Ermənistan əvvəlcə Qandini faşist Njde ilə eyniləşdirdi, ardınca Qandinin heykəlini biurvat elədi - Hindistan XİN-in menyusuna fakt...
“Sputnik Ermənistan”ın yaydığı məlumata görə, İrəvanda Hindistanın siyasi və ictimai xadimi, Britaniya müstəmləkəçiliyinə qarşı mübarizənin lideri Mahatma Qandinin heykəlini yandırıblar. Hadisə mətbuatda və sosial şəbəkələrdə böyük rezonans doğurub.
Məlumatda bildirilir ki, İrəvanda Qandinin heykəli keçən il Hindistana dostluq jesti kimi ucaldılıb, ancaq elə həmin vaxt da bu addım narazılıqla qarşılanıb. Səbəb isə M.Qandinin vaxtilə “erməni soyqırımı”nı inkar etməsi olub.
“İrəvanda Qandiyə heykəl qoyulması məsələsi erməni cəmiyyəti tərəfindən birmənalı qarşılanmamışdı. Bu addımı tənqid edənlər Qandinin Türkiyənin o vaxtkı rəhbərliyi ilə yaxın münasibətinin olduğunu və onun Osmanlı İmperiyasında “erməni soyqırımı"nın baş verdiyini inkar etməsini əsas gətirirdilər”, - deyə məlumatda bildirilir.
Bu il aprel ayının 24-də isə Hindistanın Ermənistandakı səfirliyi rəsmi "Twitter" səhifəsində qondarma "erməni soyqırımı"nın ildönümü münasibətilə paylaşım edib. Paylaşımda əvvəl "soyqırım" ifadəsi yer alsa da, sonradan mətn redaktə olunub və həmin söz oradan çıxarılıb. Bundan əsəbləşən ermənilər isə acıqlarını M.Qandinin heykəlindən çıxıblar.
“Bu hadisədən bir neçə gün sonra naməlum şəxslər Qandinin heykəlinə qarşı vandalizm aktı həyata keçiriblər. Aprelin 28-də mətbuatda heykələ od vurulub yandırıldığını əks etdirən foto və videolar yayılıb. İki gün əvvəl isə heykələ toyuq yumurtası çırpıblar”, - deyə xəbərdə bildirilir.
İrəvan meriyası hadisəni qınayaraq heykəlin yandırılmasını açıq-aşkar vandalizm aktı kimi qiymətləndirib. Meriyanın mətbuat katibi Akop Karapetyan “Sputnik Ermənistan”a müsahibəsində bildirib ki, polis mütləq günahkarları tapıb cəzalandırmalıdır. “Bu, bizim üçün kifayət qədər məyusedici hadisədir. Təəssüf ki, bu, İrəvanda baş verən yeganə hal deyil. Bu işə ciddi şəkildə qiymət verilməlidir. Paytaxtda yüzlərlə heykəl var, onların hamısının başına bir mühafizəçi qoymaq mümkün deyil”, - deyə Karapetyan vurğulayıb.
Karapetyanın sözlərinə görə, heykəli yandıranlarla yanaşı, buna çağırış edənlər də ağır şəkildə cəzalandırılmalıdırlar.
Bu məsələ ilə bağlı ən aktiv şəkildə çağırış edənin isə "Alternativ meriya" hərəkatının üzvü, aktivist Sona Aqekyan olduğu bildirilir.
Onu da qeyd edək ki, heykəlin rəsmi açılışı hələ baş tutmayıb. Karapetyanın sözlərinə görə, heykəl ucaldılmamışdan əvvəl bu addımın bütün mənfi və müsbət tərəfləri analiz edilib. Nəticədə Qandinin Türkiyə rəhbərliyi ilə əlaqəsi və ya qondarma "erməni soyqırımı"nı inkar etməsi ilə bağlı hər hansı bir məlumata rast gəlinməyib.
Karapetyan onu da bildirib ki, İrəvanda Qandiyə heykəl ucaldılması təşəbbüsü Ermənistan Xarici İşlər Nazirliyindən gəlibmiş. Qərar Ermənistanla Hindistan arasındakı dostluq münasibətləri kontekstində verilib.
"Odur ki, indi bu vandalizm aktının müəlliflərinin hansı motivlə hərəkət etdiklərini anlamaq çətindir", – deyə o vurğulayıb.
Xəbərdə o da bildirilir ki, hazırda Ermənistanın Hindistanla kifayət qədər yaxşı münasibətləri var, üstəlik, İrəvan Kəşmirlə bağlı Pakistanla münaqişə vəziyyətində olan Hindistanın mövqeyini dəstəkləyir.
Qeyd edək ki, elə ötən ilin bu günlərində erməni KİV-də məlumat yayıldı ki, İrəvanda Hindistanın siyasi və ictimai xadimi, Britaniya müstəmləkəçiliyinə qarşı mübarizənin lideri M.Qandiyə heykəl qoyulacaq. Ermənistanın faşist, qaniçən Njde ilə dünya tarixində dinc siyasi mübarizə nəzəriyyəsinin banilərindən biri M.Qandinin eyniləşdirilməsi həqiqətən də təəccüblü görünürdü. Bu xəbər yayıldıqdan sonra “Bakı-Xəbər” qəzetinin baş redaktoru Aydın Quliyev özünün “Facebook” hesabında “İrəvanda faşist Njdeyə də heykəl, Mahatma Qandiyə də heykəl? Hindistan buna nə deyəcək...” sərlöhvəli bir status paylaşdı. Baş redaktorumuz yazırdı: “Məlumat aldıq ki, ermənilər indi də məşhur hind dövlət və siyasi xadimi Mahatma Qandiyə heykəl ucaltmağa hazırlaşırlar. Burada təəccüblü nədir? Bir neçə il əvvəl İrəvanda hitlerçi cəllad Qaregin Njdeyə də 6 metrlik abidə qoyublar. M.Qandi isə dünya tarixində dinc siyasi mübarizə nəzəriyyəsinin banilərindən biridir və onun əliyalın, silahsız mübarizə üsulları nəticəsində hind xalqı 1948-ci ildə ingilis müstəmləkəsindən müstəqil dövlətə çevrildi. Diametral bir-birinə əks iki şəxsə eyni dərəcədə ehtiram hansı məntiqə sığır, ümumiyyətlə, burada məntiq varmı?”
Baş redaktorumuz daha sonra ermənilərin Hindistandan qovulma tarixçəsinə diqqət çəkirdi: “Məsələn, 5-6-cı əsrlərdə çinlilərlə hindlilərin mübarizəsində hindlilərə xəyanət etdikləri üçün ermənilərin Hindistandan qovulduqları barədə tarixdə fakt var... 2017-ci ildə Ermənistanın prezidenti Serj Sarkisyan Hindistanda təəccüblü bəyanat verdi. Dedi ki, erməni və hind xalqlarını dərin mənəvi-tarixi köklər bağlayır. Hansı köklərdən bəhs edildiyi indiyədək məlum deyil. Elə həmin vaxt erməni mediası hətta yazdı ki, Hindistandakı məşhur Tac Mahal kompleksini guya erməni memar tikib. Belədirsə, həmin erməninin ad-soyadı niyə deyilmir...
Bütün hallarda, ermənilərin M.Qandini faşist Njde ilə bir bucaqdan görməsinə Hindistanın necə baxacağı maraqlıdır...”.
Göründüyü kimi, İrəvanda M.Qandinin heykəlini yandırıblar və buna səbəb kimi iki amili göstərirlər. Bunlardan biri M.Qandinin qondarma “erməni soyqırımı”nı tanımaması, ikinci faktor isə Hindistan səfirinin “Tvitter” paylaşımıdır.
Bu faktın özü də onu göstərir ki, Ermənistan üçün dost ölkə yoxdur və bu ölkə daim separatçılığı, zorakılığı əsas tutur, faşizm siyasətini davam etdirir və hər zaman ona dəstək verən ölkələrə qarşı da çirkin niyyətlərini həyata keçirir.
- “Bu cinayət onu sübut etdi ki, Ermənistan və ermənilər üçün dost xalq, dost dövlət yoxdur”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, M.Qandinin heykəlinə qarşı ermənilərin həyata keçirdiyi zorakılıq aktları, onun heykəlinin yandırılması faktı Ermənistan rəhbərliyinin mahiyyətini, hansı yolda olduğunu bir daha sübut edir. Q.Hacıyevin sözlərinə görə, qondarma “erməni soyqırım”ı nağılı Ermənistan hökumətini və erməni lobbisini o qədər özünə cəlb edib ki, onlar öz yalanlarına şərik edə bilmədiklərinə qarşı bu cür iyrəncliklər həyata keçirməkdən çəkinmirlər. Ermənistanın Qandi ilə Njdeni eyniləşdirməyə cəhd göstərdiyini deyən Q.Hacıyevin bildirdiyinə görə, onların eyniləşdirilməsi heç cür mümkün deyil. “Əslində, ermənilər özləri etiraf etsələr də, etməsələr də, erməni toplumunun yaranmasında fars, hind-qaraçı mənşəli xalqların rolu olub. Ona görə də Serj Sarkisyan o vaxtı işarə vermişdi və Hindistan kimi əhalisi çox olan dövləti özlərinə tərəf çəkmək istəmişdilər. Onlar bu siyasətdən də istifadə ediblər, eyni zamanda, farslarla da o siyasəti davam etdirirlər. Əvvəllər deyirdilər ki, ermənilər həmrəydir, birgə olmağı bacarır, amma görürsünüzmü, son dövrün hadisələri onların necə bir toplum olduğunu üzə çıxardı, onları ifşa etdi. “Təəssübkeş xristian” kimi xristian ölkələrinə özlərini “əzabkeş” olaraq təqdim edirdilər, amma effekt vermədi, bu da ifşa olundu ki, demə, heç onlar düzəməlli xristian da deyillər. İndi də son günlərin hadisələri nəticəsində Ermənistanın Hindistana saxta münasibəti üzə çıxdı. Ermənistanın M.Qandiyə heykəl qoymasının arxasında bu faşist dövlətin olduqca çirkin niyyətləri dayanırdı. Ermənistan elə bilirdi ki, Qandiyə heykəl qoysa, Hindistanda da qondarma “erməni soyqırımı”na abidə qoyulacaq, amma bu niyyətləri baş tutmadı. Bilirsiniz ki, nə M.Qandinin dövründə, nə də sonradan bu ölkə qondarma “erməni soyqırımı”nı tanımayıb. Beynəlxalq aləmdə sülhün, dinc, sivil mübarizənin tərəfdarı olan Qandinin heykəlinin ermənilər tərəfindən yandırılması onu göstərir ki, bu toplum öz vəhşi, vandal, faşist əməllərindən qalmır və bu yolu tutur. M.Qandinin heykəlinə qarşı həyata keçirilən bu cinayət onu sübut etdi ki, Ermənistan və ermənilər üçün dost xalq, dost dövlət yoxdur, kim onların mənfur siyasətinə dəstək verirsə, ona tərəf əyilirlər”.
Q.Hacıyev hesab edir ki, Hindistan bundan sonra Ermənistanla münasibətlərinə yenidən baxacaq. Çünki bu ölkə hind xalqının mənəvi, siyasi və dini liderinin heykəlinə qarşı vandalizm aktı törədib.
İradə SARIYEVA
