Aynur Əzimzadə: “Hansı ölkənin hansı şəhərində ki, erməni məhəllələri var, həmin məhəllələrdə də qondarma “genosid”ə abidə qoyurlar, bunu da saya alırlar”
Qondarma “erməni soyqırımı” mövzusunun bir sıra ölkələrin əlində siyasi təzyiq oyuncağına çevrildiyi məlumdur. Bu uydurma iddiadan qardaş Türkiyəyə qarşı istifadə etmək istəyən qüvvələr var və onlar bu alətin “rolu”nu günü-gündən şişirdirlər. Elə ölkələr var ki, qondarma “soyqırım”a abidə qoyublar.
Yayılan məlumatlara görə, dünyanın 25 ölkəsində uydurma “erməni soyqırımı”na 135 abidə qoyulub. Rəqəm qəribə görsənir. Bu mənada ki, demək, dünyanın 20-dən artıq ölkəsi ya erməni lobbisinin əlində oyuncağa çevrilib, ya da bu abidələri qoymaqla Türkiyəyə qarşı xoşagəlməz münasibətlərini sərgiləmək istəyirlər, bununla da şərin yanında olduqlarını sübut etmiş olurlar. Ermənilər, iddia edildiyi kimi, dünyanın 25 ölkəsində uydurma “soyqırım”a 135 abidə qoyulmasına necə nail olublar? Ümumiyyətlə, 135 qondarma “soyrım abidəsi”nin qoyulduğu nə dərəcədə real ola bilər?
- “Bu rəqəm şişirdilmiş də ola bilər”
Azərbaycan Milli Elmlər Akademiyasının (AMEA) Qafqazşünaslıq İnstitutunun Ermənişünaslıq şöbəsinin kiçik elmi işçisi, ermənişünas Aynur Əzimzadə “Bakı-Xəbər”ə bildirdi ki, bu iddia ətrafında ciddi araşdırmalar aparılmalıdır. A.Əzimzadə hesab edir ki, erməni lobbisi harada güclü fəaliyyət göstərə bilirsə, həmin ölkələrə təzyiq göstərmək imkanları da böyük olur. Erməni lobbisinin təsiri ilə bəzi ölkələrdə qondarma “erməni soyqırımı”na abidə qoyulduğunu deyən A.Əzimzadə diqqəti bir mühüm məqama da çəkdi. O bildirdi ki, çox zaman bu abidələr xarici ölkələrdə, şəhərlərdə ermənilərin kompakt məskunlaşdıqları məhəllələrdə erməni icmasının vəsaiti hesabına qoyulur və bu, həmin ölkənin ictimaiyyətinin diqqətini elə də çəkmir. “Bilirsiniz, bu məsələ geniş araşdırılmalı və üzə çıxarılmalıdır ki, ermənilər hansı 25 ölkədəki 135 qondarma “soyqırım” abidəsindən danışırlar? Bu rəqəm şişirdilmiş də ola bilər. Çünki ermənilər hansı ölkədə kompakt yaşayırlarsa, yaşadıqları məhəllələrdə uydurma “erməni soyqırımı” abidəsi qoyurlar. Sonra da qondarma “erməni soyqırımı”na hansısa ölkədə abidə qoyulduğunu elan edirlər. Doğrudur, dünya ölkələri arasında uydurma “erməni soyqırımı”nı tanıyan ölkələr var. Bu ölkələrdə də “erməni soyqırımı” abidələri qoyulub”.
A.Əzimzadənin sözlərinə görə, Ermənistan Holokost qurbanlarına abidə qoymaqla istəyirdi ki, İsrail də qondarma “erməni soyqırımı”na abidə qoysun, amma İsrail bu addımı atmadı, ona görə də ermənilər İrəvanda Holokost qurbanlarına qoyulan abidəyə qarşı məlum iyrəncliklər həyata keçirdilər. Müsahibimiz dedi ki, elə ölkələr var ki, orada qondarma “erməni soyqırımı”na abidə qoyulması narazılıqla qarşılanıb.
Uydurma “erməni soyqırımı”na abidə qoyan ölkələrə gəlincə, mütəxəssis bildirdi ki, təkcə Fransanın üç şəhərində “erməni soyqırımı” abidəsi qoyulub. “Qondarma “erməni soyqırımı” abidələri əsasən Qərb dövlətlərində qoyulub. Təkcə Fransanın üç şəhərində - Marsel, Leon, Jardendə və ABŞ-ın bir neçə ştatında belə mifik abidələr var. Təsəvvür edin ki, Belçika, ABŞ, Kanada, Suriya, Argentina, Uruqvay, İran və başqa ölkələrdə qondarma “erməni soyqırımı” abidələrinin olduğu məlumdur. Ermənilər 25 ölkədə 135 abidənin olduğunu deməklə Ermənistan ərazisində olan abidələri də həmin sıraya daxil edirlər. Qondarma “soyqırım” abidəsi sonuncu dəfə 2015-ci ildə İrlandiyada qoyulub. Diqqətçəkən məqamlardan biri odur ki, uydurma “erməni soyqırımı”na abidələr keçən əsrin 60-cı illərindən qoyulmağa başlayıb”. A.Əzimzadənin fikrincə, qondarma “erməni soyqırımı” mövzusu elə keçən əsrin 60-cı illərindən başlayaraq Qərb dövlətləri tərəfindən gündəmə gətirilərək ondan Türkiyəyə qarşı siyasi təzyiq vasitəsi kimi istifadə edilməyə başlanıb və qondarma, mifik olayla bağlı abidələrin elə bu dövrdən qoyulması da təsadüfi deyil. “Keçən əsrin 60-cı illərindən başlayaraq qondarma “soyqırım” məsələsi əsasən Qərb dövlətləri tərəfindən gündəmə çıxarılır və bir siyasi təzyiq alətinə çevrilir. Erməni diaspor və lobbisinin Qərb dövlətləri ilə yaxın əlaqədə olduğu məlumdur. Erməni lobbi təşkilatları qondarma “erməni soyqırımı”na abidə qoyulması üçün fəaliyyət göstərdikləri ölkələrin hakimiyyətlərinə ciddi təzyiqlər göstəriblər. Çox güclü maliyyə resurslarına malik olan erməni diaspor təşkilatları bütün vasitələrlə hakimiyyətlərə təzyiq gösərə bilirlər. Uzağa getməyək, ABŞ-da ən güclü diaspor erməni diasporudur. Hansı ölkənin hansı şəhərində ki, erməni məhəllələri var, həmin məhəllələrdə də qondarma “genosid”ə abidə qoyurlar, bunu da saya alırlar. Bu o ölkələrdə baş verib ki, onlar uydurma “genosid”i tanıyıblar. Bu o ölkələrdə edilib ki, onlar qondarma “erməni soyqırımı” mövzusundan təzyiq aləti kimi istifadə etmək istəyirlər. Bu ölkələr isə bilavasitə ermənipərəst ölkələrdir və onlar qondarma “soyqırım”ı tanıyıblar, təbii ki, bunu öz maraqları naminə ediblər” - deyə bildirən ekspert qeyd etdi ki, bu abidələr, bütün hallarda, erməni lobbisinin maliyyə vəsaiti hesabına qoyulub.
A.Əzimzadənin fikrincə, erməni lobbisi də, onların havadarları da nə qədər çalışsalar da, istəklərinə nail ola bilməyəcəklər, çünki 1915-ci ildə ermənilər soyqırıma məruz qalmayıblar, əksinə, müsəlmanlar, türklər erməni terror təşkilatları tərəfindən kütləvi olaraq qətlə yetiriliblər, bu barədə bütün məlumatlar isə arxivlərdə qalır.
İradə SARIYEVA
