Azərbaycanın tarix səhifəsinə Zəfər ili kimi yazılan 2020 diasporumuzun da qızıl ili kimi səciyyələndirilir, desək yanılmarıq. Qloballaşan və virtual məkana daşınan dünyada informasiya cəbhəsindəki mübarizədə soydaşlarımız dövlətimizə və ordumuza dəstəyini əyani, əməli işlərlə nümayiş etdirdi, qarşı tərəfin 200 illik saxta təbliğat strategiyası çökdü.
Bəli, bu, faktdır və təkcə döyüş meydanındakı qələbəmizlə deyil, erməni mifinin darmadağın edilməsində xüsusi rolu olan diaspor fəaliyyətində də sübuta yetirildi. Diaspor təşkilatlarının mərkəzləşmiş qaydada apardığı sistemli və effektiv təbliğat işindən hiddətlənən erməni diasporunun əl atdığı təxribatlar, təzyiq və fərqli təsir üsulları belə soydaşlarımızın, tərəfdarlarımızın fəallığını azaltmadı, əksinə onları mətinləşdirdi, informasiya savaşının “bayraktarı”na çevirdi.
İstər sosial şəbəkələrdə, istər xarici media qurumlarında savadlı, beynəlxalq hüquq və normaları çərçivəsində edilən çıxışlar, kütləvi aksiyalar, məqsədyönlü təbliğat kampaniyaları haqq səsimizi duydurdu, ümumi qələbəmizə töhfə verdi.
Yeri gəlmişkən, istər cənab Prezident, istərsə də çox hörmətli Mehriban xanım ordumuzun Vətən müharibəsində əldə etdiyi davamlı qələbələrlə bağlı çıxışlarında, müraciətlərində Azərbaycan diasporunun, xaricdə yaşayan soydaşlarımızın da fəaliyyətini yüksək qiymətləndirdi və bütün bunlar diaspor fəaliyyətinə xüsusi stimul verdi, sonrakı fəaliyyət üçün mühüm motivasiya yaratdı.
Qeyd edək ki, 2020-ci ili müşayiət edən koronavirus pandemiyası da diasporumuzun yeni keyfiyyətlərinin üzə çıxmasına bir vəsilə oldu. Bəlli oldu ki, xaricdəki icmalarımız yalnız gündəlik qayğılar, ölkəmizin təbliğatı, inteqrasiya və adaptasiya problemləri ilə yaşamır, onların hər biri, xüsusilə imkanlı kəsimi həm də böyük bir xeyriyyəçidir. İmkanları çərçivəsində nəinki darda qalan soydaşlarımıza, həm də yaşadıqları cəmiyyətdə çətinliklərlə üzləşmiş insalara əl tutmaq, maddi-mənəvi dəstək olacaq qədər keyfiyyətlərə sahibdirlər.
2020-ci ildə diasporumuzun həyatında baş verənlər təhlil edilərkən, əslində icma üzvləri arasındakı inam, etibar və etimadın bir qədər əvvələ söykəndiyini görmək mümkündür.
Pərakəndəlik, bir-birinə qarşı az qala düşmənçilik, inamsızlıq, ümidsizlyin pik həddə çatdığı dönəmdə diasporun koordinasiyasının, birliyinin təmin olunmasında, onların bir sıra problemlərinin həllində vacib rol oynayan dövlət qurumunun - Diasporla İş üzrə Dövlət Komitəsinin rəhbərliyindəki dəyişiklik və bu istiqamətdə özünü çox gözlətməyən yeniliklər, xaricdəki soydaşlarımız üçün bir ümid qığılcımı oldu.
Qısa müddətdə diasporumuzun yenidən təşkilatlanması, xüsusilə milli birliyin təmin edilməsi üçün gərgin və strateji planla aparılan, eyni zamanda uzun vədəyə hesablanan fəaliyyətin nəticələri səmərə verdi.
Son 3 ildə diaspor səsimiz yüksəlib, birliyimiz möhkəmlənib, həmvətənlərimizin həmrəylik istəkləri gerçək inam və adi səmimiyyət müstəvisinə keçib, şəraitdən asılı olmayaraq dayanıqlı, davamlı fəaliyyət istiqaməti müəyyənləşib, bizi birləşdirən dəyərlərə münasibət birmənalı forma çərçivəsində təkmilləşib.
Yeni yaradılan koordinasiya şuraları, Azərbaycan evləri kimi mərkəzləşdirilmiş təsisatlar sadalanan yeniliklərin əməli nümunəsi, konkret hədəflərə istiqamətlənmiş yeni münasbətlərin təməlidir.
Məhz yeni münasibətlər, təşkilatlanmada optimal forma dəyişiklikləri son 3 ili xüsusi vurğulamağa əsas verir. Yaxud belə də demək olar ki, son 3 ilin gücləndirilmiş idarəçilik mexanizmi və intensiv koordinasiyası olmasaydı, bəlkə də 5 ayı vurğulamaq üçün söz və ya fakt tapa bilməzdik.
Beləliklə, son 3 ildə görülən işlərdən bəziləri fakt və rəqəmlərin dili ilə:
Bütün bunlar diasporumuzun inkişafda olduğunu ifadə edir. Gələcəkdə də diaspor sahəsində birliyimizin möhkəmlənəciyinə və uğurlarımızın davam edəcəyinə inam yaradır.
İradə SARIYEVA
