımları ilə Fransa çox-çox əvvəl özünü vasitəçilikdə oyundankənar vəziyyətə salıb. Çünki Fransa neytral ölkə kimi deyil, Ermənistanın təmsilçisi kimi çıxış edir. Belə addımları ilə Fransa Cənubi Qafqazda sülhün əleyinə çıxış edir. Bütün bunlar əsas verir ki, Azərbaycan Fransanın ATƏT-in Minsk Qrupundakı həmsədrlikdən kənarlaşması məsələsini qaldırsın. Artıq görünür ki, onlar tənqiddən nəticə çıxarmırlar. Bizim rəsmi qurumlar qətiyyətli mövqe ortaya qoyub, Fransanın həməsdrlikdən uzaqlaşdırılmasını tələb etməlidir. Fransa Minsk qrupunda Avropa Birliyinin nümayəndəsi kimi çıxış edir. Onun destruktiv mövqeyi həm də Avropa Birliyinin fəlsəfəsinə ziddir”.
Məhəmmədəli QƏRİBLİ
