ABŞ prezidenti Co Baydenin bu ilin yanvar ayında USAİD-in (ABŞ Beynəlxalq İnkişaf Agentliyi) rəhbəri vəzifəsinə təyin etdiyi Samanta Powerin ermənpərəstliyi meydana çıxıb. Belə ki, o, “Twiter” üzərindən paylaşdığı statusunda “ermənilərə məftunluğunu” yazıb və 24 apreli özünün “yenidən doğuşu” kimi ifadə edib.
Beynəlxalq İnkişaf Agentliyi bütün dünya ölkələrində ABŞ adından “demokratik inkişafa” yönəlmiş layihələri icra edən və ya layihələrə maliyyə dəstəyi verən bir təşkilatdır. O cümlədən də Azərbaycanda “demokratikləşmə” layihəsinə maliyyə ayırıb. Təbii ki, belə bir təşkilat və ona rəhbərlik edən şəxs bütün ölkələrə, o cümlədən də Azərbaycana münasibətdə hər hansı bir ayrıseçkiliyə yol verməməlidir. Belə bir quruma rəhbərlik edən şəxs isə tamamilə tərəfsiz olmalı, heç bir xalqa, ölkəyə simpatiya bəsləməməlidir, çünki bütün dövlətlərlə, xalqlarla işləyir. Amma, göründüyü kimi, S.Power açıq münasibət bildirib və Baydenin qondarma “erməni soyqırımı” ilə bağlı bəyanatını özünün “doğuluş günü” hesab edir.
24 apreli özünə “doğum günü” seçən USAİD rəhbərinin Azərbaycana münasibəti necə olacaq, onun münasibətində qərəzlilik özünü büruzə verməyəcəkmi?
“Azərbaycan bu komanda və qurumla münasibətlərinə yenidən baxmalıdır”
Qeyd edək ki, S.Powerin “Tvitter”də ortaya qoyduğu ermənipərəst mövqeyini ifşa edən tanınmış media eksperti Müşfiq Ələsgərli bu barədə öz “Facebook” hesabında ictimaiyyətə məlumat verib.
M.Ələsgərli “Bakı-Xəbər”ə şərhində də qeyd etdi ki, USAİD rəhbəri S.Powerin davranışları “ABŞ demokratiyasının” mahiyyətini faş edib. “USAİD ABŞ-ın federal hökuməti adından dünya ölkələrində inkişaf məqsədli layihələrə dəstək verən bir qurumdur. Onun maliyyələşdirdiyi, dəstək verdiyi layihələrin məzmunu çoxçeşidli olsa da, sonucda demokratik düzənin qurulmasını, demokratik inkişafı hədəfləyir. Təşkilatın missiyası barədə şüarında göstərilir ki, USAİD Amerika xalqı adından xarici ölkələrdə demokratik dəyərləri təbliğ edir, azad, firavan, dinc demokratik cəmiyyətlər quruculuğunu hədəfləyir. Hazırda 27 milyard dollarlıq nəhəng büdcəyə malik olan USAİD özünün maliyyə imkanlarından istifadə edərək, dünyanın bütün ölkələrində görünür, ABŞ dövlətinin demokratik inkişafa dəstək verməsi imicini formalaşdırmağa çalışır. Azərbaycanda da bu təşkilatın dəstəyilə yüzlərlə layihə icra edilib, hazırda da icra edilməkdədir.
Amma USAİD-in yeni rəhbəri S.Powerin davranışları bu qurum, o cümlədən, ümumilikdə, ABŞ demokratiyası barədə təsəvvürləri alt-üst edir. Görünür, ABŞ-ın demokratiya anlayışına yanaşması imitasiya xarakterlidir, ABŞ-ın siyasi maraqlarını həyata keçirmək üçün bir vasitədir”.
M.Ələsgərlinin fikrincə, standartlara görə, beynəlxalq təşkilat obyektiv, qərəzsiz, tərəfsiz olmalıdır, missiyasına, şüarına uyğun davranmalıdır. “S.Power isə siyasiləşmiş, qütbləşmiş bir şəxsdir, konkret siyasi görüşləri var və USAİD rəhbəri postundan faydalanıb öz siyasi ambisiyalarını dünyaya qəbul etdirir. S.Power qatı ermənipərəst çıxışlar edir. Daha doğrusu, beynəlxalq erməni şəbəkəsinin təsir dairəsində olan, erməniliyə xidmət edən biridir. Bunu həm əməlləri, həm də sosial şəbəkələrdəki çıxışları ilə sübut edib. Onun indi “Twitter” üzərindən paylaşdığı statusları buna əyani misaldır. O, ermənilərə məftunluğunu ifadə etmək üçün 24 aprel qondarma “erməni soyqırımı” gününü özünün “doğuş günü” kimi ifadə edir, yalançı “soyqırım” iddialarına dəstək verir. Belə nəticə çıxır ki, Samanta və onun rəhbəri olduğu USAİD bundan sonra beynəlxalq demokratik inkişafa deyil, konkret siyasi qruplara, daha çox da ermənilərə xidmət edəcək. Bu qədər siyasiləşmiş, qütbləşmiş biri USAİD kimi möhtəşəm, beynəlxalq statuslu, bütün dünya ölkələrində görünən təşkilata necə rəhbərlik edəcək? Əgər edirsə, deməli, ortada başqa məqamlar var. Məsələ ondadır ki, Samanta ABŞ-ın yeni prezidenti Baydenin komandasının üzvüdür, onun kadrıdır. Bayden özü də aprelin 24-də qondarma “erməni siyqırımı” ifadəsini işlətdi. Problem ABŞ prezidentinin ermənilərə rəğbət bəsləməsində deyil. Problem ABŞ prezidentinin ikiüzlü, qərəzli davranışlarındadır. Məsələ ondadır ki, “erməni soyqırımı” barədə iddialar mübahisəlidir, tarixçilərin araşdırıb qiymət verməli olduğu bir məsələdir. Mövzu bu günə qədər tarixi təsdiqini tapmayıb. Tarixən mübahisəli olan bir mövzunun ABŞ prezidentinin dilindən real fakt kimi dəyərləndirilməsi təəccüb doğurur. Qeyri-adi görünən məqam odur ki, Bayden yaşadığı dövrdə onun müşahidəsi ilə bir çox real soyqırım törədilib”.
M.Ələsgərli vurğuladı ki, bunların sırasında 1992-ci ildə Azərbaycanın Xocalı şəhərində Ermənistan silahlı qüvvələri tərəfindən bizim soydaşlarımıza qarşı törədilmiş soyqırım aktı da var. Ekspertin sözlərinə görə, 2020-ci ildə 27 sentyabr-10 noyabr aralığında davam etmiş 44 günlük Qarabağ müharibəsi dövründə də Ermənistan silahlı qüvvələri eyni hərəkətləri təkrarladılar: Azərbaycanın Bərdə, Tərtər, Gəncə şəhərlərinin dinc əhalisini istifadəsi qadağan edilmiş kütləvi qırğın silahları ilə atəşə tutaraq qətliamlar törətdilər, yenidən soyqırımı aktı təşkil etməyə çalışdılar. “Bütün bunlar gerçək həyat hadisələri olsalar da, ABŞ dövləti və onun indiki prezidenti Bayden tərəfindən qınanmadılar, konkret bəyanatlarla pislənmədilər.
Bütün bunlar o nəticəni doğurur ki, ABŞ dövləti və onun prezidentləri faktlara ikili standartlarla yanaşırlar: soyqırım aktları barədə münasibətlərini onun reallıq dərəcəsinə görə deyil, etnoslara, dinlərə mənsubluğuna görə müəyyən edirlər. Hansı ki, ABŞ-ın özünün də iştirakı ilə qəbul edilmiş beynəlxalq konvensiyalar, demokratik prinsiplər, beynəlxalq insan haqları standartları insanların, toplumların dini, milli, sosial vəziyyətlərinə görə diskriminasiya edilmələrini yolverilməz sayırlar. ABŞ prezidenti indiki hərəkətləri ilə bu prinsipləri tapdalayır, öz siyasətində ikiüzlülük prinsipinə söykənir, beləliklə, ABŞ-ın demokratik imicinə də ləkə vurur.
Görünən budur ki, Baydenin qondarma "erməni soyqırımı"nı dilə gətirməsi, sadəcə, "ermənilərin könlünü almaq üçün" atılmış addım deyil. Bayden komandasının erməniliyə xidmətlə bağlı xüsusi tərtibli geniş planları üzə çıxır. Onun S.Poweri USAİD-ə rəhbər təyin etməsi də bu planın tərkib hissələrindən biridir. Azərbaycan bu komanda və qurumla münasibətlərinə yenidən baxmalıdır. Xüsusən USAİD Azərbaycanda etibarını itirmiş sayılır” - deyə M.Ələsgərli qeyd etdi.
İradə SARIYEVA
