“Zəngəzur dəhlizi Azərbaycana Avrasiyanın nəqliyyat və logistika mərkəzi kimi mövqeyini gücləndirməyə imkan verəcək”. Bunu Prezident İlham Əliyev BMT-nin Asiya və Sakit okean üçün İqtisadi və Sosial Komissiyasının 77-ci sessiyasında videoformatda çıxışı zamanı deyib.
Dövlət başçısı çıxışında Asiya və Sakit okean hövzəsi ölkələrini sözügedən dəhlizin potensialını nəzərdən keçirməyə çağırıb: “Azərbaycan regionda dayanıqlı sülh və təhlükəsizliyi təmin etmək arzusundadır. Azərbaycan Şərq-Qərb, Şimal-Cənub, Şimal-Qərb nəqliyyat dəhlizləri kimi regional bağlantı layihələrinin icrasına mühüm töhfə vermişdir. Hazırda biz Azərbaycan ərazisindən Asiyanı Avropa ilə birləşdirən Şərq-Qərb dəhlizinin tərkib hissəsi olacaq Zəngəzur nəqliyyat dəhlizi üzərində çalışırıq. Bu dəhliz Azərbaycana Avrasiyanın nəqliyyat və logistika mərkəzi kimi mövqeyini gücləndirməyə imkan verəcək. Mən Asiya və Sakit okean hövzəsindən olan tərəfdaş ölkələri bu regional layihənin potensialını nəzərdən keçirməyə dəvət edirəm”.
Belə görünür ki, Zəngəzur dəhlizi tərəfdaş ölkələrə ciddi perspektiv vəd edir.
“Zəngəzur dəhlizi, faktiki olaraq, Avropa ilə Asiyanı birləşdirəcək Şərq-Qərb dəhlizinin tərkib hissəsidir”
Məsələyə münasibət bildirən ekspert Azər Allahverənovun fikrincə, Zəngəzur dəhlizi reallaşandan sonra tranzit daşımalarda yeni imkanlar yaranacaq və bundan bir sıra ölkələr istifadə etmək imkanı əldə edəcəklər: “Logistika layihələrində alternativ marşrutların olması müəyyən mənada vacib hesab olunur. Çünki bir dəhliz olanda, istər-istəməz, məsrəflər və digər xərclər yüksək olur. O baxımdan geostrateji nöqteyi-nəzərdən məsələyə yanaşdıqda bir neçə alternativin olması mütləq şərt hesab olunur. Ona görə də Zəngəzur dəhlizinin reallaşması həm də alternativlərin sayının artması deməkdir. Məlum olduğu kimi, Bakı-Tiflis-Qars dəmir yolu var. Ona da alternativ digər dəhlizlər var. Deməyim odur ki, bir neçə dəhliz olanda daşımalarda daha əlverişli qiymət formalaşır. Bu da iqtisadi inkişafa stimul verir. Ölkələrə daşımalarda seçim imkanı verir. Logistika imkanlarından yararlanmaq istəyən dövlətlərin sayı artır. Prezident İlham Əliyev uzaqgörən dövlət xadimi olduğuna görə bütün bunların fərqindədir. Nəzərə almaq lazımdır ki, Zəngəzur dəhlizi məsafə baxımından daha yaxındır. Bununla belə, sözügedən layihə Şimal-Cənub, Şərq-Qərb dəhlizlərinin timsalında yeni bir elementin yaranması deməkdir. Bu səbəbdən Prezident İlham Əliyev çıxışında bunu xüsusi vurğuladı. Azərbaycan tərəfinin tədbir çərçivəsində bu mesajı onlara çatdırması olduqca vacib əhəmiyyət kəsb edir. Çünki burada söhbət təkcə Naxçıvanın Azərbaycanın materik hissəsi ilə birləşdirilməsindən getmir. Zəngəzur dəhlizi, faktiki olaraq, Avropa ilə Asiyanı birləşdirəcək Şərq-Qərb dəhlizinin tərkib hissəsidir. Ona görə də Prezidentin məlum mesajı olduqca mühüm əhəmiyyətə malikdir. Bu həm də geosiyasi baxımdan yeni bir yanaşmanın formalaşmasına, onun ortaya qoyulmasına təkan verir. Çünki söhbət Avrasiyanın nəqliyyat və logistika mərkəzi kimi bir xəritədə Azərbaycanın yerinin möhkəmləndirilməsindən gedir. Ona görə də Azərbaycanın çoxşaxəli tranzit nəqliyyat sistemi qurması əlavə dividendlər vəd edir. Zəngəzur dəhlizi də bu baxımdan mühüm əhəmiyyət kəsb edir”.
Ekspert onu da qeyd etdi ki, tərəfdaş ölkələr bu regional layihənin reallaşmasından fayda götürəcəklər.
Vidadi ORDAHALLI
