Rusiya sülhməramlılarının mayın 9-da faşizm üzərində qələbənin 76-cı ildönümü ilə bağlı Xankəndidə parada hazırlaşdıqları məlumdur. Sülhməramlıların Azərbaycan ərazisində qanunsuz olaraq parada hazırlaşması nəinki Azərbaycanda, eləcə də Rusiyanın özündə ictimai narazılıq doğurur.
Bu ərəfədə Rusiyanın özündə siyasi ekspertlər və ictimaiyyət nümayəndələri arasında Hitlerin əlaltısı olan Q.Njdenin Xankəndidəki abidəsinin sürüyərək atılması ilə bağlı çağırışlar edənlər var. Faşist Njdenin heykəli Xankəndidə keçiriləcək parada qədər sürüyüb atılmalıdır ki, separatçılar insanlığın üz qarasının heykəlini reklam etməsinlər. Faşizm üzərində qələbədə heç bir xidməti olmayan və faşizmə xidmət etmiş bir üzdəniraqın abidəsi Azərbaycan torpağında nə üçün qalmalıdır ki?
Son günlər rus sülhməramlılarının ermənilərin Azərbaycan ərazilərinə basdırdıqları minaya düşərək ağır yaralanması Rusiya ictimaiyyətində ciddi narazılıq doğurub və antierməni çağırışlarını gücləndirib. Bəzi ehtimallara və şayiələrə görə, sülhməramlıların 9 may paradında separatçılar da iştirak edə bilər. Hətta paradda Njdenin abidəsinin “ziyarət ediləcəyi” haqda şayiələr də dolaşır. Njdenin qondarma abidəsinin tez bir zamanda məhv edilməsi, dağıdılması zərurətə çevrilib. Baxmayaraq ki, ermənilər yalandan bir neçə dəfə Njdenin üzqarası, utancverici abidəsinin demontaj edildiyini iddia etsələr də, sözügedən abidə yerində qalmaqdadır.
Ekspertlər qeyd edirlər ki, sülhməramlıların planlaşdırdıqları qələbə paradının Qarabağda keçirilməsi qanunsuz olduğu kimi, Njdenin heykəli də qanunsuz olaraq Azərbaycan ərazisində qoyulub.
Ekspertlərin fikrincə, Rusiya ictimaiyyətinin bu çağırışları hətta sülhməramlıların özlərinə bir mesajdır ki, planlaşdırılan parad gününə qədər Njdenin abidəsinin sökülməsini həyata keçirsinlər, yaxud separatçılardan bunu tələb etsinlər. Faşizm üzərində qələbənin ildönümü ərəfəsində faşist əlaltının heykəlinin qalması faşizmə qarşı mübarizə aparan onminlərlə insanın ruhuna təhqirdir.
“Hazırda Rusiya sülhməramlılarının əsas işi Njdenin üzdəniraq abidəsini tamamilə sökmək olmalıdır”
“Müasir İnkişaf” İctimai Birliyinin sədri, politoloq Mübariz Göyüşlü baki-xeber.com-a şərhində bildirdi ki, ümumiyyətlə, sülhməramlıların özləri Njdenin üzdəniraq abidəsini söküb atmalıdırlar. “Hesab edirəm ki, Rusiyada antierməni ovqatının formalaşması və hətta güclənməsi tam təbii bir hal olmalıdır. Çünki Rusiya nə qədər onlara dəstək versə də, ermənilərin, bütövlükdə, çalışmaları və fəaliyyəti rus xalqının özünün də əleyhinə yönəlib. Faşizmə xidmət etmiş, Hitler, faşist əlaltısı olmuş Qaregin Njdenin abidəsinin separatçılar tərəfindən Xankəndiyə qoyulması İkinci Dünya müharibəsində faşizm üzərində qazanılmış qələbəyə kölgə salır. Faşizm üzərində qələbədə payı olan xalqların və respublikaların, o cümlədən də rusların, Rusiyanın qalibiyyət ruhuna ziddir. Ümumiyyətlə, Njdeyə abidə qoyulması Ermənistanın və ermənilərin faşist ruhunun göstərəcisidir. Baxmayaraq ki, Azərbaycan ərazilərində Ermənistan dövləti Rusiya tərəfindən yaradılıb, bu gün dəstəklənir, ermənilərə ruslar həmişə dayaq olur, amma yenə də ermənilər üçün faşizm, separatizm ön plandadır. Hitlerin tərəfdarı olan və faşizm üzərində qələbənin qazanılmasında heç bir rolu olmayan Njdenin abidəsinin qalması, bütün mənalarda, faşizm üzərində qazanılan qələbəyə kölgə salır və o abidə götürülməlidir”.
M.Göyüşlü hesab edir ki, Rusiyada bütün ictimaiyyət Ermənistanı və erməniləri, birmənalı olaraq, dəstəkləmir, çünki bu ölkədə obyektiv, ağı-qaradan seçən ictimai-siyasi xadimlər, elita təmsilçiləri də az deyil, onlar ermənilərin və Ermənistanın nə cür məkrli planlara, düşüncələrə malik olduğunu yaxşı bilirlər.
M.Göyüşlünün sözlərinə görə, mayın 9-na qədər Njdenin heykəlinin ayaq üstdə qalması faşizm üzərində qələbəyə bir təhqirdir: “Fikrimcə, hazırda Rusiya sülhməramlılarının əsas işi Njdenin üzdəniraq abidəsini tamamilə sökmək olmalıdır. Çünki Njdenin abidəsinin orada qalması onlar barədə də müəyyən şayiələrə yol açır. Abidənin sökülməsi və birdəfəlik Njde mövzusunun gündəmdən çıxarılması vacibdir. Eyni zamanda, sülhməramlıların Xankəndidə planlaşdırdıqları parad deyilən prosesin də ləğv edilməsi arzuediləndir. Çünki belə bir qanunazidd məsələnin planlaşdırılması yolverilməzdir”.
M.Göyüşlü hesab edir ki, 9 maya qədər Njdenin heykəli sökülməli və sülhməramlıların nəzərdə tutduqları qanunsuz parad ləğv edilməlidir. Ekspertin fikrincə, Rusiya Azərbaycanla münasibətlərini daha da möhkəmləndirmək üçün bunu etməlidir.
İradə SARIYEVA
