Məlum olduğu kimi, sabiq millət vəkili, YAP-ın Veteranlar Şurasının üzvü, partiyanın Xətai rayon təşkilatının sədri Hüseynbala Mirələmov çalışdığı Azərbaycan Dövlət Neft və Sənaye Universitetinin Elmi Şurasının onlayn iclasında katibəsinə qarşı etdiyi qeyri-etik hərəkətilə gündəmə gəldi.
Sözügedən video bir neçə dəqiqə ərzində sosial şəbəkələrdə sürətlə yayıldı. Hər kəs 76 yaşlı sabiq deputatı etdiyi hərəkətə görə tənqid etməyə başladı. Görüntülərin yayılmasının ertəsi günü universitetinin mətbuat xidməti ADNSU-da Qaz Neft Mühəndisliyi fakültəsinin kafedra müdiri Hüseynbala Mirələmovun öz ərizəsi ilə işdən azad olunduğunu açıqladı. Həmçinin, sabiq deputatın mənəvi-əxlaqi dəyərlərdən uzaq davranışı ilə bağlı məsələ mənsub olduğu partiyanın İdarə Heyətinin keçiriləcək iclasının gündəliyinə daxil edilib və həmin davranışa iclasda qiymət verilməsi gözlənilir. Videonun ortaya çıxması özü ilə bərabər xeyli suallar gətirdi. Bəziləri sözügedən kadrların hələ bir neçə ay əvvəl - ADNSU-nun yanvarın 27-də keçirilən onlayn iclası zamanı qeydə alındığını güman edir. Çox maraqlıdır ki, bu cür sərt ictimai qınağın fonunda Mirələmova dəstək verən ictimai statusu yüksək şəxslər də tapıldı. Gəlin, həmin adamların arqumentlərilə tanış olaq.
Xalq şairi, Milli Məclisin deputatı Sabir Rüstəmxanlı bu hadisənin mediada işıqlandırılmasının yanlış olduğunu bildirib: “Bu görüntüləri yaymaq xəstə şüurun, anormal psxioloji durumun məhsuludur. Hüseynbala Mirələmov bizim çox hörmətli ziyalılarımızdan biridir. Yaxşı yazıçıdır, tanınmış şəxsdir. Bu qədər zəhmətə hörmət etməyib xırda şeyi yaymaq nə dərəcə doğrudur? Hüseynbala Mirələmovun hərəkəti normal deyil, ancaq yayılması on qat anormal hərəkətdir və ayıbdır”
Hüseynbala Mirələmovun ən yaxın dostu, keçmiş deputat Hadı Rəcəblinin isə məsələyə münasibəti belə olub: “Hüseynbala Mirələmovla dostluğumuzun dərin tarixi var. Hazırda Hüseynbala müəllim oruc tutur, namaz qılır. Belə bir videonun yayılması ancaq montaj ola bilər”. Hadı Rəcəbli bir neçə il bundan öncə özü ilə bağlı da belə bir halın baş verdiyini xatırladıb: “Bir neçə il bundan qabaq bir xanımla rəqs etmişdim. Həmin rəqsin videosunu yayıb məni də təhqir etmişdilər. İndi də Hüseynbala müəllimlə bağlı video sosial şəbəkələrdə yayılıb”.
Millət vəkili Elman Nəsirov isə bildirib ki, indiki zamanda görüntülər hələ o demək deyil ki, Hüseynbala Mirələmov günahkardır: “Bu gün azyaşlı uşaq telefonla mülkü bir şəxsin fotosunu montaj edərək, ona ABŞ polisinin formasını geyindirir, əlinə də silah verir. İndi dünya o qədər inkişaf edib ki, hər şeyi etmək mümkündür. Ona görə də hesab edirəm ki, Hüseynbala Mirələmovla bağlı görüntü real təsdiqini taparsa, o zaman bu hərəkətlərə qiymət vermək olar”.
Hüseynbala Mirələmovla bağlı səslənən müdafiə xarakterli arqumentləri nə dərəcədə əsaslı saymaq olar?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Hüseynbala Mirələmov məsələsilə bağlı hər detal oradadır: “Ona niyə kimsə haqq qazandırmağa çalışır? Bunu edən ziyalıların ziyalı olmaqlarına şübhəm var. Kimsə şəxsi münasibətlərinə görə niyə əxlaqsızlığa haqq qazandırmalıdır? Bu hadisədən sonra məlum oldu ki, Mirələmov bir neçə yerdə işləyirmiş. Cavan adamlar özünə iş tapa bilmir, bu adam 10 yeri zəbt edib. Cəmiyyətin bu şəkildə təpkisi, həmçinin, Mirələmovun indiyə qədərki fəaliyyəti yox, fəaliyyətsizliyinə olub. Deyirlər ki, onun xidmətlərinə görə olaya göz yummaq olardı. Bu nə yanaşmadır? Lap götürək ki, kiminsə xidməti olub. İndi həmin adam durub cəmiyyətdə öz əxlaqsızlığını nümayiş etdirməlidir? Biri deyir ki, oruc tutur, seyiddi. Bunun məsələyə nə dəxli var? Oruc tuta-tuta bu əməli edirsə, deməli, ikiqat məsuliyyət daşıyır. Çünki həm də günah etmiş olub. Bu əməl cəmiyyətdə hörmətsilik və əxalqsızlıqdır. Bunun başqa bir adı yoxdur. Belə fakt qarşısında kimsə onu müdafiə edirsə, deməli, bizim bəzi ziyalılarımızda mövqesizlik sindromu yaşanır. Ən yaxşı halda, kimsə susmağı ilə Mirələmova olan sədaqətini nümayiş etdirə bilərdi. Yoxsa, özünü rəzil hala salmağa ehtiyac yox idi”.
Məhəmmədəli QƏRİBLİ
