Ermənistan deputatı Arman Babacanyan parlamentdə çıxışı zamanı Rusiyanı aşağılayıb. Deputat tribunadan rezin ayaqqabı nümayiş etdirərək, bunu Rusiya ilə müqayisə edib.
Babacanyan Ermənistan silahlı qüvvələrinin Rusiya ordusu modelində yenidən qurulmasını tənqid edib: “Bilirsiniz bu nədir? Bu, Rusiya istehsalı olan qaloşdur. İndi bu qaloşları modernləşdirmək, yeniləmək istəyirsiniz. Qaloşlar dəyişdirilsə də, onlar modernləşdirilmiş, ya da nanoqaloşlar olaraq qalacaqlar”.
Bununla belə, erməni deputat qeyd edib ki, silahlı qüvvələrdə islahatların aparılması Rusiyanın köməyilə edilməlidir, amma ordunun qurulmasında başqa istiqamətlərə də baxılmalıdır: “Silahlı qüvvələrimizə real modernləşmə üçün yeni şəraitlər yaradın”.
Ermənistanda seçkilər yaxınlaşdıqca anti-Rusiya isterikası yenidən ara-sıra müxtəlif formada özünü göstərir. Görünən odur ki, Baydenin qondarma “soyqırım”la bağlı məlum açıqlamasından sonra bu kimi hallar artmağa doğru gedir.
“Paşinyan belə bir siyasət hazırlayır və digər şəxslərin əli ilə Rusiyaya qarşı bu cür çağırışlar gündəmə gələcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı. Onun fikrincə, bu kimi açıqlamalar ölkədə vəziyyətin mürəkkəb olmasından irəli gəlir: “Ermənistanda siyasi vəziyyət mürəkkəb olaraq qalır. Bundan əlavə, Ermənistanda anti-Rusiya isteriyası davam edir. Müşahidələr göstərir ki, ölkədə hakimiyyətin kursu məhz bu istiqamətdə davam edəcək. Çünki Nikol Paşinyan hakimiyyəti Rusiyanın Ermənistanda siyasi mövqeyinin zəiflədilməsində maraqlıdır. Onlar müharibədə məğlubiyyətə görə Rusiyanı bağışlamaq istəmirlər. Bunu açıq bəyan etməsələr də, başqa formada antirus təzahürləri özünü göstərir. Hesab edirəm ki, Ermənistanda bundan sonra da deputatların bu kimi çıxışlarının şahidi ola bilərik. Ümumiyyətlə, Ermənistanda hakimiyyətyönlü şəxslərin bəzi fəaliyyətlərinə gəldikdə isə, onlar çalışırlar ki, Rusiyanın ölkədə prosesə qarışmasının qabağını alsınlar. Düşünürəm ki, Paşinyan belə bir siyasət hazırlayır və digər şəxslərin əli ilə Rusiyaya qarşı bu cür çağırışlar gündəmə gələcək. Hazırda Rusiyanın əsas strategiyası ondan ibarətdir ki, Ermənistanda, nə yolla olursa-olsun, güclənsin. “Qarabağ klanı” da bunda maraqlıdır. Ona görə də Paşinyan bunda maraqlıdır ki, Rusiyaya qarşı ictimai narazılıq artsın”.
Politoloq hesab edir ki, seçkilərə qədər bu kimi halların tez-tez baş verəcəyi güman olunur.
Vidadi ORDAHALLI
