Növbədənkənar parlament seçkilərinin yaxınlaşması fonunda Ermənistanda iqtidar və müxalifət arasında ziddiyyətlər dərinləşməkdə, qarşılıqlı ittihamlar artmaqdadır. Bu fonda “Qarabağ klanı”nın ardınca hakimiyyət təhlükəli hesab etdiyi digər müxalif fiquru da inzibati yolla sıradan çıxarmağa hazırlaşır. Söhbət Ermənistan Milli Təhlükəsizlik Xidmətinin keçmiş direktoru, müxalif Vətən Partiyasının sədri Artur Vanetsyandan gedir.
Siyasətçinin vəkili Lusine Saakyan bildirib ki, Vanetsyan istintaqa cəlb olunub. Onun sözlərinə görə, Vanetsyan Ermənistan İstintaq Komitəsinin Hərbi İstintaq İdarəsinə çağırılıb. MTX-nın sabiq rəhbəri ermənilərin Şuşada uğradığı ağır məğlubiyyətdə ittiham olunur. Bildirilib ki, müharibə zamanı Vanetsyan və başçılıq etdiyi “Vətən” silahlı dəstəsi Şuşadakı mövqelərini özbaşına tərk edib. Hesab edilir ki, bu yolla seçkilərə qədər Vanetsyan sıradan çıxarılacaq. Bu da Nikol Paşinyan və komandasının qalibiyyət şanslarını daha da artırır. Bu arada, Ermənistanda parlamentin hakim “Mənim addımım” fraksiyası bəyan edib ki, onlar Nikol Paşinyana alternativ axtarmır. Parlamentin spikeri Ararat Mirzoyan hakim fraksiyanın baş nazir postuna namizədinin məhz Paşinyan olacağını bildirib. “Mənim addımım” fraksiyası bundan əvvəl də dəfələrlə bəyan edib ki, onun erkən seçkidə də vahid və yeganə namizədi Paşinyan olacaq. Medianın baş nazir postunda Paşinyanı əvəz etməyə layiq namizəd kimi gördüyü Ararat Mirzoyan bu fonda bildirib ki, onun fraksiyası Paşinyana alternativ axtarmır. Paşinyan istefa verdikdən sonra komandası baş nazir vəzifəsinə yenidən onun namizədliyini verib. Lakin erkən seçkinin keçirilməsi üçün parlamentin onu bu vəzifəyə təsdiqləməkdən iki dəfə imtina etməsi lazımdır. Yalnız bu halda parlament buraxıla, erkən seçki keçirilə bilər.
Parlamentdə ikinci böyük fraksiya olan “Çiçəklənən Ermənistan” partiyasını təmsil edən İveta Tonoyan isə bildirir ki, onun partiya yoldaşları artıq seçki hazırlığına başlayıblar və seçkiqabağı kampaniyanı partiyanın lideri Hagik Tsarukyan şəxsən koordinasiya edir. Xanım Tonoyan vurğulayıb ki, “Çiçəklənən Ermənistan” fraksiyasının qəti əmin olduğu proqram var: “Partiya 20 iyun seçkisinə Tsarukyanın başçılıq etdiyi siyahı ilə gedir və partiyanın qələbəsi məhz onun baş nazir olması ilə nəticələnməlidir”. Müxalif “Maariflənmiş Ermənistan” fraksiyası isə bildirib ki, hələlik heç bir sürpriz olmayacaq və təşkilat baş nazir vəzifəsinə namizəd irəli sürməyəcək. “Azatutyun” radiosu qeyd edir ki, Ermənistanın birinci prezidenti Levon Ter-Petrosyan bugünlərdə məhz bu iki partiyanı Paşinyanı vəzifəsində saxlamaq üçün iqtidarla qanunsuz sövdələşməyə girməkdə ittiham etmişdi. Ter-Petrosyan bəyan etmişdi ki, konstitusiyaya görə, Paşinyan vəzifəsindən istefa verdikdən sonra həmin vəzifənin icraçısı kimi qala bilməz. İveta Tonoyan “Azatutyun”a müsahibəsində birinci prezidentə konstitusiya hüququ üzrə başqa ekspertlərlə də danışmağı məsləhət görüb. O deyib iki, “Çiçəklənən Ermənistan”, “Maariflənmiş Ermənistan” və prosesdə iştirak edən başqa partiyaların öz gündəlikləri var. Xanım millət vəkili Ter-Petrosyana işarə edərək bildirib ki, onun partiyasını tənqid edənlər başqalarının gündəliyinə xidmət edirlər: “Çox yaxşı olardı ki, onlar hansı gündəliyə xidmət etdiklərini açıq bildirəcək qədər səmimi olsunlar”.
Bu arada Ermənistan hökuməti seçki kampaniyasına maneçilik törədilməsinə qarşı məsuliyyəti sərtləşdirib. Bununla əlaqədar Cinayət Məcəlləsinə düzəlişlər haqqında qanun birinci, ikinci və sonuncu oxunuşda qəbul olunub. Bu qanunvericilik təşəbbüsü ilə də hakim “Mənim addımım” fraksiyasından Vaaqn Ovakimyan çıxış edib. O bildirib ki, bundan sonra seçkiyə maneçilik törədilməsinə qarşı qanun daha sərt olacaq: “İnqilaba qədər seçki vaxtı, yadınızdadırsa, hansısa qruplar müxalifətin təşviqat kampaniyasına maneçilik törətməyə çalışırdılar. Onlar bunu etsələr də, cəzasız qalırdılar. Yeni normalara görə, siyasi baxışlarından asılı olmayaraq, istər müxalifət olsun, istərsə də iqtidar, təşviqat kampaniyasına mane olmaq istəyənlər cinayət məsuliyyətinə cəlb olunacaq”. Qanuna düzəlişdə belələri üçün 6 aydan 1 ilədək azadlıqdan məhrumetmə cəzası nəzərdə tutulur. Qanuna görə, seçki təşviqatına mane olarkən zoralkılıq və ya təhdidə əl atanlar isə 6 il müddətinə azadlıqdan məhrum edilə bilər. Seçicilərin maddi cəhətdən ələ alınması cəhdlərinə görə isə 5 ilədək həbs cəzası nəzərdə tutulur. Hakimiyyət əmindir ki, qanuna düzəlişlər qarşıdan gələn erkən seçkilərə əhəmiyyətli dərəcədə təsir göstərəcək.
Lakin müstəqil deputat Arman Babacanyan bildirir ki, hakim “Mənim addımım” fraksiyası keçmiş hakimiyyətə “öz şərtlərini diqtə etməkdə” mane olacaq heç nə etməyib: “Siz, sadəcə olaraq, sizi gözləyən və bizə gətirdiyiniz fəlakəti bilmirsiniz. Biz indi sakitcə oturmuşuq və Robert Köçəryanın və onun başqa satqın işbirlikçilərinin seçkiyə daha az təsir edə bilmələri üçün nə etməli olduğumuzu düşünürük. Mən bu dəyişikliklərlə seçki prosesinin azad, ədalətli və şəffaf keçirilməsi üçün prinsipial həll tapdığımızı düşünməkdən uzağam”. “Maariflənmiş Ermənistan” fraksiyasından deputat Ani Simonyan isə deyib ki, iqtidarın təşəbbüsü müxalifəti seçkidə iştirak üçün vəsait əldə etməkdən məhrum edir. Onun fikrincə, hakim partiya inzibati resurslardan faydalanmaq imkanına malik ola bilər. İndi qanun dəyişiklikləri prezident tərəfindən təsdiq edilməlidir. O bu sənədi imzalamasa və Konstitusiya Məhkəməsinə müraciət etsə, bu proses aylarla uzana bilər. Bununla belə, “Mənim addımım” fraksiyasının lideri Lilit Makunts qeyd edib ki, prezident dəyişikliklərdən xəbərdardır və lazım gələrsə, detallar üzərində onunla müzakirələr aparıla bilər.
Nahid SALAYEV
