İran niyə bunu etdi - ermənilərə saxta 106 illik keçirmək imkanı verildi, üstəlik, Qazançı kilsəmiz...

Faiq Ələkbərli: “İran rejiminin qondarma “erməni soyqırımı”nın təbliğ edilməsinə geniş şərait yaratması islam həmrəyliyinə ziddir”

img

Tarixi saxtakarlığa rəvac verən bir sıra ölkələrdə qondarma “erməni soyqırımı” ilə bağlı tədbirlər keçirildi. Çox təəssüflər olsun ki, ədalətdən, haqdan, həqiqətdən uzaq olanlar və tarixi saxtalaşdıranlar 24 aprel tarixində ermənilərə züy tutdular.  

Teleqram kanallarında, sosial şəbəkələrdə və KİV-də yayılan məlumatlara görə, İranda da qondarma “erməni soyqırımı”nın 106-cı “ildönümü”nün keçirilməsinə şərait yaradılıb. Tədbir haqda yayılan məlumatda qeyd edilir ki, burada erməni xəlifəliyinin baş yepiskopu Sepuh Sarkisyanla yanaşı, Ermənistanın İrandakı səfiri və ölkə rəsmiləri də iştirak ediblər. Qondarma tədbirin  plakatlarınin üzərində isə Azərbaycanın, Şuşanın Qazançı kilsəsinin rəsmi də təsvir olunub.

Yeri gəlmişkən, həmin tədbiri əks etdirən fotolar da sosial şəbəkələrdə yayılıb.

İran İslam Respublikasının belə bir qondarma məsələ ilə bağlı tədbir keçirilməsinə icazə verməsi həqiqətən də müsəlman ölkəsinə yaraşmayan bir hərəkətdir.

İran nə üçün bu qondarma “soyqırım”ın “ildönümü” ilə bağlı tədbirin keçirilməsinə icazə verib, bu ölkə nə üçün erməni din xadimlərinə, səfirlik nümayəndələrinə etiraz etməyib?

Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli bizimlə söhbətində bildirdi ki, İran rejiminin qondarma “erməni soyqırımı”nın 106-cı “ildönümü” ilə bağlı tədbirlərin Tehranda və digər şəhərlərdə keçirilməsinə müəyyən qədər göz yumması, icazə verməsi göz önündədir: “Hətta Tehranda keçirilən qondarma məsələyə həsr edilən tədbirdə erməni xəlifəliyinin baş yepiskopu Sepuh Sarkisyanın, eləcə də Ermənistanın İrandakı səfirinin, digər şəxslərin iştirak etməsi, sözsüz, qəbuledilməzdir. Ancaq İran rejimi buna müəyyən mənada şərait yaradıb və bu dövlətin bəzi nümayəndələri də qondarma “erməni soyqırımı”nın 106-cı “ildönümü” tədbirlərində iştirak ediblər. Üstəlik, qondarma “soyqırım”la bağlı keçirilən tədbirdə nümayiş olunan plakatlarda Azərbaycana, Azərbaycan türklərinə aid bəzi simvolların, o cümlədən də Qazançı kilsəsinin erməniləşdirilərək təqdim edilməsi də yolverilməzdir, qanunaziddir. Ermənilərin şəkillərini tədbirdə təqdim etdikləri Qazançı kilsəsinin onlara heç bir aidiyyəti yoxdur, bu, erməni irsi deyil. Qazançı da, digər kilsələr də islamdan əvvəl Şimali Azərbaycanda mövcud olan Albaniya dövləti dövrünə aid alban-xristian abidələridir. Çox təəssüf ki, ermənilər bu abidələri də saxtalaşdıraraq, hər yerdə onu öz abidələri kimi qələmə verirlər və böyük təxribatlar törədirlər. Çox təəssüf ki, İran rejimi də əvvəlki illərdə olduğu kimi, yenə də nəticə çıxarmır və bir daha Ermənistana və erməni lobbisinə dəstək verir, onların bu kimi qondarma “soyqırım” tədbirinin keçirilməsinə şərait yaradır.

Biz 44 günlük mübaribədə gördük ki, Azərbaycanın qazandığı qələbə ilə bağlı Güney Azərbaycan türkləri öz sevinclərini paylaşanda, yaxud müharibə dövründə İranın Ermənistana silah-sursat və digər yardımlar göndərməsinə etiraz edəndə onlara qarşı hansı tədbirlər görülürdü. Burada açıq-aşkar görünür ki, İran rejimi dövlətin adında olan islam sözünə uyğun olmayan, yaraşmayan hərəkətlərini yenə də davam etdirir. Biz bilirik ki, məsələn, ABŞ-ın indiki prezidenti qondarma “erməni soyqırımı” ifadəsini hansı mənadasa dilə gətirirsə, bu və ya digər anlamda özünü müsəlman adlandıran İranın ermənilərə bu kimi dəstək verməsi başadüşülən deyil. Halbuki, İran ABŞ-a münasibətində onları qəbul etmədiyini deyir, onları “şeytan dövləti” adlandırır. Amma, gördüyümüz kimi, türk, istər Azərbaycan, istərsə də Türkiyə məsələsi ortaya gələndə islam ölkəsi olan İranın atdığı addımlar heç də ABŞ prezidentinin atdığı addımlardan, Fransanın mövqeyindən fərqlənmir. Bu da onu göstərir ki, İran rejimi də türklərlə bağlı məsələyə gələndə yenə də ikiüzlülüyə yol verir, bu kimi saxta “soyqırım”ın təbliğinə dəstək verir”.

F.Ələkbərlinin fikrincə, İran İslam Respublikası islam mövqeyindən, şiəlik prinsipindən çıxış etsəydi, onlar 1918-ci ildə Xoyda, Səlmasda, Urmuda - Azərbaycanın güneyində, xüsusən də bu yerlərdə 10 minlərlə türkün, müsəlmanın ermənilər tərəfindən qətlə yetirilməsi məsələsini gündəmə gətirərdi və ermənilərin türklərə, müsəlmanlara qarşı soyqırım törətdiklərini dünyaya bəyan edərdi. “Ancaq İran vaxtilə Qacarlar dövləti dövründə məhz ermənilərdən, aysorlardan və sairdən ibarət “xristian ordusu” tərəfindən türklərə və müsəlmanlara qarşı törədilən qətliamları gündəmə gətirmək əvəzinə, hansısa təxribatlara, saxtakarlığa yol verir, guya 1915-ci ildə bir “erməni soyqırımı” olub. İran qondarma “erməni soyqırımı”nin “ildönümü”nün nəinki Tehranda və ölkənin başqa yerlərində keçirilməsinə göz yumub, hətta buna şərait yaradıb”.

F.Ələkbərlinin qeyd etdiyinə görə, ümid edilirdi ki, 44 günlük müharibədən sonra həm Türkiyəyə, həm də Azərbaycana münasibətdə İran artıq müəyyən mənada dəyişəcək. Müsahibimiz dedi ki, bu günə qədər İran İslam Respublikası istər Azərbaycan Respublikasına, istərsə də Türkiyə Cümhuriyyətinə qarşı həmişə mötədil yanaşıb. “44 günlük müharibədən sonra görürük ki, Türkiyə Cümhuriyyətində də, Azərbaycan Respublikasında da artıq İran rejiminin ikiüzlülüyünə qarşı dözümsüzlük ortaya çıxır. Bu da təbiidir. Biz nə zamana qədər bu ölkənin ikiüzlü əməllərinə göz yumacağıq? Yəni istər Türkiyə Cümhuriyyəti, istərsə də Azərbaycan Respublikası olsun. Ona görə də İran rejiminin qondarma “erməni soyqırımı”nın təbliğ edilməsinə geniş şərait yaratması islam həmrəyliyinə ziddir. Açıq görsənir ki, İran bu dəfə də ermənipərəst mövqeyini gizlətmədi” - deyə F.Ələkbərli qeyd etdi.

İradə SARIYEVA

Son xəbərlər