“KTMT üzvü olan Rusiya NATO üzvü Türkiyə ilə birgə Ermənistana qarşı müharibə etdi” - Ermənistanda antirus isteriyası güclənir...

Əli Orucov: “Hesab edirlər ki, gərək Rusiya açıq şəkildə müharibəyə qarşı çıxaydı, ermənilərin yerinə vuruşaydı”

img

Ermənistanın “Lragir.am” saytı Kollektiv Təhlükəsizlik Müqaviləsi Təşkilatının Düşənbədə keçirilən toplantısı ərəfəsində Tacikistandakı hadisələri dəyərləndirərək bunun KTMT-nin nüfuzuna təsirsiz ötüşməyəcəyinə eyham vurub:

“Tacikistanın paytaxtı Düşənbədə KTMT-nin üzv ölkələrinin təhlükəsizlik şuraları katiblərinin toplantısı baş tutub. Toplantının əvvəlində KTMT üzvləri olan Tacikistan və Qırğızıstan sərhədində hərbi toqquşma olub, qırğız xüsusi təyinatlı dəstəsi Tacikistanın sərhəd məntəqəsini ələ keçirib. Rus ekspertlər KTMT-nin toplantısı günü KTMT-nin üzv ölkələri arasındakı hərbi toqquşmanın təşkilatın nüfuzdan salınmasına yönəldiyini deyirlər və üçüncü əlin bu blokun lideri Rusiyaya qarşı sui-qəsdinə eyham vururlar”.

Bu kontekstdə sayt yazır ki, Rusiya Qarabağda Ermənistana qarşı müharibəyə görə baha ödəniş edəcək: “Qarabağda Ermənistana qarşı müharibədə KTMT açıq şəkildə Ermənistan qarşısında öhdəliklərindən imtina edib, blokun üzv ölkələri isə ötən il dekabrın 2-də keçirilən sammitdə Bakıya öz dəstəklərini bildirib, tarixi qələbəyə görə Bakını təbrik ediblər. KTMT üzvü olan Rusiya NATO üzvü olan Türkiyə ilə Ermənistana qarşı müharibəyə başladı, Qarabağın statusunu məhv etdi, ora öz qoşunlarını yerləşdirdi və Qarabağı Azərbaycan ərazisi elan etdi. Ermənilər heç vaxt bunu Rusiyaya bağışlamayacaqlar”.

Görünən odur ki, ermənilər Rusiyanın 44 günlük müharibədə sərgilədiyi mövqeyi, Türkiyə ilə birlikdə Monitorinq Mərkəzi yaratmasını və digər məsələləri hələ də həzm edə bilmirlər. Bu isə onların nə qədər məkrli millət olduqlarını bir daha sübut edir.

  • “Ermənistanda anti-Rusiya isteriyasının bir səbəbi də ermənilərin Qərbdən...

Sözügedən məsələ ilə bağlı fikirlərini baki-xeber.com-la bölüşən AMİP funksioneri Əli Orucov hesab edir ki, Rusiya Dağlıq Qarabağın tamamilə Azərbaycanın nəzarətinə keçməsinə imkan verməsə də, ermənilər yenə öz nankor ampluasındadırlar: “Məlum olduğu kimi, uğurlu 44 günlük müharibənin son mərhələsində Azərbaycan Ordusu Xankəndini azad etmək ərəfəsində idi. Şuşa şəhəri azad ediləndən sonra Xankəndiyə yol açıldı. Məlum olduğu kimi, Rusiya buna imkan vermədi. Zatən, Rusiyanın dəstəyi hesabına Ermənistan Qarabağı işğal etdi. Yoxsa, onlar Azərbaycanın qarşısında duruş gətirə bilməzdilər. Ancaq ermənilərin xisləti xəbis olduğu üçün onlar Rusiyaya minnətdar olmaq əvəzinə, əksinə, bu dövlətə düşmən kimi baxırlar. Düzdür, bəlli səbəblərdən onların çoxu bunu açıq bəyan etmir. Buna rəğmən, Ermənistanda ara-sıra anti-Rusiya ovqatı boy göstərir. Məsələnin mahiyyəti ondan ibarətdir ki, ermənilər daxilən Rusiyanın göstərdiyi yardımla qane olmurlar. Onlar hesab edirlər ki, gərək Rusiya açıq şəkildə müharibəyə qarşı çıxaydı, ermənilərin yerinə vuruşaydı. Bir sözlə, bir qarış ərazinin belə Azərbaycanın nəzarətinə keçməsinə imkan verməyəydi. Halbuki, yaranan uğurlu geosiyasi vəziyyət və Azərbaycan Ordusunun qəhrəmanlığı sayəsində ərazilərimiz işğaldan azad edildi. Rusiya müharibə dövründə silah sarıdan Ermənistana yardımı əsirgəmədi. Digər tərəfdən, KTMT-də təmsil olunan ölkələrin Azərbaycanla olan yaxın münasibətləri Ermənistanı hər zaman narahat edir. Ermənistanda anti-Rusiya isteriyasının bir səbəbi də ermənilərin Qərbdən mədət ummalarıdır. Üstəlik, ölkədə seçkilər yaxınlaşır”.

Partiya funksioneri hesab edir ki, bu və digər səbəblərdən Ermənistanda Rusiyaya qarşı fikirlər artır.

Vidadi ORDAHALLI

Son xəbərlər