Məlum olduğu kimi, bu günlərdə Ermənistanın baş naziri Nikol Paşinyan istefa verib. Bu xüsusda o, xalqa müraciəti zamanı bildirib: “İyunun 20-də növbədənkənar parlament seçkilərinin keçirilməsi üçün vəzifəmdən istefa verirəm”.
Ermənistan prezidenti Armen Sarkisyan da artıq Nikol Paşinyanın baş nazir postundan texniki istefasını qəbul edib. Erməni dövlət başçısının saytında dərc edilmiş fərmanda bununla bağlı bildirilir: “Konstitusiyanın 130-cu maddəsinə əsasən hökumətin istefasını qəbul edirəm”. Bunun ardınca Ermənistan parlamentinin hakim “Mənim addımım” fraksiyası baş nazir postuna yenidən Nikol Paşinyanın namizədliyini irəli sürüb. Paşinyan hökumət başçısı vəzifəsini müvəqqəti olaraq yerinə yetirməkdə davam edəcək. O bildirib ki, rəhbərlik etdiyi "Vətəndaş razılığı" partiyası seçkilərdə iştirak edəcək: "Xalq mənim baş nazir vəzifəsindən getməyimə qərar verərsə, mən onun iradəsini yerinə yetirəcəyəm. İnsanlar mənim baş nazir vəzifəsində qalmağıma qərar versələr, o zaman bu qərarı yerinə yetirəcəyəm".
Onu da qeyd edək ki, Ermənistanda seçkilər yeni məcəllə əsasında həyata keçiriləcək. Ermənistan parlamenti aprelin 1-də Seçki Məcəlləsinə müvafiq düzəlişləri qəbul etmişdi. Bu düzəlişlərə görə, Ermənistanda qismən majoritar seçki sistemi ləğv olunur və ölkə tam proporsional seçki sisteminə keçir. Ermənistan parlamentinin spikeri Ararat Mirzoyan da artıq “Seçki Məcəlləsinə dəyişiklik və düzəlişlər” haqqında qanunu imzalayıb. Ermənistan prezidenti Armen Sarkisyan bu qanunu imzalamayacağını demişdi. Lakin o, qanunla bağlı Konstitusiya Məhkəməsinə də müraciət etməyib. Bu səbəbdən düzəlişlər avtomatik qüvvəyə minib. Bu arada Ermənistanın birinci prezidenti Levon Ter-Petrosyan ölkənin bütün siyasi qüvvələrini Konstitusiya Məhkəməsi aparatının keçmiş rəhbəri Edqar Kazaryanın arqumentlərinə tam ciddiliyi ilə yanaşmağa çağırıb. Konstitusiya Məhkəməsinin keçmiş aparat rəhbəri bildirib ki, konstitusiyaya görə, baş nazir istefadan sonra bu vəzifəni tuta bilməz. Bu fonda Ter-Petrosyanın çağırışında deyilir ki, onun sözü ilk növbədə faktiki olaraq Nikol Paşinyanla qeyri-konstitusion sövdələşməyə getmiş müxalif “Maariflənmiş Ermənistan” və “Çiçəklənən Ermənistan” parlament fraksiyalarına aiddir. Ter-Petrosyan bildirir ki, bu məqam nəzərə alınmasa, adıçəkilən partiyalar qanunsuz seçkinin keçirilməsinə görə məsuliyyət daşıyacaq. Sabiq prezident hesab edir ki, xalqın ruh yüksəkliyi şəraitində keçirilmiş və Paşinyanı hakimiyyətə gətirmiş 9 dekabr 2018-ci il seçkisi də qanunsuz olub.
Onu da bildirək ki, Robert Köçəryan və Serj Sarkisyanın prezidentlikləri dövründə müxalifət sıralarında yaxın müttəfiq olmuş Paşinyan və Ter-Petrosyanın arası ötən həftə baş nazirin parlamentdə etdiyi nitqdən sonra dəyib. Həmin çıxışında Paşinyan iddia etmişdi ki, Ter-Petrosyan 2018-ci ildə onunla görüşəndə ərazilərin Azərbaycana qaytarılmasını məsləhət görüb. Levon Ter-Petrosyanın ofisi bu iddianı rədd edib və baş naziri yalançı adlandırıb. Levon Ter-Petrosyan onu da bildirir ki, baş nazir Zəngəzurda da qanun pozuntularının yaşanmasına görə cavab verməlidir. O xatırladır ki, Zəngəzurda baş nazirin səfəri zamanı zorakı etirazlarla bağlı 27 nəfər barəsində “xuliqanlıq və hakimiyyət nümayəndəsinə qarşı zorakılıq” maddələri ilə cinayət işləri açılıb. Levon Ter-Petrosyan bununla yanaşı bildirir: “Mənim üçün Paşinyanın “Zəngəzur səfəri”nin ən iyrənc epizodu axşam saatlarında icazəsiz şurnuxlu bir qadının evinə soxulması idi. Ölkəmin baş nazirini daha alçaldıcı bir vəziyyətdə görmək istəməzdim”. Qeyd edək ki, Paşinyan Zəngəzura səfəri zamanı Şurnux kəndində sakinlərdən birinin evində gecələmək istəyib. Ev sahibəsi baş naziri evinə buraxmaq istəməsə də, o və yanındakı nümayəndə heyəti evə daxil olub.
Ümumiyyətlə, ötən həftəsonu Zəngəzur vilayətində baş vermiş hadisələr Ermənistan cəmiyyətində geniş müzakirə olunur. Hüquq müdafiəçisi Vardan Arutyunyan qeyd edir ki, ölkədə hələ indiyədək belə vəziyyət, iqtidar və müxalifət arasında bu qədər zorakılıq və qarşıdurma olmayıb: “Həm iqtidar, həm də, belə demək mümkünsə, müxalifət bu gün qarşı-qarşıyadır və bu bizim üçün təhqiramizdir. Mən müxalifət tərəfindən əvvəllər belə bir münasibətin olmasını xatırlamıram. Əgər bir jurnalist məndən soruşsa ki, Ermənistanda son 20-25 ildə müxlifət tərəfindən zorakılıq olduğunu xatırlayırammı, yadıma gəlməz. Amma hakimiyyət tərəfindən 1 mart 2008-ci ildən bəri çoxsaylı zorakılıq hallarını sadalaya bilərəm. 2004 və 2003-cü illəri xatırlaya bilərəm”.
Yaranmış vəziyyətdə müxalifət partiyaları Paşinyanı yenə hakimiyyətdən uzaqlaşmağa çağırır. Lakin Rusiyanın “Valday” klubunun eksperti Stanislav Pritçin bildirir ki, müxalifətin mövqeyinə baxmayaraq, Nikol Paşinyan Ermənistanda iyunun 20-də keçiriləcək növbədənkənar seçkilərdə qalib gələcək. Onun sözlərinə görə, sorğulara əsasən, ölkədə Paşinyana dəstək qalıb və onu müəyyən siyasi güc qoruyur: “Əgər fövqəladə bir şey baş verməzsə, Paşinyan qalib gələcək. Qarabağ müharibəsinin nəticələrinə baxmayaraq, özündən əvvəlki liderlərin reytinqinin olmaması da onun lehinə işləyir. Üçüncü qüvvə yoxdur, buna görə də o, böyük ölçüdə mübahisəsiz lider olaraq qalır”.
Nahid SALAYEV
