Azərbaycanın hər zaman əleyhinə çıxış etdiyi hallardan biri də ikili standartlarla bağlıdır. Çünki məhz ikili standartlar dünya təhlükəsizliyini ciddi təhdid altına atır və artıq bunun real təsdiqi olan misalların sayı kifayət qədərdir. Amma belə görünür ki, dünya hələ də ikili standartlar bəlasından xilas ola bilməyib. Bunun ən real təsdiqlərindən biri Avropa Şurası Parlament Assambleyasının (AŞPA) yaz sessiyası oldu.
Bu sessiya sözügedən qurumun hələ də Azərbaycana münasibətdə ikili standartlar mövqeyindən çıxış etdiyini təsdiq edir. Belə vəziyyət AŞPA-nın gələcəyini, onun nüfuzunu sual altına alır ki, sonda bu, qurumun dağılmasını belə istisna etmir. Qurumun son sessiyasında sərgilənən ikili standartlar erməni terrorçulara münasibətdə özünü tam şəkildə büruzə verdi. Əvvəldən sessiyanın gündəliyində nəzərdə tutulmamış, amma erməni tərəfinin müxtəlif təsir imkanlarından istifadə edərək AŞPA-nın plenar iclasına çıxarılacaq məruzələr sırasına sərbəst müzakirələr xəttilə daxil edilməsinə nail olduğu hesabat da bunun real sübutu oldu. Hesabat “erməni hərbi əsirlər, digər əsirlər və köçkünlər” adlanırdı. AŞPA-da ermənipərəst, xüsusən də Soros Fondu tərəfindən maliyyələşdirilən bəzi deputatlar sayəsində sərbəst müzakirələr zamanı hesabat ətrafında fikir mübadiləsi aparıldı. Amma bu heç nəyi dəyişmədi. Əvəzində AŞPA öz nüfuzuna zərbə vurdu, ikili standartlardan xilas ola bilmədiyini göstərdi. Belə standartlar həm də onda özünü qabarıq nümayiş etdirdi ki, AŞPA-da məsələnin mahiyyətinə varılmadan hesabatın müzakirəyə çıxarılmasına razılıq verildi. Belə ki, Azərbaycanda saxlananların ermənilərin iddia etdiyi kimi hərbi əsir deyil, cinayətkarlar olmasını, əslində, AŞPA da daxil olmaqla, bütün beynəlxalq qurumlar bilir. 44 günlük müharibədə əsir düşən bütün şəxslər üçtərəfli müqavilə imzalanandan dərhal sonra qaytarılıb. Azərbaycan Ermənistana 70, Ermənistan Azərbaycana 14 nəfər əsir qaytarıb. Bağlanmış müqaviləyə əsasən, əsirlər “hamının hamıya” prinsipi ilə dəyişdirilib. Son Qarabağ müharibəsində Azərbaycan Ermənistana 1500 əsgərin cəsədini qaytarıb. Halbuki, Birinci Qarabağ müharibəsində Azərbaycan tərəfdən itkin düşmüş sayılan 4000-dən artıq əsir və girovların bir nəfərini belə Ermənistan Azərbaycana qaytarmayıb.
Müharibə bitəndən sonra isə Azərbaycan ərazisinə silahlı müdaxilə edən, təxribatlar törədən cinayətkarlar artıq heç bir halda hərbi əsir sayıla bilməz. Ermənilərin “hərbi əsir” dediklərinin hamısı Ermənistanın Şirak vilayətindən silahlı qüvvələrdə hərbi xidmət keçmək üçün çağırılıb. Onlar məhz müharibə bitəndən sonra Azərbaycanın Silahlı Qüvvələrinin üzvlərinə və mülki əhalisinə qarşı diversiya, terror aktları törətmək məqsədilə ərazilərimizə yeridilib. Tutulan şəxslərin hamısı 2020-ci il 26 noyabr tarixindən, yəni Azərbaycan və Rusiya prezidentləri ilə Ermənistan baş nazirinin imzaladığı üçtərəfli bəyanatla əldə edilmiş atəşkəsin qüvvəyə minməsindən sonra ölkəmizə göndərilib. Amma nədənsə, bu reallıq AŞPA-da nəzərə alınmır. AŞPA-da Azərbaycan nümayəndə heyətinin üzvü Kamal Cəfərov bu fonda maraqlı məqamlara toxunur. Deputat bildirib ki, Assambleyanın debatlar üçün mövzuları birtərəfli qaydada seçməsi məyusluq doğurur: “Biz hər zaman və istənilən formatda mövqeyimizi qorumağa hazırıq. AŞPA Birinci Qarabağ müharibəsindən sonra 1 milyondan çox qaçqın və məcburi köçkünümüzün pozulmuş hüquqlarına, Xocalı soyqırımı zamanı azərbaycanlılara qarşı törədilmiş faciələrə göz yumdu. İndi daha aktual bir mövzu olan azad olunmuş ərazilərin minalardan təmizlənməsi barədə danışılmalı olmasına baxmayaraq, ərazilərimizdə saxlanılan cinayətkarlardan bəhs edir. Ermənistan tərəfindən ərazilərin minalanması səbəbindən üçtərəfli bəyanat imzalanandan sonra 20 mülki azərbaycanlı həyatını itirib. Bu, müharibə cinayətidir. Ermənistan minalanmış ərazilərin xəritələrini təhvil verməkdən imtina edir”.
O qeyd edib ki, Ermənistan nümayəndə heyətinin “hərbi əsirlər” mövzusunu sərbəst debata salmaq səyləri siyasi motiv daşıyır: “Tezliklə Ermənistanda seçkilər olacaq. Erməni deputatlar əhaliyə hələ də faydalı olduqlarını göstərmək və ailələrin ağrılarından istifadə edərək xal qazanmağa çalışırlar. Onlar şəxsi maraqları üçün bu platformadan sui-istifadə etməkdən çəkinməlidirlər. Bəzi səyləriniz qəsdən ola da bilər, olmaya da bilər, ancaq belə davranışlar Azərbaycanla Ermənistan arasındakı dövlətlərarası münasibətlərə zərbə vurur, kömək etmir. Erməni nümayəndə heyətinin çıxışlarını dinlədikdən sonra görürük ki, onlar sülhə deyil, revanşizmə hazırlaşır”. Yekun nəticə həm də onu gəstərdi ki, AŞPA-da erməni terrorçularla bağlı Azərbaycana qarşı növbəti hücum cəhdinin də arxasında Soros Fondu və qurumda bu fonda bağlı olan şəbəkə dayanır. Kampaniya isə iflasa uğradı və artıq nəzərə alınmalıdır ki, AŞPA-nın çıxaracağı hansısa qərarın heç bir əhəmiyyəti olmayacaq. Qurum artıq əhəmiyyətsiz müzakirələr aparması, yalnız kağız üzərində qalan qərarların çıxarılması ilə tanınır. İndi də ikili standartlara yol verməklə isə AŞPA özünü daha sürətlə iflasa sürükləyir.
Ramil QULİYEV
