Fransanın “Le Monde” nəşrində Azərbaycanın azad olunmuş ərazilərində aparılan bərpa işləri, Qarabağda müharibə bitdikdən sonra Azərbaycanla Fransa arasında ikitərəfli münasibətlərin inkişafı barədə məqalə dərc olunub.
Məqalədə Azərbaycanla Ermənistan arasındakı müharibənin rəsmi Parislə Bakı arasındakı ikitərəfli münasibətlərdə soyuqluq yaratdığı bildirilir. Qeyd olunur ki, müharibə dövründə rəsmi Parisin sərgilədiyi birtərəfli siyasət üzündən fransız şirkətləri Qarabağda aparılan yenidənqurma işlərindən kənarda qalıblar. Bildirilir ki, müharibə Azərbaycanla Fransa arasındakı ikitərəfli münasibətlər praktikasını pozdu. Rəsmi Ankara Bakıya qəti hərbi və diplomatik dəstək təklif etdi, Paris isə daha çox İrəvana meyl etdi. Bu gün Fransanın iri şirkətləri Qarabağın yenidən qurulması üçün iddialı layihələrdən məhrum olacaqlarından ehtiyatlanırlar: “Fransız şirkətlərinin təklifləri daha cazibədar olsa da, yeni müqavilələr gözləməyə dəyməz. Bu, yalnız emosional reaksiya deyil, etibar məsələsidir”.
O da bildirilir ki, Prezident İlham Əliyevin müdrik siyasəti sayəsində Azərbaycan öz torpaqlarını geri qaytarıb və azad edilmiş ərazilərdə bərpa-quruculuq işlərinə start verilib. Həmçinin, vurğulanır ki, rəsmi Paris Cənubi Qafqazdakı mövqeyini sakitcə balanslaşdırmağa çalışır və bu məqsədlə fevralda dövlət katibini Azərbaycana göndərib.
Göründüyü kimi, Fransa kimi böyük bir dövlətin müharibə dövründə birtərəfli siyasət yeritməsi son nəticədə bu dövlətin Azərbaycandakı iqtisadi maraqlarını zərbə altında qoyub. Bu isə artıq elə Fransanın özündə mənfi qarşılanır və get-gedə bu yöndə tənqidlər artır.
“İndi də bu ölkədəki müəyyən dairələr bunun yanlış və zərərli olmasının fərqinə varıblar”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, Fransa kimi bir dövlətin müharibə dövründə birtərəfli siyasət yeritməsi Azərbaycanda bu ölkəyə olan etimadın itməsi ilə nəticələndi: “Le Monde” nəşrində dərc olunan məqalə artıq Fransadakı dairələrin həqiqəti dərk etməsindən xəbər verir. Ölkədəki biznes dairələri bunun nə qədər yanlış olduğunu anlayır və haqlı olaraq Parisin məlum siyasətinə tənqidi prizmadan yanaşırlar. Fransanın dövlət siyasəti 44 günlük müharibə dövründə bütün siyasi etiket normalarından kənara çıxdı. Sanki Azərbaycan Ermənistan ərazisində döyüşürdü. Halbuki, Azərbaycan öz ərazisində müharibə aparırdı və torpaqlarımızı işğalçılardan təmizləyirdi. Bütün hallarda, prezident Emmanuel Makron başda olmaqla, Fransa rəsmilərinin ədalətsiz mövqeyi münasibətlərə xələl gətirdi. Haqlı olaraq bu, Azərbaycan cəmiyyətində etirazla qarşılandı. Təbii ki, bütün bunlar bu və ya digər dərəcədə Fransanın Azərbaycandakı iqtisadi maraqlarına zərbə oldu. Ordumuz böyük əraziləri işğaldan azad etdi. Dövlət büdcəsindən ərazilərin bərpası ilə əlaqədar olaraq 2 milyard manatdan çox vəsait ayrılıb. Ard-arda bir sıra xarici ölkələr və onlara məxsus şirkətlər bərpa prosesində iştirak etmək istədiklərini bəyan edirlər. Çünki ərazilərin bərpası xarici şirkətlərə yeni imkanlar açır. Azərbaycan enerji və digər layihələrdə zaman-zaman Fransa şirkətlərinə önəm verib. Ancaq təəssüflər olsun ki, 44 günlük müharibə dövründə rəsmi Paris bütün bunları nəzərə almayaraq, açıq şəkildə işğalçı Ermənistanı dəstəklədi. İndi də Fransadakı müəyyən dairələr bunun yanlış və zərərli olmasının fərqinə varıblar. Hesab edirəm ki, Fransa bu sahədə dönüş yaratmaq istəyirsə, öz siyasətində ciddi dəyişiklik etməlidir. Dövlət olaraq erməni lobbisinin əlində alət olmamalıdır”.
V.Rəhimzadə hesab edir ki, yalnız bütün bunlardan sonra Fransaya etimad bərpa oluna bilər.
Vidadi ORDAHALLI
