44 günlük müharibədə qələbəmiz Ermənistanın hər cür yalana, saxtakarlığa əl atmasına, Azərbaycanın zəfərinə qara yaxmaq üçün min cür oyundan çıxmasına səbəb olub.
Bir-birinin ardınca qələbəmiz şərəfinə inşa edilən muzeylər, açılan parklar, azad edilmiş ərazilərimizdə həyata keçirilən tikinti-quruculuq işləri, abidələrimizin bərpası Ermənistana elə ağır zərbə vurub ki, əlavə şərhə, təsvirə ehtiyac yoxdur.
Yalan istehsalı sahəsində dünyada lider olan erməni mediası öz saxtakar təbliğatını davam etdirir. Belə ki,
Ermənistan mətbuatında yayılan iddiaya görə, guya İtaliyanın “120 qrammy” şirkəti Azərbaycanın inşa etdiyi Zəfər Muzeyinin tikintisi ilə bağlı layihədə iştirak etməkdən imtina edib. Bu barədə əsassız məlumatın isə Ermənistanın Venesiyadakı fəxri konsulluğu tərəfindən yayıldığı yazılır.
Qeyri-rəsmi mənbələrdən aldığımız məlumata görə, ümumiyyətlə, Azərbaycanın “120 qrammy” adlı şirkətə hər hansı bir müraciəti olmayıb, bütövlükdə, bu şirkətin reallıqda mövcud olub-olmadığı da hələ bəlli deyil. Mənbənin bildirdiyinə görə, İtaliya və Azərbaycan arasındakı isti münasibətlər, İtaliya parlamentinin Ermənistana qarşı çıxardığı qətnamə, eləcə də İtaliya şirkətlərinin Azərbaycanın azad edilmiş ərazilərində həyata keçiriləcək tikinti-quruculuq işlərində aktiv şəkildə iştirak edəcəyi barədə məlumatlar Ermənistanı ciddi narahat edir və iki ölkə arasındakı xoş münasibətləri pozmaq üçün təxribatlara, yalan məlumatlar yaymağa əl atır.
Bunun bir təxribat olduğunu qeyd edən ekspertlər bildirirlər ki, Vətən müharibəsi memorial kompleksi və Zəfər Muzeyinin konsepsiyasının hazırlanması işində italiyalı ekspertlər yaxından iştirak edirlər.
Qeyd edək ki, Vətən müharibəsi memorial kompleksi və Zəfər Muzeyinin konsepsiyasının hazırlanması istiqamətində Azərbaycan Respublikasının Mədəniyyət Nazirliyi tərəfindən işlər davam etdirildiyi və layihənin yüksək səviyyədə icrası üçün yerli mütəxəssislərlə yanaşı, xarici ekspertlərə də müraciət olunduğu barədə rəsmi məlumatlar var. Nazirliyin saytında qeyd edilir ki, bununla əlaqədar İtaliyanın dünyaca məşhur aparıcı multimedia şirkəti olan “G GROUP” şirkəti ilə əməkdaşlığa başlanılıb. “G GROUP” şirkəti bir sıra beynəlxalq layihələri uğurla icra edib.
Mədəniyyət Naizrliyinin 22 fevral tarixində yaydığı məlumata görə, 9 fevral 2021-ci il tarixində şirkət nümayəndələri ilə nazirliyin rəhbərliyi arasında onlayn görüş təşkil edilib və ilkin müzakirələr aparılıb.
Vətən müharibəsi memorial kompleksi və Zəfər Muzeyinin konsepsiyasının mükəmməl işlənilməsi üçün məkanla yerində tanış olmaq mühüm əhəmiyyət kəsb edir. Bu məqsədlə cari ilin 19-21 fevral tarixində “G GROUP” şirkətinin işçi heyətinin - yaradıcı icraçı direktor və bədii rəhbər Fabrizio Conti, strategiya üzrə məsləhətçi Laura Conti, memar, muzey və ekspozisiya dizayneri Nicola Pavan və memar Carlo Pavanın Bakıya səfəri təşkil olunub.
Məlumatdan da gördüyünüz kimi, prosesdə İtaliyanın “G GROUP” şirkəti yaxından iştirak edəcək. Odur ki, Ermənistanın ortaya atdığı “120 qrammy” şirkətinin heç adı da çəkilmir, ümumiyyətlə, belə adda şirkətin olub-olmadığı da sual altındadır, ola bilsin, bu şirkət də ermənilərin növbəti qondarmasıdır...
İradə SARIYEVA
