“Bu gün müzəffər Azərbaycan Silahlı Qüvvələri qarşıda duran bütün vəzifələri icra edir. Eyni zamanda, sərhədçilərimiz hazırda işğaldan azad edilən ərazilərdə Azərbaycan-Ermənistan sərhədini də qoruyur”.
Bunu Prezidenti İlham Əliyev Cəbrayıl rayonunda Dövlət Sərhəd Xidmətinin hərbi hissəsinin açılışında deyib.
Ölkə başçısının sözlərinə görə, Ermənistanla sərhəd bərpa olunub: “Bu sərhəd də bərpa edilib və sərhəd boyunca bütün lazımi infrastruktur işləri aparılır, bütün texnika səfərbər edilib. Bu sərhədin uzunluğu 500 kilometrə yaxındır. Bu sərhəd 30 ilə yaxın müddət ərzində işğalçı qüvvələrin əlində idi. Biz Vətən müharibəsində Qələbə qazanaraq bu sərhədi də tam bərpa etdik, Zəngilan və Qubadlı rayonlarını, Laçın rayonunun bir hissəsini döyüşərək azad etdik. Laçın rayonunun böyük hissəsini və Kəlbəcər rayonunu düşmən artıq məcbur olub kapitulyasiya aktını imzalayaraq bizə qaytarıb. Hazırda o ərazilərdə lazımi işlər aparılır. Buranın da çox gözəl təbiəti vardır - uca dağlar, meşələr. Burada da şiddətli döyüşlər gedib, düşməni sərhədə qədər qovmuşuq, şəhidlər vermişik. Ağbənd qəsəbəsini - Ermənistan sərhədinə yaxın yerləşən o qəsəbəni azad edərək düz Ermənistan sərhədinə çıxdıq. İndi bu sərhəddə möhkəmlənirik, burada da sərhəd zastavası fəaliyyət göstərir. Bütün sərhədimizi bərpa etmişik”.
Ermənistanla olan bütün sərhədin bərpa edilməsinin nə kimi strateji beynəlxalq əhəmiyyəti var?
“Bu sözün arxasında 30 ilə yaxın işğal altında olan ərazilərin azad olunması və düşmənin qovulması mesajı var”
Məsələyə münasibət bildirən hərbi ekspert İbrahim Rüstəmlinin fikrincə, Prezidentin bu mesajının çox mühüm əhəmiyyəti var: “Sərhəd məsələsi bütün dövrlərdə gündəmdə olan və eyni zamanda, həmişə strateji əhəmiyyət daşıyan bir məsələ olub. Çünki sərhəd dövlətin ərazi bütövlüyü deməkdir. Sərhədin qorunması dövlətin ərazi bütövlüyünün qorunması deməkdir. Ərazi bütövlüyünün qorunması dövlətin imicinin qorunması deməkdir. Yəni siyasi müstəvidə sərhəd sözü həmişə xüsusi əhəmiyyət daşıyır. Təsadüfi deyil ki, siyasi arenada sərhəd sözü xüsusi tonla ifadə olunur. Cənab Prezidentin çıxışlarında bu məsələyə tez-tez qayıtması və “Ermənistanla dövlət sərhədlərini bərpa etdik” deməsi çox böyük mənanı ehtiva edir. Başlıcası, bu, Azərbaycanın öz ərazi bütövlüyünü bərpa etməsi deməkdir. Digər tərəfdən, bu sözün arxasında 30 ilə yaxın işğal altında olan ərazilərin azad olunması və düşmənin qovulması mesajı var. O mənada ki, düşmən ərazilərimizdən qovuldu. Ona görə də Prezidentin məlum açıqlaması çox ciddi mesajdır. Bu, hazırkı Azərbaycanın bütövlüyünün və tarixi qələbəsinin göstəricisidir. İndi bütün dünya Azərbaycanın gücündən, Prezidentindən danışır”.
Hərbi ekspert hesab edir ki, Azərbaycan öz gücünü bütün dünyaya sübut etdi.
Vidadi ORDAHALLI
