Müasir dövrdə valideynlər uşaqları üçün təhsilin nə qədər vacib olduğunu bilir və onların ən yaxşı məktəblərdə oxuması üçün çalışırlar. Bəllidir ki, Azərbaycanda dövlət məktəblərində orta təhsil pulsuzdur. Lakin ölkəmizdə orta təhsil verən pullu lisey və gimnaziyalar var. Bu liseylərdə təhsillə yanaşı, qiymətlər də yüksək səviyyədədir.
O da məlumdur ki, bütün dünya koronavirus infeksiyasından əziyyət çəkir. Virusdan qorunmaq üçün ölkəmizdə də müəyyən tədbirlər həyata keçirildi. Həyata keçirilən tədbirlərdən biri də karantin dövründə bəzi iş yerlərinin müvəqqəti olsa da bağlanması idi. Bunun qarşılığında isə dövlət tərəfindən həmin sahibkarlara dəstək göstərildi. Həmçinin, pullu təhsil alan tələbələrə güzəşt edildi. Dövlətin vətəndaşlara çoxlu sayda güzəşt etməsinə baxmayaraq, bəzi sahibkarlar hələ də artıq qazanc haqqında düşünürlər. Belə ki, liseylər təhsil haqqını qaldırıblar.
İlk olaraq Azərbaycan Beynəlxalq Məktəbindən (“TISA International School of Azerbaijan”) başlayaq. Belə ki, qeyd etdiyimiz özəl məktəbdə təhsil haqqı olduqca yüksəkdir. 1-9-cu sinfədək təhsil haqqı illik olaraq 34 min ABŞ dolları, 9-11-ci siniflər üzrə təhsil haqqı təxminən 40 min ABŞ dollarıdır (təxminən 68 min manat).
“Baku Oxford School” tam orta ümumtəhsil məktəbinin illik təhsil haqqı 15 500 manatdır. Burada 1-ci sinifdən 11-ci sinfə qədər təhsil haqları eynidir. Qeyd edək ki, bu məbləğ 10 aya bölünür və valideyn hər ayın müəyyən olunmuş günündə təhsil haqqını ödəyir. Həmçinin, məktəbdə 8-ci sinifdən başlayaraq şagirdin xaricdə təhsil almasını nəzərə alıb, onu həmin istiqamət üzrə hazırlayırlar.
“Azərbaijan British College”ində ibtidai təhsil 15 400 manat, orta təhsil 16 400 manatdır.
“Müasir Təhsil Kompleksi”ndə təhsil haqqı Azərbaycan bölməsində 12 min manat, xarici bölmədə isə 16 min manatdır.
“Avropa Azərbaycan Məktəbi”ndə məktəbəqədər hazırlıq 7900 manat, 1-4-cü siniflər 9950 manat, 5-9-cu siniflər 12 min manat, 10-11-ci siniflər 14 min manatdır.
“Oxbridge Academy”da 1-6-cı sinif 6 500, 7-9-cu sinif 7 800, 10-11-ci sinif 9100, 12-13-cü sinif 11 700 ABŞ dollarıdır.
“...bu qiymətlər reallıqdan kənar olmamalıdır”
Məsələ ilə bağlı fikir bildirən təhsil eksperti Kamran Əsədov qeyd etdi ki, özəl təhsil müəssisələri təhsil haqlarını müəyyənləşdirməkdə müstəqildirlər. Lakin, təbii ki, bu qiymətlər reallıqdan kənar olmamalıdır: “Hazırda ölkədə özəl təhsil xidməti göstərən liseylər var. Onların arasında xidmət haqlarında şişirdilmiş böyük məbləğ görürük. Özəl liseylər və orta ümumtəhsil müəssisələri dövlətin müəyyənləşdirdiyi tədrislə bərabər, eyni zamanda, müəyyən xidmətlər də göstərirlər. Bura nəqliyyat servisi xidməti, qidalanma, forma, kitabxanalardan istifadə də daxildir. Bundan başqa, özəl liseylər və orta məktəblər qanunvericilikdə nəzərdə tutulmayan müəyyən xarici dilləri də tədris edirlər. Qanunvericiliyə görə, yalnız rus, ingilis və qanunda nəzərdə tutulmuş digər xarici dillər tədris oluna bilər”.
Həmsöhbətimizin sözlərinə görə, Azərbaycanda illik təhsil haqqı 50-60 min manata qədər olan özəl liseylər var. Lakin bu özəl məktəblərin qiyməti reallığı əks etdirmir: “Dünyanın ən inkişaf etmiş ölkələrində belə bu cür fantastik qiymətlər yoxdur. Heç bir halda, Avropa, Amerika, hətta Cənub-Şərqi Asiya ölkələrində bu qədər fantastik qiymətlər görə bilmərik. Yəni təhsil ödənişləri insanların əməkhaqları ilə mütənasiblik təşkil etməlidir. Lakin biz bunun əksini görürük”.
Günel CƏLİLOVA
