ABŞ Nümayəndələr Palatasının 65 üzvü Konqresin Xarici əlaqələr komitəsinin rəhbərliyinə məktub göndərərək növbəti maliyyə ilində Ermənistan və Dağlıq Qarabağa 100 milyon dollardan çox birbaşa yardım göstərilməsini istəyiblər.
Konqresmenlərin fikrincə, bu yardım Ermənistana və Qarabağa müharibənin nəticələrini aradan qaldırmağa, xüsusən də mənzil tikintisi və infrastrukturun bərpası üçün bir sıra proqramları həyata keçirməyə imkan verəcək.
Konqresmenlər “iqtisadiyyatın inkişafını, qanunun aliliyini və ölkənin təhlükəsizliyini təmin etmək üçün” Dövlət Departamenti və USAİD vasitəsilə Ermənistana təxminən 100 milyon dollar ayrılmalı olduğuna inanırlar.
Bu azmış kimi, ABŞ konqresmenlərinin fikrincə, Xankəndiyə “Dağlıq Qarabağdakı adi silahların məhvinə görə” daha 2 milyon dollar ayrılmalıdır. Həmçinin, məktub müəllifləri rəsmi Vaşinqtonu ABŞ-ın Azərbaycana təhlükəsizlik sahəsindəki yardımını “Ermənistana və “Artsax”a hücumları dayandırana qədər” dondurmağa çağırırlar.
Görünən odur ki, Baydenin qondarma “soyqırım”ı tanıması Konqresdə Azərbaycana qarşı olan qüvvələrin fəallaşmasına rəvac verib. Təbi ki, burada söhbət Konqresdəki ermənipərəst nümayəndələrdən gedir.
“Belə çıxır ki, həmin vəsait separatçı quldurların tör-töküntülərinə göndəriləcək”
Məsələyə münasibət bildirən sabiq diplomat, politoloq Fikrət Sadıqovun sözlərinə görə, Konqresdəki çoxluq Demokratlar Partiyasına məxsusdur: “Demokratlar Partiyasının nümayəndələri hər zaman ermənipərəst mövqedən çıxış ediblər. Bir zamanlar həmin Demokratlar Partiyasının Konqresdəki nümayəndələrinin təşəbbüsü ilə 1992-ci ildə Azərbaycana qarşı “907-ci düzəliş” qəbul edildi. Görünən odur ki, onlar öz “ənənələrinə” sadiqdirlər. İndiki proseslər də Türkiyə və Azərbaycana qarşı bir düşmənçilik addımıdır. Onlar, faktiki olaraq, reallığı görmürlər. Daha konkret desək, reallığı görmək istəmirlər. O üzdən, bu addımı ona görə atırlar ki, Azərbaycanın maraqlarına zərbə vursunlar. Çünki erməniləri Dağlıq Qarabağda heç kəs sıxışdırmır, onlara yaşıl işıq yandırılıb, gedib orada məskunlaşıblar. Ancaq “Artsax” adlı qondarma bir qurum artıq yoxdur. Biz buna son qoymuşuq. O zaman Konqres kimə bu pulu ayıracaq, hansı ünvana göndəriləcək? Belə çıxır ki, həmin vəsait separatçı quldurların tör-töküntülərinə göndəriləcək. Bu isə beynəlxalq hüququn tapdalanması deməkdir. Açıq şəkildə Azərbaycana qarşı qərəzli mövqe nümayiş etdirilir. Ermənipərəst konqresmenlərin məqsədi Türkiyə və Azərbaycanın mövqelərini zəiflətməkdir. Eyni zamanda, bu, açıq şəkildə Ermənistana dəstək vermək məqsədi daşıyır. Bütün bunlar onu göstərir ki, Minsk Qrupunun fəaliyyət göstərməsinin heç bir mənası yoxdur”.
Politoloq hesab edir ki, biz bütün istiqamətlərdə öz səylərimizi artırmalıyıq.
Vidadi ORDAHALLI
