Ermənistanın baş naziri Nikol Paşinyanın Zəngəzur vilayətinə səfəri ciddi qalmaqallarla yadda qalıb. Eyni zamanda, vilayətdə baş verənlər ölkədə yeni siyasi qalmaqalın da əsasını qoyub.
Bu barədə danışmazdan öncə qeyd edək ki, Zəngəzur vilayəti istisna olmaqla, Ermənistanın digər ərazilərində Paşinyana dəstək yüksəkdir. Zəngəzurda isə vəziyyət fərqlidir. Xüsusən də sərhədyanı ərazilərdə Paşinyana münasibət birmənalı deyil. Belə bir vaxtda Nikol Paşinyanın bir neçə saat onu gözləyən sərhədyanı Şurnux kəndinin sakinlərinə məhəl qoymadan yoluna davam etməsi kənddə qalmaqala səbəb olub. Qəzəblənən şurnuxlular onun kortejini yumurta atəşinə tutublar. Şurnux kəndinin rəhbəri Akop Arşakyan deyib ki, sakinlər onları narahat edən məsələləri çatdırmaq üçün səhərdən Qafan-Gorus yolunda Paşinyanı gözləyiblər: “O isə Gorusa getdi, sakinlərlə görüşmədi. İnsanlar onun gizlicə gəlib-getməyinə görə özlərini təhqir olunmuş hesab etdilər”. Zəngəzur vilayətinə daxil olan Qafanda keçirilən müşavirə zamanı isə Nikol Paşinyan güc strukturlarının rəhbərlərinə onun Mehri şəhərinə gəlməsinə qarşı keçirilən aksiyaların təşkilatçılarını müəyyənləşdirib cəzalandırmağı tapşırıb: “Mehridəki insidentə toxunmaq istərdim. Aydın məsələdir ki, qanun pozulub. Respublikanın hüquq-mühafizə orqanlarının aydın və sərt reaksiya verəcəyini gözləyirəm, çünki Ermənistanda cəzasızlıq ab-havasının yaranmasına yol vermək olmaz”. İstintaq Komitəsinin nümayəndəsi baş nazirə cinayət işi açmaq üçün materialların hazırlandığını, eyni zamanda İstintaq Komitəsinə göndərilən cinayət işlərinin də olduğunu bildirib.
Xatırladaq ki, Nikol Paşinyanın Mehriyə səfəri qalamaqallı olub. Şəhər sakinləri baş nazirin vilayətə səfərinə etiraz ediblər. Onlar “Nikol satqındır!” şüarını söyləyərək, Paşinyanın Zəngəzuru tərk etməsini tələb ediblər. Hadisə zamanı Paşinyanın mühafizəçisinin paltarı cırılıb. Məlumata görə, etirazçılar Paşinyanı müşayiət edənlərə və baş nazirin avtomobilinə hücum ediblər. Nikol Paşinyanın təhlükəsizliyini təmin edən Milli Təhlükəsizlik Xidməti və polisin 500 maskalı xüsusi təyinatlısı hücuma müqavimət göstərməyərək avtomobilə minib, Paşinyanla birlikdə şəhəri tərk ediblər. Bildirilib ki, hadisə nəticəsində dövlət mühafizə xidmətinin başçısı Sarkis Ohanesyanın paltarı cırılıb. Beləliklə, baş nazirin regiona planlaşdırdığı səfər baş tutmayıb. Qeyd edək ki, Nikol Paşinyan aprelin 20-də Sünik vilayətinin polis rəisini, Gorus və Qafanın polis rəisi müavinlərini gözlənilmədən işdən azad edib. Nikol Paşinyanın mətbuat katibi Mane Gevorkyan isə bildirir: “Qafanda sakinlər baş naziri hərarətlə salamlayırlar. Amma Aqarak və Mehridə baş verənlər Şurnux və Mehri sakinləri ilə heç bir bağlılığı olmayan məlum dairələr tərəfindən təşkil edilib”. “Azatutyun” radiosu bildirir ki, Zəngəzur sakinlərinin hiddət və tələblərinə rəğmən, Paşinyan xüsusi təyinatlı polislərin əhatəsində Mehri küçələri ilə gəzintini davam etdirib: “Qafanda vilayət administrasiyasının qarşısına toplaşmış kütlə baş naziri “Nikol satqındır!” sədaları ilə qarşılayıb. Amma kütlənin arasında Paşinyanın tərəfdarları da olub. Onlar baş naziri əl çalaraq alqışlayıblar. Qafanda sakinlər baş nazirlə söhbət edib və onun səfərinə şad olduqlarını deyiblər. Bu görüşlərdən birinin videosunu Paşinyanı bu səfərdə müşayiət edən vitse-spiker Alen Simonyan öz “Facebook” səhifəsində yerləşdirib. O, videoya bu sözləri əlavə edib: “Qafanda, təxribatlarsız”. Şurnux kəndinin icra nümayəndəsi Akop Arşakyan isə baş nazirin kəndə gəlməsindən o gedəndən sonra xəbər tutub. Arşakyan təəssüflənib ki, Paşinyana təhlükəsizliklə bağlı verəcəyi mühüm suallar vardı: “Gecə vaxtı niyə gəlib? Azərbaycanlılar onu görməsinlər deyə, yoxsa o, azərbaycanlıları görməsin deyə? Bizim sakinlər hələ də gözləyirlər. Deyirlər, qoy baş nazir gəlsin, hər şeyi onun üzünə deyək”. Bu, Paşinyanın müharibədən sonra Zəngəzura ikinci səfər cəhdidir. Birinci cəhdi o, ötən ilin dekabrında etmişdi. Onda Paşinyan Sisyandan o yana keçə bilməmişdi. Sisyan kilsəsində isə keşiş baş nazirin uzana qalan əlini sıxmaqdan imtina etmişdi. Zəngəzurlılar isə Gorusa gedən yolu bağlamış və Paşinyan İrəvana qayıtmağa məcbur olmuşdu. Hazırda Paşinyan etirazların təşkilatçılarına qarşı sərt tədbirlər görülməsinə göstəriş verib. Eə bu da siyasi qalmaqal və yeni siyasi qarşıdurma deməkdir. Zəngəzurda baş vermiş insidentlə bağlı xuliqanlıq və hakimiyyət nümayəndəsinə qarşı zorakılıq maddələri üzrə cinayət işlərinə başlanıb. Bu maddələr üzrə pul cərimələri ilə yanaşı, 5 ilədək azadlıqdan məhrumetmə cəzası nəzərdə tutulur. Müxalifət hakimiyyətin bu addımını etirazla qarşılayır və bunu inzibati metodlardan əhaliyə qarşı istifadə hesab edir. Bu da Ermənistanda seçki ərəfəsində yeni siyasi qarşıdurma deməkdir”.
“Dejavü” teleqram kanalı isə bildirir ki, Nikol Paşinyanın həyat yoldaşı Anna Akopyan Ermənistan Milli Təhlükəsizlik Xidmətinin rəhbəri Armen Abazyana zəng edərək, aqressiv şəkildə ondan Paşinyanın Zəngəzur səfərini məhv edən aktivistlərin həbsini tələb edib. O, Abazyanı MTX-nın baş verənləri səssiz şəkildə izləməsinə görə tənqid edib. Akopyan, həmçinin Abazyanın, əmri icra etməyəcəyi təqdirdə, işdən qovulacağını bildirib. Ermənistanın birinci xanımı, belə davam edəcəyi halda, bölgələrdə seçkiqabağı kampaniyanın aparılmasının mümkünsüz olacağını və narazılığın hər yerə yayılacağını bildirib. Kanal Abazyanın artıq əmrin icrasına başladığını və Zəngəzurda geniş həbslər olacağını bildirib.
Nahid SALAYEV
