Torpaqlarımız işğaldan azad edildikdən və maddi mədəniyyət abidələrimizin salamat qalan hissəsi düşmənin əlindən xilas edildikdən sonra ermənilər daha da cilddən-cildə düşməyə, saxtakarlığın həddini aşmağa başlayıblar.
Artıq erməni saxtakarlığı ifrat həddədir və ifratlıq isə zərərli bir haldır ki, mütləq mənada ona yol verənə əziyyət verir. İşğal dövründə ermənilərin Azərbaycanın mədəni irsinə tutduğu divan bütün dünyaya məlumdur. Alban xristianlıq dövrünə aid olan bütün abidələr, monastırlar erməni “abidəsi”, “kilsəsi” kimi qələmə verilərək, onların hamısının tarixi, istiqaməti saxtalaşdırılaraq erməniləşdirilib, kilsələrin, monastırların memarlıq quruluşlarına xələl gətirilib. Bütün bunlar ermənilər tərəfindən alban xristian abidələrinə qarşı həyata keçirilən saxtalaşdırma aktlarındandır. Azərbaycanın torpaqlarını işğaldan azad etdikdən sonra bu ərazilərdə tikinti-quruculuq işləri ilə yanaşı, dini məbədlərin, məscidlərin restavrasiyasına da başlaması erməniləri, xüsusən də revanşist kəsimi, erməni lobbisini yerdən-yerə vurub və onların daha böyük saxtakarlıq kampaniyasına başlamalarına səbəb olub. Son günlər erməni mətbuatı elə böyük qırmızı yalanlar üyüdür ki, adam mat-məəttəl qalır, axı bunu bunlar nəyə əsasən uydurublar? Şuşada Qazançı kilsəsinin bərpası ermənilərin yuxusunu ərşə çəkib. Erməni mediası iddia edir ki, guya Qarabağdakı “erməni abidələri” albanlaşdırılır. Göründüyü kimi, artıq bu toplum saxtakarlıqda həddini aşıb. Qarabağda bir dənə də olsa erməni kilsəsinin olmadığı halda, onların bu iddiaya düşməsi gülüncdür. Ekspertlər deyirlər ki, ermənilər alban mədəniyyətini inkar etməyə başlayıblar və bununla da Qafqaz Albaniyasını da inkar edirlər. Ekspertlərə görə, alban abidələrini inkar etməklə və alban kilsələrini “erməni kilsələri” adlandırmaqla ermənilər daha böyük mənəvi cinayətə əl atmış olduqlarını ortaya qoyurlar.
“Alban xristian kilsəsinin müstəqilliyinin bərpasına nail olmalıyıq ki, bununla da erməni saxtakarlığı üzərində qələbə çalmış olaq”
Alban-Udi icmasının sədr müavini Rafiq Danakari “Bakı-Xəbər”ə açıqlamasında bildirdi ki, erməni saxtaklarlığı artıq həddini aşıb və dəfələrlə buna narazılıqlarını bildirsələr də, yenə də ermənilər yalan təbliğatlarını davam etdirməkdədirlər. R.Danakarinin sözlərinə görə, ermənilər alban kilsələrini erməniləşdirməkdən əl çəkmək istəmir, üstəlik də bizi “erməni kilsələri”ni albanlaşdırmaqda ittiham etməyə çalışırlar. Azərbaycanın qədim mədəniyyətə malik olduğunu deyən R.Danakarinin sözlərinə görə, Qafqaz Albaniyasında xristianlıq mövcud olarkən, özünün ən yüksək inkişaf dövrünə qədəm qoyarkən, heç bu coğrafiyada ermənilərin səsi-sorağı, izləri belə olmayıb: “Ermənilərin özlərinin heç bir tarixi mədəniyyəti yoxdur, onlar həmişə başqa xalqların irsinə qarşı saxtalaşdırma aparırlar. Ermənilər uzun illərdir alban kilsələrini, alban mədəniyyətini saxtalaşdırmaqla məşğul olur və onlara aid olmayan bu mədəniyyəti mənimsəmək istəyirlər. Qarabağda erməni kilsəsi olmayıb, orada alban xristian kilsələri olub və onlara qarşı da ermənilər öz çirkin təxribatlarını davam etdirirlər. Ermənilər alban abidələrini, alban monastırlarını erməniləşdirməyə çalışırlar. Bilirsiniz, ermənilərin bu cür əsassız iddialarının qarşısını bizim alimlərimiz almalı, onlar beynəlxalq səviyyədə elmi əsaslarla erməni yalanlarını ifşa etməlidirlər. Onlar sübut etməlidirlər ki, bu coğrafiyada qədim dövrlərdən ermənilər yaşamayıb və o monastırlar ermənilərə aid deyil. Alimlərimiz isə çox zaman susurlar. Qədim monastırlar elə tikilib ki, onların yanında kəndlər, yaşayış olmayıb. Monastırlar ayrıca olub. Erməni, sən bura nə zaman gəlmisən ki, gəlib burada “qədim monastır” tikmisən, dünən gəlmisən, sən gələndə də Qarabağdakı alban xristian monastırların hamısı var idi. Bu monastırlar XIX əsrdə tikilməyib, IV, V, VI əsrlərdə inşa edilən kilsələrdir. Sən Azərbaycan ərazilərinə dünən gəlmisən, bu monastırlar haradan sənin oldu?
Bir məqamı da deyim ki, erməni kilsəsi apostol kilsəsi olmamalıdır, bu qriqoryan kilsəsidir. Amma ermənilər apostol kilsəsi sözünü 1936-cı ildən sonra bizdən götürüblər. Alban udi kilsəsi apostol kilsəsidir. Qafqaz Albaniyasına apostollar birbaşa Yerusəlimdən gəliblər. Bu zaman isə bizim bölgədə ermənilər olmayıblar. O zaman Fadey Klikiyaya gəlibmiş, amma ermənilər onu qəbul etməyib öldürüblər. Erməni kilsəsi haradan apostol kilsəsi oldu? Heç o Qriqori də erməni deyil, parfiyalıdır, o da apostol deyil. Qafqaz Albaniyasında mövcud olan kilsə apostol kilsəsidir. Bizə bu dini İsanın apostolları gətiriblər, Qafqazda biz xristianlığı birinci qəbul etmişik”.
R.Danakarinin sözlərinə görə, “yersiz gəldi, yerli qaç” prinsipini əlində bayraq edən ermənilər alban kilsələrinə qarşı saxtalaşdırma işlərini davam etdirirlər. O deyir ki, biz erməniləri Xudavəngdən qovuruq, amma onlar rus sülhməramlılarının himayəsi altında yenə də orada peyda olurlar. “Erməni saxtakarlığı həddini o qədər aşıb ki, onlar alban irsinə qarşı saxtalaşdırmanı davam edirlər. Ermənilərin Qafqazda, bizim ərazilərdə heç bir dini, maddi-mədəni irsi yoxdur.
Ermənilərin xristian həmrəyliyindən istifadə edərək onlardan dəstək aldıqları məlumdur, alban-udi icması nə üçün xristian həmrəyliyindən istifadə etmək istəmir? Ümumiyyətlə, dünya xristianlıq mərkəzlərinə əsl həqiqətləri çatdırmaq üçün Alban-Udi icması nə kimi işlər görür, nə üçün xristian təəssübkeşliyindən istifadə etmək istəmir?
R.Danakari bildirdi ki, Alban-Udi icması bu illərdə rahat şəkildə oturmayıb, müxtəlif işlər görüb, beynəlxalq təşkilatlara, hətta Roma Papasına belə məktub yazaraq erməni saxtakarlığını çatdırıb. R.Danakari xatırlatdı ki, ermənilər rus pravoslav kilsələrini də erməniləşdiriblər, lakin ruslar buna göz yumurlar. “Hesab edirik ki, xristian alban kilsəsi erməni kilsəsinin tabeliyindən çıxarılmalı və onun müstəqilliyi bərpa olunmalıdır. Biz çalışırıq ki, xristian alban kilsəsinin hüquqları qaytarılsın və müstəqilliyi bərpa olunsun. Pandemiya bizi bir neçə il geri saldı. Biz beynəlxalq qurumlara mütəmadi olaraq müraciət edirik, Roma Papasına da məktub yazmışıq. Cenevrədə bütün dünya kilsələrinin şurasına da müraciət etmişik. Onların hamısının bundan xəbərləri var. Alban xristian kilsəsinin müstəqilliyinin bərpasına nail olmalıyıq ki, bununla da erməni saxtakarlığı üzərində qələbə çalımış olaq. Alban mədəniyyətini məhv etməklə, erməniləşdirməklə kifayətlənməyən ermənilər hələ bizə qarşı qondarma ittihamlar da irəli sürməyə çalışırlar. Amma tarixi həqiqət bir başqadır, heç zaman erməni saxtakarlığı həqiqətin üzərindən xətt çəkə bilməz” - deyən R.Danakari hesab edir ki, bu gün əsas işimiz xristian alban kilsəsini erməni kilsəsinin tabeliyindən çıxarmaq və onun müstəqilliyini bərpa etmək olmalıdır. Qafqaz Albaniyasının tarixi irsinin tək varisi Azərbaycan dövlətidir və xristian alban kilsəsinin səlahiyyətləri Azərbaycana keçməlidir.
İradə SARIYEVA
